1 Pētero 1:17 - Rapa Nui

¹⁷ A kōrua e kī rō ꞌana: te ꞌAtua he Matuꞌa o kōrua. ꞌO ira, e moꞌa ꞌe e haꞌatura ki a ia ꞌi te taꞌatoꞌa nō hora o te noho iŋa ꞌi te ao nei. ꞌĀꞌana, paꞌi, te kī i te tano ꞌe i te taꞌe tano o te taŋata hai huru o te rāua meꞌe aŋa, ꞌe mōꞌona te taŋata pē tū huru tahi ꞌā.

1 Pētero 1:17 ပူးပေါင်းရင်းမြစ်များ

Māteo 16:27

Te Poki o te taŋata, paꞌi, e oho rō mai e ꞌana-ꞌana rō ꞌana ꞌi te pūai o tōꞌona Matuꞌa, ꞌi muri i a ia tāꞌana merahi, ꞌe e ꞌauhau rō i te taŋata, e tahi e tahi, e haka tano ki te rāua meꞌe aŋa.

Māteo 22:16

He uŋa ki a Ietū i te rāua nuꞌu hāpī ananake ko te nuꞌu peꞌe ki a ⌊ꞌErore⌋ kī: —E te Maꞌori, ko ꞌite ꞌana a mātou: taꞌa meꞌe vānaŋa he parautiꞌa, e hāpī rō ꞌana koe i te ara parautiꞌa o te ꞌAtua, ꞌe ꞌina koe he haka tano i taꞌa vānaŋa ki te manaꞌu o te taŋata; taꞌe, paꞌi, mo haka koa i a rāua koe e vānaŋa ena.

Māteo 6:9

»Pē nei ana pure: “E te Matuꞌa o mātou o te raŋi ē, te meꞌe haŋa he moꞌa o te taŋata taꞌatoꞌa i tuꞌu ꞌīŋoa,

Rōmano 11:20

He aŋi ꞌā. I paꞌo ai i a rāua he taꞌe haka moe i te manaꞌu ꞌi ruŋa i a Ietū, ꞌe a koe e raꞌu ena ꞌi ruŋa ꞌo te haka moe nō i tuꞌu manaꞌu ꞌi ruŋa i a ia. ꞌO ira, ꞌina ko kī i hau rō atu koe ki a rāua; te meꞌe nō, e riꞌa-riꞌa koe.

2 Kōrinto 1:2

Ka ai ꞌi ruŋa i a kōrua te riva rahi ꞌe te haumārū o te ꞌAtua, Matuꞌa o tātou, ꞌe o Ietū Kiritō, Pūꞌoko Haka Tere o tātou.

2 Kōrinto 5:6

ꞌO ira a mātou e taꞌe ꞌaka-ꞌaka nei te manaꞌu ꞌi ruŋa i te ꞌAtua. ꞌE, ko ꞌite ꞌana e mātou: e noho e oho nō nei mātou ꞌi roto i te hakari nei, ko te roa-roa iŋa ꞌana mātou mai te kona era ꞌi ira te tātou Pūꞌoko Haka Tere.

2 Kōrinto 7:1

E te taina haŋa rahi ōꞌoku ē, te ŋā meꞌe nei he hōrea o te ꞌAtua mo tātou. ꞌO ira, e haka tapa tātou mai te meꞌe haka ꞌōꞌone hai hara i te hakari ꞌe i te vārua. ꞌE, ꞌi te moꞌa o tātou i a ia, e uꞌi mo tano o te tātou noho iŋa ki tōꞌona mata ki te roa ꞌina e tahi hara.

2 Kōrinto 7:11

Ka uꞌi rā he aha he aha te meꞌe riva-riva poreko mai te meꞌe ŋaroꞌa era e kōrua: ko haŋa ꞌana kōrua mo haka tī-tika i te meꞌe hape o roto i te nūnaꞌa taŋata ⌊haka moe i te manaꞌu⌋ ꞌi ruŋa i a Ietū o Kōrinto, ko riri ꞌana kōrua mo te meꞌe taꞌe tano aŋa era e rā kope, ꞌe ko riꞌa-riꞌa ꞌana ꞌo haka ūtuꞌa atu i a kōrua e te ꞌAtua ananake ko rā kope. Ko haŋa takoꞌa ꞌana a kōrua mo oho atu ōꞌoku mo uꞌi i a kōrua, ko ꞌata haꞌatura ꞌana a kōrua i tāꞌaku meꞌe kī atu era ꞌe ko haka ūtuꞌa ꞌā i rā kope. Hai ŋā meꞌe nei e takeꞌa ena: ꞌina e tahi hape o kōrua o rā meꞌe topa era.

