1 Tētārōnika 5:23 - Rapa Nui

²³ Mo te ꞌAtua, kope vaꞌai mai i te haumārū, e haka maꞌitaki i te kōrua huru ꞌe i te kōrua noho iŋa ki te roa ꞌina e tahi hara mo tuhi atu. ꞌE māꞌana takoꞌa e hāpaꞌo i a kōrua ꞌina e tahi hape, mai te hakari ki te vārua, ꞌātā ki te hoki iŋa mai o te tātou Pūꞌoko Haka Tere ko Ietū Kiritō.

1 Tētārōnika 5:23 ပူးပေါင်းရင်းမြစ်များ

Ruka 1:46

He kī ia e Māria: «Hai māhatu a au e haꞌahana-hana nei i te ꞌAtua;

Iovani 17:19

Mo te riva-riva o rāua, he haꞌataꞌa a au i a au mo tāvini atu ki a koe, ki haꞌataꞌa parautiꞌa atu ai a rāua mo tāvini atu ki a koe.

Aŋa o te ꞌĀpōtoro 20:32

»Hora nei, e kuā taina ē, he vaꞌai a au i a kōrua ki te rima o te ꞌAtua mo hāpaꞌo, ꞌe he ani atu mo maꞌu mo oho nō kōrua i te roŋo hāpī atu era e au o ruŋa i te riva rahi o te ꞌAtua. ꞌI te roŋo nei te pūai mo ꞌata haka hio-hio i te kōrua manaꞌu ꞌi ruŋa i a Ietū ki ravaꞌa ai i te meꞌe taꞌatoꞌa hōrea e te ꞌAtua mo te nuꞌu haꞌataꞌa māꞌana.

Aŋa o te ꞌĀpōtoro 26:18

Taꞌa meꞌe ka aŋa ena he haka ꞌara i te rāua mata, ki eꞌa ai mai roto i te pōhāhā ki roto i te māꞌeha, ꞌe mai te rima o Rukifero ki te rima o te ꞌAtua, ki haka moe ai i te rāua manaꞌu ꞌi ruŋa i a au. Pē ira te ꞌAtua ana haka kore i te rāua hara, ꞌe he oꞌo a rāua ki roto i te nūnaꞌa taŋata haꞌataꞌa e te ꞌAtua māꞌana”.

Rōmano 15:13

Mo te ꞌAtua haka aŋi-aŋi mai e haka tano rō ꞌana i tāꞌana hōrea e ꞌata haka koa ꞌe e ꞌata haka haumārū atu i a kōrua i te nuꞌu ⌊haka moe i te manaꞌu⌋ ꞌi ruŋa i a ia, ꞌe māꞌana takoꞌa e ꞌata haka aŋi-aŋi atu, hai pūai o te ⌊Vārua Maitai⌋, e ko taꞌe aŋa a ia i tāꞌana meꞌe hōrea.

Rōmano 15:33

Ka noho riva-riva kōrua, ꞌe mo te ꞌAtua, kope vaꞌai i te haumārū, e hokorua atu i a kōrua taꞌatoꞌa. ⌊ꞌĀmene⌋.

Rōmano 15:5

O te ꞌAtua, vaꞌai i te ꞌite mo haꞌaoromaꞌi i te ꞌati ꞌe i te pūai mo haka hio-hio i te tātou manaꞌu, te hāꞌūꞌū atu i a kōrua mo noho ꞌi roto i te haumārū, pa he nuꞌu te rāua noho iŋa pē Ietū Kiritō ꞌā,

Rōmano 16:20

Pē ira e ko roa he toꞌo mai e te ꞌAtua, vaꞌai i te haumārū, he haka hēpiꞌi i a Rukifero ꞌi raro i te kōrua vaꞌe. Ka ai ꞌi ruŋa i a kōrua te riva rahi o Ietū, he Pūꞌoko Haka Tere o tātou.

1 Kōrinto 1:30

Hai ia, paꞌi, e ai nei tātou ꞌa Ietū Kiritō. ꞌE hai Ietū Kiritō e haka tere nei a tātou hai manaꞌu ꞌAtua ꞌe e tano nei ki tōꞌona mata. Hai ia takoꞌa e ai nei tātou he nuꞌu haꞌataꞌa māꞌana ꞌina e tahi hara ꞌe he nuꞌu eꞌa mai roto i te pūai o te hara.

1 Kōrinto 14:33

Te ꞌAtua, paꞌi, taꞌe he ꞌAtua o te meꞌe mira-mira; tāꞌana meꞌe haŋa he meꞌe tī-tika ꞌe he haumārū. ꞌI te hora taka-taka mo haꞌamuri ki te ꞌAtua, ꞌina ko haꞌatiꞌa i te ŋā viꞌe mo vānaŋa. Pē ira te haka tere iŋa o te nūnaꞌa taŋata taꞌatoꞌa haka moe i te manaꞌu ꞌi ruŋa i a Ietū. Te ŋā viꞌe e haꞌatura ki te rāua kenu, pa he meꞌe hāꞌaki ꞌi ruŋa i te ⌊haka tere iŋa ꞌa Mōtē⌋.

