1 Timoteo 2:7 - Rapa Nui

⁷ Mo haka ꞌite mo oho i te roŋo nei i uŋa ai i a au e te ꞌAtua, pa he taŋata maꞌuroŋo ꞌe pa he ⌊ꞌāpōtoro⌋, ꞌe i kī rō mai mo hāpī ki te nuꞌu taꞌe he hūrio o ruŋa i te haka moe iŋa i te manaꞌu ꞌi ruŋa i a Ietū ꞌe o ruŋa i te hāpī parautiꞌa o te ꞌAtua. Te meꞌe nei ꞌāꞌaku e kī atu ena he parautiꞌa, taꞌe he reo-reo.

1 Timoteo 2:7 ပူးပေါင်းရင်းမြစ်များ

Iovani 7:35

He haꞌamata ia te hūrio he ꞌui ki a rāua ꞌana: «¿Ki hē te kope nei ka oho ena ka taꞌe ravaꞌa ena e tātou? ¿He oho hō he noho ꞌi muri i te hūrio ꞌi te henua kē, ꞌe he hāpī i te nuꞌu taꞌe ꞌite ko ai te ꞌAtua parautiꞌa?

Aŋa o te ꞌĀpōtoro 14:27

I tuꞌu era a Pauro ararua ko Verenāvē ki Antiokia, he haka taka-taka i te nuꞌu haka moe i te manaꞌu ꞌi ruŋa i a Ietū ꞌe he ꞌaꞌamu i tū meꞌe taꞌatoꞌa aŋa era e te ꞌAtua hai rāua, ꞌe pē hē te ꞌAtua i mātaki ai i te ꞌōpani mo haka moe takoꞌa o te nuꞌu taꞌe he hūrio i te rāua manaꞌu ꞌi ruŋa i a Ietū.

Aŋa o te ꞌĀpōtoro 22:21

»He kī mai e Ietū: “Ka oho nō; ꞌī a au he uŋa i a koe ki te nuꞌu taꞌe he hūrio noho ꞌi te ŋā henua ena e roa rō ꞌā mai nei”».

Aŋa o te ꞌĀpōtoro 26:20

ꞌI raꞌe a au i haka ꞌite ai i te ⌊roŋo riva-riva o te ꞌAtua⌋ ki te nuꞌu o Rāmako, ki oti ki te nuꞌu o Hērutarema ꞌe o te kona taꞌatoꞌa o Hūrea, ꞌe, takoꞌa, ki te nuꞌu taꞌe he hūrio. He kī e au mo haka tapa mai roto i te meꞌe taꞌe tano, mo huri o te manaꞌu ki te ꞌAtua, ꞌe mo aŋa i te meꞌe mo takeꞌa e te nuꞌu he aŋi mau ꞌā ko ⌊huri ꞌana te rāua manaꞌu ki a ia⌋.

Aŋa o te ꞌĀpōtoro 9:15

He kī haka ꞌou e Ietū: —Ka oho nō koe. Ko haꞌataꞌa ꞌana e au i te taŋata era mo vānaŋa o ruŋa i a au ki te nuꞌu o te rua henua, ki te rāua ꞌariki ꞌe pē ira takoꞌa ꞌā ki te itaraera.

Rōmano 1:9

A au e aŋa nei ki te ꞌAtua hai māhatu ꞌi te haka ꞌite iŋa ki te taŋata i te roŋo riva-riva o ruŋa o tāꞌana Poki. ꞌE he ꞌAtua te mataꞌite: e manaꞌu rō atu ꞌana a au ki a kōrua,

Rōmano 10:14

Te meꞌe nō, ¿pē hē ia ana ani te nuꞌu mo ai ꞌina he haka moe i te rāua manaꞌu ꞌi ruŋa i a Ietū? ꞌE ¿pē hē ana haka moe i te rāua manaꞌu ꞌi ruŋa mo ai ꞌina he ꞌite e tahi meꞌe o ruŋa i a ia? ꞌE ¿pē hē ana ꞌite o ruŋa i a ia, mo ai ꞌina he taŋata haka ꞌite o ruŋa?

Rōmano 11:13

E ai rō ꞌana tāꞌaku meꞌe mo kī atu ki a kōrua ki te nuꞌu taꞌe he hūrio: te ꞌAtua ko haꞌataꞌa ꞌā i a au pa he ⌊ꞌāpōtoro⌋ mo haka ꞌite atu ki a kōrua i tāꞌana vānaŋa. ꞌO ira a au e aŋa riva-riva nei i te aŋa nui-nui nei,

Rōmano 15:16

mo tāvini ki a Ietū Kiritō mo te riva-riva o te nuꞌu taꞌatoꞌa taꞌe he hūrio. Tāꞌaku aŋa pa he aŋa ꞌā o te ⌊oromatuꞌa⌋: he haka ꞌite ki te nuꞌu taꞌe he hūrio i te ⌊roŋo riva-riva o te ꞌAtua⌋, ki haka moe ai a rāua i te manaꞌu ꞌi ruŋa i a Ietū. Pē ira ka ai ena a rāua pa he meꞌe mo vaꞌai ki te ꞌAtua mo tōꞌona koa haka maꞌitaki e te Vārua Maitai.

