1 Tētārōnika 3:2 - Rapa Nui

² ꞌe mo uŋa atu i te tātou taina ko Timoteo mo uꞌi i a kōrua. A ia he taŋata hāꞌūꞌū ꞌi te aŋa he haka ꞌite i te ⌊roŋo riva-riva o ruŋa i a Ietū Kiritō⌋. I uŋa atu ai e mātou mo ꞌata haka pūai ꞌe mo ꞌata haka haŋu i te kōrua haka moe iŋa i te manaꞌu ꞌi ruŋa i a Ietū,

1 Tētārōnika 3:2 ပူးပေါင်းရင်းမြစ်များ

Aŋa o te ꞌĀpōtoro 16:1

He oho ia a Pauro ki Reve ꞌe mai ira ki Rītara. ꞌI Rītara i māhani ai ki te taŋata ⌊haka moe i te manaꞌu⌋ ꞌi ruŋa i a Ietū te ꞌīŋoa ko Timoteo. A ia he poki o te viꞌe ⌊hūrio⌋ haka moe i te manaꞌu ꞌi ruŋa i a Ietū ꞌe tōꞌona matuꞌa tane he ⌊kirieko⌋.

Aŋa o te ꞌĀpōtoro 16:5

ꞌE te nuꞌu haka moe i te manaꞌu ꞌi ruŋa i a Ietū o rā ŋā kona ia, pe te ꞌata hio-hio nō te manaꞌu, ꞌe paurō te mahana pe te ꞌata rahi nō e oho era.

Aŋa o te ꞌĀpōtoro 18:5

I tuꞌu era a Tira ararua ko Timoteo mai Mātērōnia, he noho mau rō ꞌai a Pauro he haka ꞌite i te ⌊roŋo riva-riva o te ꞌAtua⌋ ꞌe he haka aŋi-aŋi ki te hūrio o Kōrinto: a Ietū he ⌊Kiritō⌋.

Rōmano 16:21

ꞌĪ e ꞌaroha atu ena a Timoteo, hokorua aŋa ōꞌoku, pē ira takoꞌa ꞌana tōꞌoku hau a Rūtio, a Hātō, ꞌe a Tōtipataro.

1 Kōrinto 3:10

Hai riva rahi o te ꞌAtua, ꞌāꞌaku i haꞌamata i hāpī atu ki a kōrua i te parau ꞌāpī riva-riva o ruŋa i a Ietū Kiritō; ꞌe, takoꞌa, i hāꞌūꞌū i te nuꞌu raꞌe o kōrua mo haka moe i te rāua manaꞌu ꞌi ruŋa i a Ietū, pa he kope ꞌāꞌana i aŋa i te mekerā ꞌi ruŋa ka haka tuꞌu era te hakari o te hare. ꞌE, hora nei, o te tētahi te hāpī te oho atu o ruŋa i a Ietū mo haka hio-hio o kōrua ꞌi te ara o te ꞌAtua, pa he nuꞌu o rāua te haka tuꞌu i te hakari o te hare ꞌi ruŋa i te mekerā. Te meꞌe nō, e uꞌi e aŋa riva-riva te hare.

1 Kōrinto 4:17

Mo te ŋā meꞌe nei i uŋa atu ena au i a Timoteo mo hāꞌūꞌū atu i a kōrua. A ia pa he poki haŋa rahi ꞌāꞌaku taꞌe haka rē ki te hora hopeꞌa i te aŋa o te ꞌAtua. Māꞌana e haka manaꞌu atu i tōꞌoku haka tere iŋa pa he kope haka moe i te manaꞌu ꞌi ruŋa i a Ietū Kiritō. Tōꞌoku haka tere iŋa, paꞌi, e tano rō ꞌā ki tāꞌaku meꞌe mau nei ꞌā e hāpī e oho nei ki te nūnaꞌa taŋata haka moe i te rāua manaꞌu ꞌi ruŋa i a Ietū o te kona taꞌatoꞌa vari ōꞌoku.

2 Kōrinto 1:1

A au a Pauro, ⌊ꞌāpōtoro⌋ ꞌa Ietū Kiritō hai haŋa o te ꞌAtua, ꞌe te tātou taina nei ko Timoteo he ꞌaroha atu ki a kōrua ki te nūnaꞌa taŋata ⌊haka moe i te manaꞌu⌋ ꞌi ruŋa i a Ietū o Kōrinto, ꞌe ki te tētahi atu taina o te ŋā kona taꞌatoꞌa ena o Ākāia.