2 Kōrinto 5:19

Hai mate era, paꞌi, o Ietū Kiritō ꞌi ruŋa i te tātaurō i aŋa ai e te ꞌAtua i te rāveꞌa mo haka riva-riva i te taŋata ki a ia ꞌe mo taꞌe tapa atu i te rāua hara. ꞌE ki a mātou i vaꞌai mai ai i te aŋa he haka ꞌite he oho i te roŋo nei.

Fīripo 1:10

ki aŋa ki oho ai kōrua i te meꞌe riva-riva mau nō. Pē ira he tano te kōrua noho iŋa ki te mata o te ꞌAtua, ꞌe he oho mau rō ꞌai kōrua pē ira ꞌina e tahi hape ꞌātā ki te hoki iŋa mai o Ietū.

Fīripo 1:6

O te ꞌAtua, paꞌi, i haꞌamata i aŋa i te meꞌe riva-riva ꞌi roto i a kōrua ꞌi te hora haka moe o kōrua i te manaꞌu ꞌi ruŋa i a Ietū. ꞌE, ko ꞌite riva-riva ꞌana e au he aŋa he oho rō ꞌai i nei aŋa ꞌātā ka oti rō ꞌi te mahana o te hoki iŋa mai o Ietū Kiritō.

Fīripo 4:9

E aŋa tahi kōrua i te meꞌe hāpī atu e au, he meꞌe ŋaroꞌa ꞌe takeꞌa era kōrua mai i a au. Pē ira he hokorua atu e te ꞌAtua vaꞌai mai i te haumārū.

Kōrosa 1:22

ꞌE hora nei, te ꞌAtua ko haka riva-riva haka ꞌou ꞌana i a kōrua ki a ia hai mate iŋa era o Ietū Kiritō pa he taŋata. Te meꞌe nei i aŋa ai ki tuꞌu ai a kōrua ki muꞌa o te ꞌAtua e maꞌitaki rō ꞌā ꞌina e tahi hara, ꞌe ꞌina e tahi hape mo tuhi atu.

1 Tētārōnika 2:19

Ka ai atu pē ira, ko te haŋa iŋa ꞌana a mātou mo hoki atu, he ꞌite o mātou he haka moe he oho mau rō ꞌai kōrua i te manaꞌu ꞌi ruŋa i a Ietū. Te meꞌe nei he koa e tahi mo mātou. ꞌE ꞌi te hora o tātou ka tuꞌu ena ki muꞌa o te tātou Pūꞌoko Haka Tere ko Ietū Kiritō, ꞌi te mahana o tōꞌona hoki iŋa mai, he koa a mātou mo kōrua ꞌe mo te hauhaꞌa o te mātou aŋa ꞌi roto i a kōrua.

1 Tētārōnika 3:11

E ani nei ki te ꞌAtua, he Matuꞌa o tātou, ꞌe ki te tātou Pūꞌoko Haka Tere ko Ietū Kiritō, mo hāꞌūꞌū mai, mo tuꞌu atu ki a kōrua ena.

1 Tētārōnika 3:13

ꞌe, takoꞌa, mo hāꞌūꞌū i a kōrua mo ꞌata haka hio-hio i te manaꞌu ꞌi ruŋa i a ia, ꞌo ai tāꞌue e tahi meꞌe mo tuhi iŋa atu e te ꞌAtua ꞌi te hora ka tuꞌu ena ki muꞌa i a ia ꞌi te mahana o te hoki iŋa mai o te tātou Pūꞌoko Haka Tere ko Ietū koia ko te nuꞌu taꞌatoꞌa haꞌataꞌa māꞌana. ⌊ꞌĀmene⌋.

1 Tētārōnika 4:3

Te haŋa o te ꞌAtua: he ai o te kōrua noho iŋa ꞌina e tahi hara, he taꞌe moe e tahi kope i te viꞌe ꞌe i te taŋata taꞌe he viꞌe ꞌo he kenu ꞌāꞌana,

1 Tētārōnika 5:22

ꞌE e haka tapa kōrua mai te meꞌe taꞌe tano taꞌatoꞌa.

2 Tētārōnika 3:16

ꞌE mo te tātou Pūꞌoko Haka Tere, i a ia te haumārū, e vaꞌai atu ki a kōrua i te haumārū ꞌi te taꞌatoꞌa nō hora. Ka ai a ia ꞌi muri i a kōrua taꞌatoꞌa.