Rōmano 9:1

Pa he taŋata haka moe au i te manaꞌu ꞌi ruŋa i a Ietū Kiritō, he parautiꞌa tāꞌaku meꞌe nei ka kī atu ena, taꞌe he reo-reo. O te ⌊Vārua Maitai⌋ te ꞌata haka aŋi-aŋi mai he parautiꞌa mau ꞌā tōꞌoku manaꞌu:

1 Kōrinto 9:1

Taꞌe a au he ꞌekaravo o te manaꞌu taŋata. A au he ꞌāpōtoro. Ko takeꞌa ꞌana, paꞌi, e au i a Ietū, Pūꞌoko Haka Tere o tātou, ꞌe hai aŋa nei i haka moe ai kōrua i te manaꞌu ꞌi ruŋa i a Ietū.

2 Kōrinto 11:31

Te ꞌAtua, Matuꞌa o te tātou Pūꞌoko Haka Tere ko Ietū, kope ki a ia ana haꞌahana-hana ꞌātā ki te hora hopeꞌa, ko ꞌite ꞌā e kī atu ꞌana a au i te parautiꞌa.

Karatia 1:20

ꞌE ꞌī a au he kī atu ꞌi muꞌa i te ꞌAtua: te meꞌe taꞌatoꞌa nei e au e pāpaꞌi atu ena he parautiꞌa.

Karatia 2:16

Ka ai atu pē ira, e ꞌite rō ꞌana e tātou ꞌina e tahi kope mo tano ki te mata o te ꞌAtua hai haꞌatura ki te haka tere iŋa ꞌa Mōtē. Hai haka moe mau nō i te manaꞌu ꞌi ruŋa i a Ietū ana tano te taŋata ki te mata o te ꞌAtua. ꞌO ira a mātou, te hūrio, e haka moe ena i te manaꞌu ꞌi ruŋa i a Ietū, mo tano o mātou ki te mata o te ꞌAtua hai meꞌe nei ꞌe taꞌe ꞌō hai haꞌatura ki te haka tere iŋa ꞌa Mōtē. ꞌIna, paꞌi, e tahi taŋata mo tano ki a ia hai haꞌatura ki rā haka tere iŋa.

Karatia 2:9

I aŋi-aŋi era e ⌊Tanatiako⌋, e Pētero ꞌe e ⌊Iovani⌋, pūꞌoko haka tere o te nuꞌu haka moe i te manaꞌu ꞌi ruŋa i a Ietū o Hērutarema pē nei ē: o te ꞌAtua mau ꞌana i vaꞌai mai, hai riva rahi ōꞌona, i te aŋa nei ki a au, he vaꞌai mai ia e kuā Pētero i te rāua rima mo haka takeꞌa mai ki a māua ko Verenāvē: a māua he hokorua takoꞌa o rāua ꞌi te aŋa o te ꞌAtua, ꞌe e tano rō ꞌana ki a rāua mo oho o māua mo aŋa ꞌi roto o te nuꞌu taꞌe he hūrio, ꞌe ko rāua mo haka ꞌite mo oho ki te nuꞌu hūrio.

Karatia 3:9

Pē ira te nuꞌu taꞌatoꞌa haka moe i te manaꞌu ꞌi ruŋa i a Ietū, he haꞌamaitai takoꞌa e te ꞌAtua pa he haꞌamaitai iŋa era ꞌā i a ꞌAparahama.

2 Timoteo 1:11

Te ꞌAtua ko kī mai ꞌana mo haka ꞌite ōꞌoku i te roŋo nei, ꞌe ko uŋa ꞌana i a au pa he ꞌāpōtoro ꞌe pa he maꞌori.

2 Pētero 2:5

ꞌE ꞌina kai haka rehu takoꞌa i te hara o te nuꞌu aŋa i te meꞌe taꞌe tano o muꞌa ꞌā. Te meꞌe i aŋa: he uŋa mai ki ruŋa i te ao nei i te ꞌua taꞌe mo mahana haka ꞌou ꞌātā ki te roa mo emu o te meꞌe taꞌatoꞌa, ꞌe te taŋata i haka ora ko Nōē, he kope haka ꞌite o ruŋa i te noho iŋa tī-tika ki te mata o te ꞌAtua, ꞌe he nuꞌu haka ꞌou hoko hitu.