1 Tētārōnika 4:17 - Rapa Nui

¹⁷ ꞌE a tātou, te nuꞌu e ora nō ꞌā ananake ko te nuꞌu nei he maꞌu he iri ꞌi ruŋa i te raŋi tea-tea mo piri ki a Ietū ꞌi roto i te tokerau. Pē ira a tātou ka noho ena ꞌi muri i a ia ꞌina he hopeꞌa raꞌa.

1 Tētārōnika 4:17 ပူးပေါင်းရင်းမြစ်များ

Māteo 26:64

He pāhono e Ietū: —Nā e koe ko kī ꞌā. ꞌE ꞌī a au he kī takoꞌa atu: e takeꞌa rō e kōrua i te Poki o te taŋata e noho rō ꞌā ꞌi te pāꞌiŋa mataꞌu o te ꞌAtua, i a ia te pūai taꞌatoꞌa, ꞌe i tōꞌona topa iŋa mai ꞌi ruŋa i te raŋi e tahi.

Marko 14:62

He pāhono e Ietū: —ꞌĒ-ē, ko au. ꞌE a kōrua e takeꞌa rō i te Poki o te taŋata e noho rō ꞌana ꞌi te pāꞌiŋa mataꞌu o te ꞌAtua ꞌe i tōꞌona topa iŋa mai ꞌi ruŋa i te raŋi e tahi.

Iovani 12:26

Te kope haŋa mo aŋa mai ki a au ka oho mai ꞌi muri i a au. ꞌE ꞌi te kona era ꞌi ira a au, ꞌi ira takoꞌa a ia. Te kope aŋa mai ki a au he haka nui-nui e tōꞌoku Matuꞌa.

Iovani 14:3

Ki oho au ki haka riva-riva, he hoki mai a au he toꞌo i a kōrua mo noho tahi o tātou ꞌi te kona era ꞌi ira a au.

Iovani 17:24

»E Koro, ꞌāꞌau a rāua i vaꞌai mai, ꞌe e haŋa rō ꞌana a au mo noho atu o rāua ꞌi te kona ꞌi ira a au ka noho nei, ki takeꞌa ai i te pūai ꞌe i te nui-nui vaꞌai mai e koe, he haŋa mai ōꞌou mai te hora era ꞌā kai aŋa ꞌana i te ao.

Aŋa o te ꞌĀpōtoro 1:9

I kī era i te meꞌe nei, he iri he oho a Ietū a ruŋa, e uꞌi nō ꞌā e tū nuꞌu era, he viri e te raŋi e tahi ꞌe he ŋaro rō ꞌai.

Aŋa o te ꞌĀpōtoro 8:39

I eꞌa era mai roto i te vai, he toꞌo e te Vārua o te ꞌAtua i a Feripe, ꞌe ꞌina kai takeꞌa haka ꞌou e tū taŋata era. Rā kope, ko toꞌo atu ꞌā te koa, he eꞌa he oho rō ꞌai.

1 Kōrinto 15:52

Te meꞌe nei ka topa ena ꞌi te hora o te puhi iŋa hopeꞌa o te koneta, ꞌe te hōrou pa he mine iŋa ena ꞌā o te mata. He puhi te koneta, te nuꞌu mate he ora tahi mai, ꞌe ꞌina e ko mate haka ꞌou. ꞌE a tātou te nuꞌu ora o rā hora, he mono te hakari,

2 Kōrinto 5:8

ꞌE ꞌina he ꞌaka-ꞌaka te mātou manaꞌu ꞌi ruŋa i a ia. Ka ai atu pē ira, te meꞌe haŋa mau o mātou he noho o mātou ꞌi te kona era ꞌi ira te tātou Pūꞌoko Haka Tere.

Fīripo 1:23

E tātake rō ꞌana, paꞌi, tōꞌoku manaꞌu o ruŋa i te ŋā meꞌe nei ararua. E haŋa rō ꞌana, paꞌi, a au mo mate mo iri ōꞌoku ki muri i a Ietū, he meꞌe ꞌata riva-riva mōꞌoku.

1 Tētārōnika 3:13

ꞌe, takoꞌa, mo hāꞌūꞌū i a kōrua mo ꞌata haka hio-hio i te manaꞌu ꞌi ruŋa i a ia, ꞌo ai tāꞌue e tahi meꞌe mo tuhi iŋa atu e te ꞌAtua ꞌi te hora ka tuꞌu ena ki muꞌa i a ia ꞌi te mahana o te hoki iŋa mai o te tātou Pūꞌoko Haka Tere ko Ietū koia ko te nuꞌu taꞌatoꞌa haꞌataꞌa māꞌana. ⌊ꞌĀmene⌋.

1 Tētārōnika 4:15

ꞌO ira mātou e kī atu ena, pa he hāpī o te tātou Pūꞌoko Haka Tere: a tātou, te nuꞌu e ora nō ꞌā ꞌi te hora o te hoki iŋa mai o Ietū, e ko iri ꞌi raꞌe ki te nuꞌu mate.

1 Tētārōnika 4:18

E haka koa kōrua i a kōrua ꞌā hai ŋā vānaŋa nei.

1 Tētārōnika 5:10

A ia i mate ai mo tātou, mo noho o tātou ꞌi muri i a ia, ka ai atu ꞌi te hora era o tōꞌona hoki iŋa mai e ora rō ꞌā ꞌo e mate rō ꞌā a tātou.

2 Pētero 3:13

Ka ai atu pē ira, a tātou ꞌī e tiaki ꞌana ki te henua ꞌe ki te raŋi ꞌāpī hōrea mai era e te ꞌAtua, ꞌe te nuꞌu mau nō ka noho era ꞌi ira he nuꞌu aŋa i te meꞌe tī-tika ki te mata o te ꞌAtua.

Meꞌe Haka Takeꞌa 1:7

ꞌIna ko rehu: ¡ꞌI ruŋa i te raŋi tea-tea ka oho mai ena a Ietū! Taꞌatoꞌa nō ka takeꞌa ena, ꞌātā te nuꞌu ꞌo-ꞌoka era i a ia. Te taŋata taꞌatoꞌa o te ao taꞌe haka moe i te manaꞌu ꞌi ruŋa i a ia e ŋaroꞌa rō i te māui-ui ki roto i te ivi o ruŋa i a ia. He aŋi mau ꞌā, pē ira ka topa ena.

Meꞌe Haka Takeꞌa 11:12

He kī ia e te reꞌo pūai e tahi mai te raŋi ki rā ŋā mataꞌite: «¡Ka iri mai kōrua!». He iri ararua a ruŋa i te raŋi tea-tea e tahi, ꞌe he takeꞌa e tū nuꞌu taꞌe haŋa era ki a rāua.

Meꞌe Haka Takeꞌa 12:5

He poki tane te poki i poreko, poki māꞌana e haka tere i te taŋata taꞌatoꞌa o te ao hai pūai ꞌe ꞌina he nuꞌu mo rē ki a ia. I poreko era he toꞌo e te merahi i tū poki era, he maꞌu ki muꞌa o te ꞌAtua ꞌe ki muꞌa o tōꞌona pepe noho ꞌariki.