1 Pētero 3:18 - Rapa Nui

¹⁸ ꞌI te hara, paꞌi, o tātou i mate ai te Kiritō, ꞌe tōꞌona mate era mo te hora taꞌatoꞌa. ꞌIna e tahi ꞌāꞌana meꞌe taꞌe tano i aŋa ꞌe, mo haka riva-riva i a tātou ki te ꞌAtua, i ꞌamo ai i te ūtuꞌa o te mate mo tātou, nuꞌu aŋa i te meꞌe taꞌe tano. Ka ai atu i mate rō tōꞌona hakari taŋata, he vārua ōꞌona te meꞌe i taꞌe mate.

1 Pētero 3:18 ပူးပေါင်းရင်းမြစ်များ

Māteo 27:19

E noho nō ꞌā a Pirato ꞌi te kona ture, i tuꞌu ai te roŋo o tāꞌana viꞌe pē nei ē: «ꞌIna koe ko aŋa e tahi meꞌe ki te taŋata taꞌe hara ena. I moe vārua rō, paꞌi, a au o ruŋa i a ia ꞌi te pōꞌā ꞌe he huru kē rō atu ꞌai a au».

Māteo 27:24

I uꞌi era e Pirato ꞌina he rāveꞌa toe ꞌāꞌana mo haka huri i te rāua manaꞌu ꞌe pe te ꞌata pūai nō e pōŋeha era, he uŋa hai vai, he hopu i tōꞌona rima ꞌi muꞌa i te taꞌatoꞌa, ꞌe ꞌai ka kī: —Taꞌe ōꞌoku te hape o te mate o te taŋata nei; he meꞌe o kōrua.

Iovani 16:10

te kope ꞌina e tahi hape: ko au mau nei ꞌā ka iri nei ki te Matuꞌa, ꞌe e ko takeꞌa haka ꞌou e kōrua;

Aŋa o te ꞌĀpōtoro 22:14

»He kī haka ꞌou mai: “Te ꞌAtua o te tātou tupuna ko haꞌataꞌa ꞌā i a koe mo ꞌite ōꞌou i tāꞌana meꞌe haŋa, mo takeꞌa ōꞌou i a Ietū, kope tano ki tōꞌona mata, mo ŋaroꞌa i tōꞌona reꞌo,

Aŋa o te ꞌĀpōtoro 3:14

Kai haŋa a kōrua mo kī mo haka eꞌa i te taŋata aŋa i te meꞌe tī-tika ꞌe ꞌina he hara; he taŋata taparahi-taꞌata i haŋa e kōrua mo haka eꞌa.

Rōmano 4:25

vaꞌai era ki te mate mo te tātou hara, ꞌe haka ora haka ꞌou era mai te mate mo riro o tātou he taŋata tano ki te mata o te ꞌAtua.

Rōmano 5:2

ꞌE, takoꞌa, hai haka moe i te manaꞌu ꞌi ruŋa i a Ietū e ꞌite nei a tātou o ruŋa i te riva rahi o te ꞌAtua, ꞌe e noho nei ꞌi roto. E koa rahi nei a tātou ꞌo te ai, pe muꞌa ka oho ena, i a tātou te huru riva o te ꞌAtua, he roa haŋa ꞌāꞌana mo tātou.

Rōmano 8:11

Mo ai nā ꞌi roto i a kōrua te Vārua o te ꞌAtua haka ora i a Ietū mai te mate, māꞌana takoꞌa e haka ora i te kōrua hakari mai te mate hai Vārua ōꞌona ꞌi roto o kōrua.

Rōmano 8:3

Te ꞌAtua ko aŋa ꞌā i te meꞌe taꞌe ravaꞌa e te ⌊haka tere iŋa ꞌa Mōtē⌋ mo aŋa, ꞌi te pūai kore o te taŋata. Ko haka kore ꞌā i te pūai o te hara mai ruŋa i te taŋata hai uŋa mai i tāꞌana Poki pa he taŋata ꞌe pa he tūtia mo ꞌamo e tōꞌona hakari i te ūtuꞌa o te tātou hara.

