1 Timoteo 2:8 - Rapa Nui

⁸ Te meꞌe haŋa ꞌāꞌaku: e pure te ŋāŋata ꞌi te kona taꞌatoꞌa, e maꞌu te rima a ruŋa mo pure ki te ꞌAtua hai māhatu maꞌitaki, taꞌe hai riri ꞌe taꞌe hai ꞌaka-ꞌaka o te manaꞌu.

1 Timoteo 2:8 ပူးပေါင်းရင်းမြစ်များ

Māteo 21:21

He pāhono e Ietū: —Te parautiꞌa, mo haka moe o kōrua i te manaꞌu ꞌi ruŋa i te ꞌAtua ꞌe ꞌina e ko ꞌaka-ꞌaka, te meꞌe o kōrua mo aŋa taꞌe nō ꞌō ko te meꞌe aŋa era e au ki te tumu pika. Mo kī o kōrua ki te maꞌuŋa nei: «Ka ꞌoi mai nā ꞌe ka rere ki roto i te vaikava», pē ira ka ai era.

Māteo 5:44

ꞌE, ꞌī a au he kī atu: e haŋa kōrua ki te nuꞌu maꞌu i te riri mo kōrua, ꞌe e pure mo te nuꞌu tute i a kōrua mo tōtōā.

Māteo 6:12

E haka kore koe i te mātou hara, pa he haka rehu iŋa o mātou i te meꞌe ꞌino aŋa mai e te rua.

Ruka 23:34

He kī a Ietū: «E Koro, ka haka rehu koe i te meꞌe aŋa mai e te nuꞌu nei; kai ꞌite e aha ꞌā a rāua».] Te vaꞌehau ia ko no-noho ko pere ꞌā i te kahu o Ietū mo uꞌi ki a ai ki a ai ana topa.

Ruka 24:50

He oho ia a Ietū ananake ko tū nuꞌu era ki Vētānia. I tuꞌu era he maꞌu a Ietū i tōꞌona rima a ruŋa he haꞌamaitai i rā nuꞌu.

Iovani 4:21

He pāhono e Ietū: —Ka haka roŋo mai. Nā ko hāhine ꞌā te mahana e ko tātake haka ꞌou ꞌi hē te kona tano mo haꞌamuri ki te ꞌAtua, hoki ꞌi nei ꞌo ꞌi Hērutarema.

Aŋa o te ꞌĀpōtoro 10:2

Rā kope he taŋata moꞌa ꞌe haꞌatura ki te ꞌAtua, ꞌe ananake ko te nuꞌu taꞌatoꞌa o tōꞌona hare e haꞌamuri e haꞌahana-hana era ki te ꞌAtua. ꞌE, takoꞌa, e hāꞌūꞌū rō ꞌana hai moni mo te ⌊hūrio⌋, ꞌe e pure rō ꞌā ki te ꞌAtua.

Aŋa o te ꞌĀpōtoro 10:31

He kī mai: “E Koronerio, ko ŋaroꞌa ꞌana e te ꞌAtua i taꞌa pure, ꞌe e manaꞌu rō ꞌana i taꞌa meꞌe aŋa mo hāꞌūꞌū ki te nuꞌu veve.

Aŋa o te ꞌĀpōtoro 10:4

He noho he uꞌi a Koronerio ki tū merahi era koia ko riꞌa-riꞌa ꞌe he ꞌui: «¿He aha rā taꞌa meꞌe haŋa?». He kī e te merahi: «Ko ŋaroꞌa ꞌana e te ꞌAtua i taꞌa pure ꞌe e takeꞌa rō ꞌana i tuꞌu hāꞌūꞌū iŋa ki te veve.

Aŋa o te ꞌĀpōtoro 21:5

I oti era te ŋā mahana nei, he eꞌa a mātou mo oho. Te nuꞌu taina taꞌatoꞌa ananake ko te rāua ŋā viꞌe ꞌe ŋā poki he uŋa i a mātou ꞌātā ka tuꞌu rō ki te taha-taha o te tai. ꞌI ira a mātou i tū-turi i pure tahi ai.

Aŋa o te ꞌĀpōtoro 7:60

He tū-turi ia he ohu pūai: «¡E Ietū, ꞌina koe ko tapa atu i te hara nei o te nuꞌu nei!». I oti era te kī i te meꞌe nei, he mate.