2 Kōrinto 1:19

A Ietū Kiritō, Poki era o te ꞌAtua, haka ꞌite atu era e au, e Tira ꞌe e Timoteo, kope taꞌe kī «ꞌē-ē» mo ꞌina, ꞌe «ꞌina» mo ꞌē-ē. A ia he ꞌē-ē mau ꞌā o te ꞌAtua;

2 Kōrinto 2:12

I tuꞌu era a au ki Toroare, meꞌe rahi te ꞌōpani i mātaki mai e te tātou Pūꞌoko Haka Tere mo haka ꞌite ōꞌoku ꞌi ira i te roŋo riva-riva o te Kiritō.

2 Kōrinto 2:13

ꞌE, ꞌi te taꞌe takeꞌa e au i te tātou taina era ko Tito, kai riva-riva a au mo noho ꞌi ira. He haka rē ia a au i te nuꞌu taina o ira ꞌe he eꞌa he oho rō ꞌai a au ki Mātērōnia.

2 Kōrinto 8:23

ꞌE o ruŋa i a Tito he kī atu a au: a ia he hokorua ōꞌoku ꞌe e aŋa nei a māua mo te kōrua riva-riva. ꞌE te ŋā taina haka ꞌou ena e rua o muri he nuꞌu moꞌa ꞌe haꞌatura ki te ⌊Kiritō⌋ uŋa atu e te nuꞌu haka moe i te manaꞌu ꞌi ruŋa i a Ietū o te ŋā kona nei.

Fīripo 1:25

ꞌI te aŋi-aŋi ōꞌoku kai oti ꞌā tāꞌaku aŋa ꞌi roto i a kōrua, he ꞌite e au ꞌina kai tano ꞌā tōꞌoku hora mo mate, ꞌe he noho atu a au mo hāꞌūꞌū mo ꞌata haka pūai i te kōrua haka moe iŋa i te manaꞌu ꞌi ruŋa i a Ietū ki ꞌata koa ai kōrua.

Kōrosa 1:1

A au, a Pauro, ⌊ꞌāpōtoro⌋ ꞌa Ietū Kiritō hai haŋa o te ꞌAtua, ꞌe te tātou taina ko Timoteo,

Kōrosa 1:7

Te meꞌe ena ꞌa Epafara, kope haŋa rahi o mātou aŋa takoꞌa ki te ꞌAtua, i hāpī atu. A ia he tāvini parautiꞌa ꞌa Ietū Kiritō.

Kōrosa 4:12

A Epafara, tāvini takoꞌa o Ietū Kiritō, ꞌī e ꞌaroha atu ena. A ia takoꞌa o te kona ena o kōrua, ꞌe te aŋa nō ꞌāꞌana he ani ki te ꞌAtua mo kōrua ꞌi roto i tāꞌana pure, mo haka hio-hio atu i te manaꞌu ꞌi ruŋa i a Ietū, ki aŋi-aŋi riva-riva ai e kōrua he aha te meꞌe haŋa o te ꞌAtua mo kōrua.

Kōrosa 4:9

ꞌE nā ꞌi muri i a ia i uŋa takoꞌa atu ena i a Onetimoro, he taina haŋa rahi o tātou ꞌite takoꞌa mo haka tano i tāꞌana meꞌe kī. A ia o te kona ena o kōrua. Mo rāua e ꞌaꞌamu atu i te meꞌe taꞌatoꞌa o nei.

1 Tētārōnika 3:13

ꞌe, takoꞌa, mo hāꞌūꞌū i a kōrua mo ꞌata haka hio-hio i te manaꞌu ꞌi ruŋa i a ia, ꞌo ai tāꞌue e tahi meꞌe mo tuhi iŋa atu e te ꞌAtua ꞌi te hora ka tuꞌu ena ki muꞌa i a ia ꞌi te mahana o te hoki iŋa mai o te tātou Pūꞌoko Haka Tere ko Ietū koia ko te nuꞌu taꞌatoꞌa haꞌataꞌa māꞌana. ⌊ꞌĀmene⌋.

1 Tētārōnika 3:5

ꞌO ira, ꞌi te niva-niva o mātou ꞌo te taꞌe ꞌite mai hoki e haka moe e oho nō ꞌana kōrua i te manaꞌu ꞌi ruŋa i a Ietū, i uŋa atu ai au i a Timoteo mo ꞌite mai o ruŋa i a kōrua. Tōꞌoku riꞌa-riꞌa: ꞌo hoa kōrua i te kōrua haka moe iŋa i te manaꞌu ꞌi ruŋa i a Ietū ka haka ꞌatu atu ena i a kōrua e Rukifero, ꞌe ꞌo māuꞌa te mātou aŋa ꞌi roto i a kōrua.

2 Tētārōnika 2:17

e haka pūai atu i te māhatu ꞌe e vaꞌai atu i te pūai mo aŋa ꞌe mo kī mo oho i te meꞌe riva-riva mau nō.