2 Kōrinto 1:24

Taꞌe, paꞌi, i a mātou te kī pē hē kōrua ana maꞌu i te kōrua haka moe iŋa i te manaꞌu ꞌi ruŋa i a Ietū. Te meꞌe i a mātou he hāꞌūꞌū atu mo ꞌata koa o kōrua. E ꞌite rō ꞌana, paꞌi, mātou e pūai rō ꞌana te kōrua haka moe iŋa i te manaꞌu.

2 Kōrinto 13:4

Ka ai atu i tuꞌu rō a ia pa he kope ꞌina e tahi pūai hora veo era ꞌi ruŋa i te tātaurō, hora nei, hai pūai o te ꞌAtua Matuꞌa e ora ena. Pē ira ꞌana a mātou. E tuꞌu rō ꞌana pa he nuꞌu pūai kore, ꞌe, ꞌi te ai o mātou o te ꞌAtua, hai pūai ōꞌona mātou e ora nei mo tāvini atu ki a kōrua.

2 Kōrinto 5:21

Te Kiritō ꞌina e tahi meꞌe taꞌe tano i aŋa, ꞌe, ka ai atu pē ira, te ꞌAtua i haka ūtuꞌa rō i a ia mo te tātou hara, ki tano ai mo kī: a tātou, te nuꞌu haka moe i te manaꞌu ꞌi ruŋa i a Ietū, he nuꞌu tano ki tōꞌona mata.

Karatia 1:4

A Ietū i vaꞌai ai i a ia mo mate mo haka kore e te ꞌAtua i te tātou hara ꞌe mo haka eꞌa i a tātou mai roto i te noho iŋa taꞌe tano o te ao, ꞌi te meꞌe era ko haŋa ꞌā e te ꞌAtua, Matuꞌa o tātou.

Karatia 3:13

Te meꞌe nō, ko ꞌite ꞌā e tātou taꞌatoꞌa, ꞌina e tahi kope mo ravaꞌa i rā meꞌe. ꞌO ira ko tano riva-riva ꞌā mo ai ꞌi ruŋa i a tātou i te taŋata te ūtuꞌa kī e te ꞌAtua. ꞌE a Ietū i haka kore i te ūtuꞌa mai ruŋa i a tātou hai ꞌamo e ia i rā ūtuꞌa hora mate era ꞌi ruŋa i te tātaurō. E hāꞌaki rō ꞌana, paꞌi, ꞌi ruŋa i te Pāpaꞌi Moꞌa: «Te ūtuꞌa o te ꞌAtua ꞌi ruŋa i te kope mate ꞌi ruŋa i te tātaurō».

Ēfeto 3:12

ꞌE hora nei, ꞌo te ai o tātou ꞌa Ietū Kiritō ꞌe ꞌo te haka moe o tātou i te manaꞌu ꞌi ruŋa i a ia, e riva nei tātou mo pure mo haka hāhine ki te ꞌAtua ꞌina he riꞌa-riꞌa.

Tito 2:14

A Ietū, paꞌi, ko vaꞌai ꞌā i a ia ki te mate mo kore o te pūai o te hara mai ruŋa i a tātou, ki ai ai tātou he nuꞌu haꞌataꞌa māꞌana, ꞌina e tahi hara, ꞌe haŋa mo aŋa i te meꞌe riva-riva ki tōꞌona mata.

ꞌEvereo 10:10

ꞌO te aŋa e Ietū Kiritō i te meꞌe haŋa o te ꞌAtua hora vaꞌai era, e tahi vaꞌai iŋa mau nō mo te hora taꞌatoꞌa, i tōꞌona hakari mau era ꞌā pa he tūtia, i haka kore ai e te ꞌAtua i te tātou hara ꞌe i haꞌataꞌa ai i a tātou māꞌana pa he nuꞌu ꞌina e tahi hara.