Karatia 2:6

Te nuꞌu era ko rāua te pūꞌoko haka tere o ira kai takeꞌa e tahi hape o tāꞌaku meꞌe hāpī. (ꞌE ꞌina a au he tapa atu hoki a rāua he nuꞌu ra-rahi. Te ꞌAtua, paꞌi, ꞌi te hora e uꞌi ena i te tano ꞌe i te taꞌe tano o te meꞌe aŋa e te taŋata, ꞌina he tapa atu hoki he taŋata ra-rahi ꞌo he taŋata taꞌe ra-rahi; mōꞌona pē tū huru tahi ꞌā te taŋata).

Ēfeto 1:17

He ani nō tāꞌaku aŋa ki te ꞌAtua o te tātou Pūꞌoko Haka Tere ko Ietū Kiritō, ki te tātou Matuꞌa o te raŋi, i a ia te pūai ꞌe te nui-nui taꞌatoꞌa, mo vaꞌai atu, hai Vārua Maitai, i te mārama-rama mo aŋi-aŋi e kōrua i te parautiꞌa o ruŋa ōꞌona, ki māhani riva-riva ai kōrua ki a ia.

Ēfeto 3:14

E haka topa nei au i tōꞌoku manaꞌu ki te meꞌe taꞌatoꞌa nei, he tū-turi a au he pure ki te ꞌAtua Matuꞌa,

Ēfeto 6:9

E a kōrua, e te nuꞌu haka aŋa ē, e uꞌi e hāpaꞌo riva-riva te kōrua ꞌekaravo, ꞌe ꞌina ko haka riꞌa-riꞌa. E manaꞌu: a Ietū Kiritō ꞌi te raŋi he Pūꞌoko Haka Tere o kōrua ꞌe o rāua takoꞌa, ꞌe mōꞌona pē tū huru tahi ꞌā te taŋata.

Fīripo 2:12

E te taina, hora era ōꞌoku ꞌi muri i a kōrua, he haꞌatura nō te kōrua aŋa ki te ꞌAtua. ꞌE, hora nei, ꞌina a au o muri o kōrua, e ꞌata haka pūai te kōrua haꞌatura iŋa ki a ia mo aŋa mo oho nō o kōrua, hai moꞌa, i te meꞌe tano aŋa e te nuꞌu eꞌa mai roto i te ūtuꞌa o te hara.

Kōrosa 3:25

ꞌe e haka ūtuꞌa rō i te nuꞌu aŋa i te meꞌe taꞌe tano. ꞌE ꞌi te hora kī o te ꞌAtua i te tano ꞌe i te taꞌe tano o te taŋata, ꞌina he uꞌi hoki he kope ra-rahi ꞌo he kope taꞌe ra-rahi. ꞌO ira, e te ꞌekaravo ē, e aŋa riva-riva kōrua ki te nuꞌu haka aŋa atu.

ꞌEvereo 12:28

ꞌO ira, ki māuru-uru tātou ki te ꞌAtua ꞌo te ai o tātou ꞌi roto i te nūnaꞌa taŋata haka tere e ia, he meꞌe e ko ŋaro ki te hora hopeꞌa, ꞌe ki haꞌamuri tātou ki a ia hai māhatu ꞌe hai moꞌa, pa he meꞌe haŋa e ia.

ꞌEvereo 4:1

ꞌE hora nei, hora e ai nō ꞌā mo tātou te meꞌe hōrea mai e te ꞌAtua pē nei ē: he oꞌo ki te kona haka riva-riva e ia mo haka ora, e uꞌi ꞌo taꞌe ravaꞌa rō mo oꞌo e tahi o tātou.

1 Pētero 2:11

E te taina, a kōrua pa he nuꞌu o te kona kē noho ꞌi te ao nei mo te hora ꞌiti-ꞌiti nō e tahi. ꞌO ira, ꞌina ko vaꞌai i a kōrua ki te meꞌe pohe nō o te hakari, he meꞌe haka tapa i a kōrua mai te ara o te ꞌAtua.

1 Pētero 3:15

Te meꞌe o kōrua mo aŋa: he haꞌamuri ki a Ietū Kiritō ꞌi roto i te māhatu pa he Pūꞌoko Haka Tere o kōrua i a ia te kī iŋa hopeꞌa o te meꞌe mo topa atu ki a kōrua. ꞌE ꞌi te hora taꞌatoꞌa e ꞌite pē hē kōrua ka pāhono ena ki te nuꞌu ꞌui atu he aha kōrua e haka moe ena i te manaꞌu ꞌi ruŋa i a Ietū.