1 Timoteo 5:12 - Rapa Nui

¹² Mo hāipo-ipo tāꞌue, he hape ki te hōrea aŋa ꞌi te hora haka pāpaꞌi i a ia.

1 Timoteo 5:12 ပူးပေါင်းရင်းမြစ်များ

1 Kōrinto 11:34

ꞌE mo maruaki o te kope e tahi o roto i a kōrua, ka kai rō ꞌai ꞌi tōꞌona hare, ꞌo haka ūtuꞌa i a kōrua e te ꞌAtua, he taꞌe tano o te kōrua haka tere iŋa ꞌi te hora haka taka-taka mo manaꞌu i te mate o te tātou Pūꞌoko Haka Tere. ꞌE te tētahi meꞌe ꞌui mai era e kōrua, ki tuꞌu atu a au ana haka ꞌite atu.

Karatia 1:6

Ko māere riva-riva ꞌana a au ꞌi te hōrou o kōrua mo hārui hai tuaꞌivi i te ꞌAtua ꞌe i tāꞌana hāpī parautiꞌa. O te ꞌAtua, paꞌi, i haꞌataꞌa i a kōrua māꞌana hai riva rahi mau nō o te ⌊Kiritō⌋, mo eꞌa o kōrua mai roto i te ūtuꞌa o te hara ꞌe mo ravaꞌa i te ora ꞌāpī ꞌina he hopeꞌa raꞌa. ꞌE nā kōrua e haka roŋo mai ena ki te hāpī kē manaꞌu e kōrua he ⌊roŋo riva-riva o te ꞌAtua⌋.

1 Timoteo 5:11

ꞌE te viꞌe hove matahiti taꞌe rahi he viꞌe mo taꞌe haka pāpaꞌi ꞌi ruŋa i rā parau, ꞌo topa pē nei ē: pe muꞌa ka oho ena, ꞌata pūai tōꞌona haŋa ki tāꞌana o te tane ki tōꞌona haŋa mo tāvini ki te ⌊Kiritō⌋, ꞌe he haŋa mo ⌊hāipo-ipo⌋ haka ꞌou.

1 Timoteo 5:13

ꞌE taꞌe ꞌo ira nō, ꞌo māhani i te hupe-hupe, ꞌo oho ki hare era ki hare era, ꞌo haꞌamata ꞌo haꞌaꞌino i te rua, ꞌe ꞌo ꞌāmui ki roto i te ture kē koia ko kī i te vānaŋa taꞌe tano.

Tanatiako 3:1

E te taina, taꞌe taꞌatoꞌa o kōrua mo maꞌori hāpī. E ꞌite rō ꞌā, paꞌi, kōrua: ꞌata hau te paŋahaꞌa o te ture o te ꞌAtua mo mātou mo te nuꞌu haka ꞌite i tāꞌana vānaŋa ki te tētahi nuꞌu.

1 Pētero 4:17

Nā ko tuꞌu mai ꞌana te hora mo haꞌamata o te ture, ꞌe ka haꞌamata ena a te huaꞌai o te ꞌAtua. ꞌE mo haꞌamata o te ture mai i a tātou, ¿pē hē ia te hopeꞌa raꞌa o te nuꞌu ꞌina he haꞌatura ki te ⌊roŋo riva-riva o te ꞌAtua⌋?