1 Tētārōnika 5:5 - Rapa Nui

⁵ A tātou, te nuꞌu ⌊haka moe i te manaꞌu⌋ ꞌi ruŋa i a Ietū, he nuꞌu o te māꞌeha, ꞌe o te ꞌōtea, te auraꞌa, he nuꞌu aŋa i te meꞌe riva-riva, taꞌe he nuꞌu o te pōhāhā ꞌe o te pō aŋa i te meꞌe taꞌe tano.

1 Tētārōnika 5:5 ပူးပေါင်းရင်းမြစ်များ

Ruka 16:8

»I ꞌite era i rā meꞌe e tū taŋata ꞌono era he kī: “¡Ko te mārama-rama i te kope aŋa i te meꞌe tuꞌu pē rā!”». He kī haka ꞌou e Ietū: «He aŋi ꞌā, ꞌata hau ꞌi te ꞌite te nuꞌu taꞌe ⌊haka moe i te manaꞌu⌋ ꞌi ruŋa i te ꞌAtua mo aŋa i te meꞌe mo te rāua riva-riva ki te nuꞌu haka moe i te manaꞌu ꞌi ruŋa i te ꞌAtua.

Iovani 12:36

Ka haka moe kōrua i te manaꞌu ꞌi ruŋa i te mōrī nei mai taꞌe ŋaro, ki ai ai a kōrua o nei mōrī. I oti era a Ietū i te kī i te ŋā meꞌe nei, he oho he haka ŋaro ꞌo takeꞌa e rā nuꞌu.

Aŋa o te ꞌĀpōtoro 26:18

Taꞌa meꞌe ka aŋa ena he haka ꞌara i te rāua mata, ki eꞌa ai mai roto i te pōhāhā ki roto i te māꞌeha, ꞌe mai te rima o Rukifero ki te rima o te ꞌAtua, ki haka moe ai i te rāua manaꞌu ꞌi ruŋa i a au. Pē ira te ꞌAtua ana haka kore i te rāua hara, ꞌe he oꞌo a rāua ki roto i te nūnaꞌa taŋata haꞌataꞌa e te ꞌAtua māꞌana”.

Ēfeto 5:8

ꞌI muꞌa ꞌā e noho era kōrua ꞌi roto i te pōhāhā. ꞌE hora nei, ꞌi te ai o kōrua ꞌa Ietū Kiritō, ꞌi roto i te māꞌeha kōrua. ꞌO ira, e haka tere kōrua pa he nuꞌu noho ꞌi roto i te māꞌeha.

1 Tētārōnika 5:8

A tātou, te nuꞌu o te ꞌōtea, e ꞌite mo hāito, paurō te mahana, i te tātou meꞌe kī ꞌe i te tātou meꞌe aŋa. ꞌE pa he hāpaꞌo iŋa o te vaꞌehau i a ia hai kahu aŋa hai ꞌaurī, pē ira takoꞌa ꞌana a tātou ana hāpaꞌo i a tātou hai haka moe i te manaꞌu ꞌi ruŋa i a Ietū ꞌe hai haŋa ki a ia ꞌe ki te rua, ꞌo aŋa mai e Rukifero i te meꞌe mo haka hara i a tātou. ꞌE pa he hāpaꞌo iŋa o te vaꞌehau i tōꞌona pūꞌoko e puꞌa i te haꞌu aŋa hai ꞌaurī, pē ira takoꞌa tātou ana hāpaꞌo i a tātou hai maꞌu hio-hio ꞌi roto i a tātou i te parautiꞌa: a Ietū e haka eꞌa rō i a tātou mai roto i te ūtuꞌa o te hara ꞌe e vaꞌai rō mai i te ora ꞌāpī ꞌina he hopeꞌa raꞌa.

1 Iovani 2:8

ꞌE, ka ai atu pē ira, e haka ꞌite atu ena ꞌi nei roŋo pa he meꞌe ꞌāpī. Ko takeꞌa ꞌā, paꞌi, ꞌi ruŋa i a Ietū ꞌe ꞌi ruŋa i a kōrua. Hai haꞌatura ki te roŋo nei he ŋaro he oho te meꞌe he pōhāhā, ꞌe he māꞌeha he oho te hāpī parautiꞌa o te ꞌAtua pa he mōrī.