ꞌEvereo 13:20

Mo te ꞌAtua vaꞌai i te haumārū, haka ora mai te mate i te tātou Pūꞌoko Haka Tere ko Ietū Kiritō, kope riva-riva hāpaꞌo māmoe, tāpaꞌo i te haka tere iŋa ꞌina he hopeꞌa raꞌa o te ꞌAtua ananake ko te taŋata hai toto era ōꞌona,

ꞌEvereo 2:11

Te kope ꞌāꞌana te haka tano i te taŋata ki te mata o te ꞌAtua ꞌe te nuꞌu haka kore e ia i te hape o tū Matuꞌa tahi ꞌana a rāua. ꞌO ira te Poki o te ꞌAtua e taꞌe haꞌamā ena mo kī he taina rāua ōꞌona.

ꞌEvereo 4:12

Te vānaŋa o te ꞌAtua vānaŋa ora ꞌe vānaŋa pūai. ꞌAta hau rō atu ꞌi te kaꞌi-kaꞌi ki te hoe kaꞌi-kaꞌi ararua pāꞌiŋa. E oꞌo ena ki roto nui atu era o te māhatu ꞌe o te vārua, ꞌe ꞌātā ki te kona hopeꞌa mau era o te manaꞌu taŋata, ꞌe ꞌāꞌana te haka ꞌite i te manaꞌu ꞌe i te meꞌe haŋa mau o te māhatu.

Tanatiako 1:4

E haꞌaoromaꞌi e oho kōrua hai pūai ꞌi te ꞌati, ki ai ai kōrua he nuꞌu haka moe parautiꞌa i te manaꞌu ꞌi ruŋa i te ꞌAtua ꞌe nuꞌu aŋa i te meꞌe tī-tika ki tōꞌona mata ki te roa ꞌina e tahi hape mo tuhi iŋa atu.

1 Pētero 1:2

Te manaꞌu o te ꞌAtua Matuꞌa i haꞌataꞌa ai i a kōrua: mo haka riro i a kōrua he nuꞌu ꞌina e tahi hara haꞌataꞌa māꞌana hai Vārua Maitai ꞌe haꞌatura ki a Ietū ꞌi te haka kore e te ꞌAtua i te kōrua hara hai toto tehe era o Ietū ꞌi ruŋa i te tātaurō. Ka rahi ka oho nō te riva rahi ꞌe te haumārū o te ꞌAtua ꞌi ruŋa i a kōrua.

1 Pētero 5:10

ꞌE ki oti i te haꞌaoromaꞌi tahi i te ꞌati topa atu ꞌi ruŋa i a kōrua, he meꞌe e ko roa rahi, he haka riro e te ꞌAtua i a kōrua he nuꞌu ꞌina e tahi hape, e hio-hio rō ꞌana te manaꞌu ꞌi ruŋa i a ia, nuꞌu pūai mo haꞌaoromaꞌi, ꞌe nuꞌu noho, ki te hora hopeꞌa, ꞌi te ara o te ꞌAtua. A ia, paꞌi, he ꞌAtua kī mai, ꞌi tōꞌona riva rahi, mo noho o tātou ꞌi muri i a ia ꞌina he hopeꞌa raꞌa ꞌi roto i tōꞌona nui-nui ꞌana-ꞌana hai haka moe o tātou i te manaꞌu ꞌi ruŋa i a Ietū Kiritō,

2 Pētero 3:14

ꞌO ira, e te taina ē, e tiaki ꞌana kōrua ki nā meꞌe, e uꞌi te kōrua noho iŋa, ꞌo ai te hape mo tuhi iŋa atu, ꞌe e ai te haumārū ꞌi roto i a kōrua, ki koa ai te tātou Pūꞌoko Haka Tere ko Ietū Kiritō ꞌi te hora o tōꞌona hoki iŋa mai.

Hura 1:1

A au, a Hura, tāvini o Ietū Kiritō, ꞌe taina o ⌊Tanatiako⌋, he ꞌaroha atu ki a kōrua ki te nuꞌu haŋa e te ꞌAtua Matuꞌa ꞌe haꞌataꞌa māꞌana, he nuꞌu hāpaꞌo ꞌa Ietū Kiritō.

Hura 1:24

Ki haꞌahana-hana tahi tātou ki te ꞌAtua, kope haka eꞌa i a tātou mai roto i te ūtuꞌa o te hara ꞌe vaꞌai mai i te ora ꞌāpī ꞌina he hopeꞌa raꞌa hai Ietū Kiritō, he Pūꞌoko Haka Tere o tātou. I te ꞌAtua mau nō te pūai mo hāpaꞌo i a tātou ꞌo oꞌo ki roto i te hara, ꞌe mo haka māroa i a tātou pe muꞌa ka oho ena ꞌi muꞌa i a ia ꞌi roto i tōꞌona pūai ꞌana-ꞌana e koa rō ꞌana ꞌe ꞌina e tahi hape. I a ia mau nō te nui-nui, te pūai, te parau o te meꞌe taꞌatoꞌa ꞌi muꞌa ꞌā, ꞌi te hora nei ꞌe ꞌina he hopeꞌa raꞌa. ⌊ꞌĀmene⌋.