1 Kōrinto 7:7

ꞌĀhani ꞌō kōrua pē au ꞌā takoꞌa: ꞌina he viꞌe. ꞌE, ka ai atu pē ira, e ꞌite rō ꞌana a au: te ꞌAtua i aŋa ai i te taŋata taꞌe pē tū huru tahi ꞌā: tētahi i aŋa ai mo hāipo-ipo ꞌe tētahi mo taꞌe hāipo-ipo.

2 Kōrinto 2:14

He māuru-uru a au ki te ꞌAtua. ꞌĀꞌana, paꞌi, te vaꞌai mai i te pūai mo rē ki te meꞌe taꞌatoꞌa ꞌo te ai o mātou o te Kiritō. ꞌE ꞌāꞌana takoꞌa te hāꞌūꞌū mai mo haka ꞌite i te ⌊roŋo riva-riva o ruŋa i a Ietū⌋, roŋo pa he manoꞌi ꞌeo tuꞌu ki te kona taꞌatoꞌa.

Fīripo 1:12

E te taina, e haŋa rō ꞌana a au mo ꞌite o kōrua: taꞌe he ꞌati mōꞌoku te meꞌe topa mai nei ki a au ꞌo te ai hai nei meꞌe ko rahi ko oho ꞌana te nuꞌu ŋaroꞌa i te roŋo riva-riva o ruŋa i a Ietū ꞌe haka moe i te manaꞌu ꞌi ruŋa i a ia.

1 Tētārōnika 1:8

Hai kōrua te roŋo riva-riva o ruŋa i a Ietū Kiritō i ꞌite i oho ai a te kona taꞌatoꞌa o Mātērōnia ꞌe o Ākāia, ꞌe taꞌe nō a te ŋā kona nei, a te kona taꞌatoꞌa. Te nuꞌu o te ŋā kona nei e ꞌite rō ꞌana pē nei ē: e haka moe rō ꞌana kōrua i te manaꞌu ꞌi ruŋa i te ꞌAtua. ¿Mo aha ia a mātou ana vānaŋa haka ꞌou o ruŋa i a kōrua ki a rāua? Taꞌe he parau ꞌāpī mo te nuꞌu era.

1 Timoteo 5:14

ꞌO ira a au e haŋa nei ki te ŋā viꞌe ꞌāpī hove mo hāipo-ipo, mo ai o te ŋā poki ꞌe mo ai he ŋā viꞌe maꞌu riva-riva i te rāua hare ꞌe i te rāua huaꞌai, ꞌo ai te meꞌe taꞌe tano mo kī o ruŋa i a rāua e te nuꞌu taꞌe haŋa ki te ꞌAtua.

Tito 3:8

He parautiꞌa te ŋā meꞌe kī atu ena e au, ꞌe te meꞌe haŋa, ꞌi te hora nei, he haka aŋi-aŋi riva-riva e koe i nā ŋā meꞌe ki te nuꞌu haka moe i te manaꞌu ꞌi ruŋa i te ꞌAtua, ki ai ai o rāua he nuꞌu aŋa oho i te meꞌe riva-riva. Te hāpī ena he meꞌe tano ꞌe riva-riva mo te taꞌatoꞌa.

ꞌEvereo 10:22

ꞌO ira, e haka hāhine tātou ki te ꞌAtua hai māhatu, hai haka moe iŋa i te manaꞌu ꞌina he ꞌaka-ꞌaka ꞌi ruŋa i a ia, hai manaꞌu maꞌitaki pa he meꞌe ena: ko pī-pī ꞌā e te toto era o Ietū ꞌe hai hakari maꞌitaki pa he meꞌe ena: ko hopu ꞌā hai vai maꞌitaki.

Tanatiako 4:8

E haka hāhine ki te ꞌAtua, ki haka hāhine atu ai. E te nuꞌu hara ē, ¡ka haka maꞌitaki te kōrua māhatu! E te nuꞌu haŋa ki te ꞌAtua ꞌe ki te haka tere iŋa o te ao nei ē, ¡ka toꞌo te meꞌe rake-rake mai roto i te kōrua māhatu!

1 Pētero 3:7

ꞌE a kōrua, e te kenu hāipo-ipo ē, e haŋa e hāpaꞌo riva-riva i te kōrua ŋā viꞌe. Ka ai atu ꞌata hau rō atu te kōrua pūai ki a rāua, e moꞌa ꞌi te ꞌite pē nei ē: mo rāua takoꞌa te hauhaꞌa ka vaꞌai ena e te ꞌAtua, he ora ꞌāpī ꞌina he hopeꞌa raꞌa. Mo taꞌe aŋa o kōrua pē ira he hihi-hihi te kōrua pure.