ꞌEvereo 9:14

ꞌE mo ai o te pūai o te ŋā meꞌe era mo haka maꞌitaki i te taŋata, ¡ka manaꞌu atu ia kōrua pē hē te pūai o te toto o Ietū Kiritō! Hai Vārua Maitai, paꞌi, i vaꞌai ai e Ietū i a ia ki te ꞌAtua pa he tūtia ꞌina e tahi hape. ꞌE te meꞌe haka maꞌitaki hai toto ōꞌona he manaꞌu taꞌe tano o tātou o te taŋata maꞌu i a tātou ki te mate, ki riva ai tātou mo tāvini ki te ꞌAtua, tōꞌona ora ꞌina he hopeꞌa raꞌa.

ꞌEvereo 9:26

ꞌĀhani, paꞌi, i ai pē ira, ko ai ꞌana meꞌe rahi nō atu mate iŋa o Ietū mai te hora aŋa era e te ꞌAtua i te ao. ꞌE te parautiꞌa mau, hora nei, he hora hopeꞌa, ko tuꞌu mai ꞌā a ia ki te ao nei ꞌe ko vaꞌai ꞌā i a ia, mo te hora taꞌatoꞌa, pa he tūtia mo haka kore mau rō ꞌai i te pūai o te hara mai ruŋa i a tātou.

ꞌEvereo 9:28

Pē ira takoꞌa a Ietū Kiritō: e tahi mau nō vaꞌai iŋa i a ia mo mate pa he tūtia mo haka kore i te hara o te nuꞌu. ꞌE pe muꞌa ka oho ena he tuꞌu haka ꞌou mai a Ietū taꞌe ꞌō mo vaꞌai haka ꞌou i a ia pa he tūtia mo te hara o te taŋata, mo vaꞌai ki te nuꞌu tiaki ki a ia i te ora ꞌāpī ꞌina he hopeꞌa raꞌa.

Tanatiako 5:6

Te nuꞌu ꞌina he hape ko haka ūtuꞌa ꞌā ꞌe ko tiŋaꞌi ꞌana e kōrua, ꞌe kai taꞌe haka rē atu i a rāua mo tiŋaꞌi.

1 Pētero 3:19

Hai vārua era ōꞌona i oho i tātara ai ki te vārua e puru rō ꞌā,

1 Pētero 4:1

Ko ꞌite ꞌana e tātou: a Ietū Kiritō i ꞌamo rō i te ꞌati ꞌi te ao nei. ꞌI roto i tōꞌona manaꞌu, paꞌi, ko haka tano era ꞌana i a ia mo aŋa pē ira, ana haŋa te ꞌAtua. ꞌO ira te tātou manaꞌu e tuꞌu pa he manaꞌu mau era ꞌā ōꞌona. Te kope manaꞌu pē ira ko hārui ꞌana hai tuaꞌivi i te hara,

1 Pētero 4:6

ꞌE ki te taina ko mate ꞌā ꞌi te hora nei i haka ꞌite rō i te ⌊roŋo riva-riva o ruŋa i a Ietū⌋ ꞌi te hora era e ora nō ꞌā, mo ravaꞌa e te rāua vārua i te ora ꞌi muri i te ꞌAtua, ka ai atu ko mate ꞌana te rāua hakari taŋata, he ūtuꞌa mau ꞌā mo te taŋata taꞌatoꞌa.

1 Iovani 1:9

ꞌE mo kī o tātou ki te ꞌAtua i te tātou hara, he haka kore e ia, ꞌe he haka maꞌitaki i te meꞌe taꞌatoꞌa taꞌe tano o roto i te tātou māhatu, ꞌi te ai ōꞌona he ꞌAtua aŋa i te meꞌe tī-tika ꞌe haka tano i tāꞌana meꞌe kī.