1 Kōrinto 6:18 - Rapa Nui

¹⁸ ꞌO ira, e hāpaꞌo kōrua e te hara he moe i te viꞌe i te kenu taꞌe o kōrua. Te kope moe i te viꞌe i te kenu taꞌe ꞌāꞌana e hara ꞌana ki tōꞌona hakari ꞌe ki tōꞌona vārua. ꞌE ꞌina he rua hara hopeꞌa o te taparahi-taꞌata tōtōā i te taŋata pa he hara nei.

1 Kōrinto 6:18 ပူးပေါင်းရင်းမြစ်များ

Rōmano 1:24

ꞌO ira i vaꞌai ai e te ꞌAtua ki te rima o te meꞌe taꞌe tano pohe e rāua. He noho mau rō ꞌai ia rā nuꞌu he aŋa hai hakari i te rāua meꞌe taꞌe tano haŋa mo aŋa ꞌi roto i a rāua ꞌā, ꞌātā ki te meꞌe hopeꞌa ena o te hano-hano.

1 Kōrinto 6:9

¿Kai ꞌite ꞌana hō kōrua: te nuꞌu aŋa i te meꞌe taꞌe tano ki te mata o te ꞌAtua e ko oꞌo ki roto i te nūnaꞌa taŋata haka tere e ia? ꞌIna kōrua ko reo-reo ki a kōrua ꞌā. ꞌIna, paꞌi, o roto i te nūnaꞌa taŋata haka tere e te ꞌAtua te nuꞌu moe i te viꞌe i te taŋata taꞌe he viꞌe ꞌo taꞌe he kenu ꞌāꞌana, ꞌina he nuꞌu haꞌamuri ki te ꞌītoro, he nuꞌu taiꞌata, he ŋāŋata haꞌariro i a rāua pa he viꞌe, he hiku, he toke-toke, he nuꞌu nou-nou, he nuꞌu rava taꞌero, he nuꞌu vānaŋa taꞌe tano mo te rua, ꞌe he nuꞌu toke i te rua hai reo-reo.

2 Kōrinto 12:21

E riꞌa-riꞌa takoꞌa rō ꞌana a au ꞌo haꞌamā a au i a kōrua ꞌi muꞌa i te ꞌAtua ꞌi tōꞌoku ara oho uꞌi atu i a kōrua, ꞌe he taŋi a au ꞌi te rahi o kōrua mai muꞌa ꞌā e hara e oho mai ena ꞌina he haka rē i te meꞌe taꞌe tano pa he moe i te viꞌe ꞌe i te taŋata taꞌe he kenu ꞌe he viꞌe ꞌāꞌana, ꞌe he tētahi atu meꞌe taꞌe tano pohe e te hakari.

Karatia 5:19

Te meꞌe aŋa e te nuꞌu haka tere i a rāua hai manaꞌu ki te meꞌe pohe nō e te hakari ko te meꞌe nei: he moe o te viꞌe ꞌe o te taŋata i te kope taꞌe he kenu ꞌo he viꞌe ꞌāꞌana ꞌe tētahi haka ꞌou atu meꞌe taꞌe tano tuꞌu pē ira, ꞌe he aŋa i te meꞌe hano-hano taꞌe tano ki te hakari.

Ēfeto 5:3

E ai te kōrua noho iŋa noho iŋa tano o te nuꞌu haꞌataꞌa e te ꞌAtua māꞌana. ꞌIna kōrua ko moe i te viꞌe ꞌe i te taŋata taꞌe he kenu ꞌe he viꞌe o kōrua, ꞌina kōrua ko aŋa i te tētahi haka ꞌou atu meꞌe taꞌe tano tuꞌu pē ira ꞌe, takoꞌa, ꞌina ko nou-nou. E hāpaꞌo te kōrua noho iŋa, ꞌo manaꞌu tāꞌue te nuꞌu pē nei ē: e aŋa rō ꞌana kōrua i te ŋā meꞌe nei.

Kōrosa 3:5

E te taina, e haka kore tahi te meꞌe taꞌe tano aŋa ꞌi muꞌa ꞌā. ꞌIna kōrua ko moe i te viꞌe ꞌo i te taŋata taꞌe he viꞌe ꞌo he kenu o kōrua, ꞌina ko aŋa e tahi meꞌe taꞌe tano ꞌe hano-hano haŋa e te hakari, ꞌina kōrua ko haꞌatiꞌa ki te meꞌe taꞌe tano pohe e te hakari mo haka tere atu, ꞌe ꞌina takoꞌa ko nou-nou. (Te nou-nou, paꞌi, e tuꞌu rō ꞌā pa he meꞌe ena: e haꞌamuri ꞌana kōrua ki te ꞌītoro, ꞌe rā ꞌītoro he taoꞌa).

1 Tētārōnika 4:3

Te haŋa o te ꞌAtua: he ai o te kōrua noho iŋa ꞌina e tahi hara, he taꞌe moe e tahi kope i te viꞌe ꞌe i te taŋata taꞌe he viꞌe ꞌo he kenu ꞌāꞌana,

1 Tētārōnika 4:5

Taꞌe mo te meꞌe taꞌe tano pohe e te hakari e haka tere atu i a kōrua, pa he meꞌe aŋa o te nuꞌu ꞌina kai ꞌite ko ai te ꞌAtua parautiꞌa.

2 Timoteo 2:22

E Timoteo, e uꞌi koe e te meꞌe haka hara i te nuꞌu ꞌāpī. E aŋa mo riro ōꞌou ꞌe o te nuꞌu taꞌatoꞌa haꞌamuri hai māhatu maꞌitaki ki te ꞌAtua, he nuꞌu aŋa i te meꞌe tano ki te mata o te ꞌAtua, haka moe i te manaꞌu ꞌi ruŋa i a ia, haŋa ki te rua ꞌe haumārū.

ꞌEvereo 13:4

Te ⌊hāipo-ipo⌋ he meꞌe mo moꞌa e te taꞌatoꞌa. Te nuꞌu hāipo-ipo e ꞌite mo moꞌa i te rāua hāipo-ipo ꞌe mo hāpaꞌo i te rāua hakari mo rāua ꞌā. Te ꞌAtua, paꞌi, e haka ūtuꞌa rō i te nuꞌu moe i te viꞌe i te taŋata taꞌe he viꞌe taꞌe he kenu ꞌāꞌana ꞌe i te nuꞌu taiꞌata.

1 Pētero 2:11

E te taina, a kōrua pa he nuꞌu o te kona kē noho ꞌi te ao nei mo te hora ꞌiti-ꞌiti nō e tahi. ꞌO ira, ꞌina ko vaꞌai i a kōrua ki te meꞌe pohe nō o te hakari, he meꞌe haka tapa i a kōrua mai te ara o te ꞌAtua.