1 Kōrinto 4:17 - Rapa Nui

¹⁷ Mo te ŋā meꞌe nei i uŋa atu ena au i a Timoteo mo hāꞌūꞌū atu i a kōrua. A ia pa he poki haŋa rahi ꞌāꞌaku taꞌe haka rē ki te hora hopeꞌa i te aŋa o te ꞌAtua. Māꞌana e haka manaꞌu atu i tōꞌoku haka tere iŋa pa he kope haka moe i te manaꞌu ꞌi ruŋa i a Ietū Kiritō. Tōꞌoku haka tere iŋa, paꞌi, e tano rō ꞌā ki tāꞌaku meꞌe mau nei ꞌā e hāpī e oho nei ki te nūnaꞌa taŋata haka moe i te rāua manaꞌu ꞌi ruŋa i a Ietū o te kona taꞌatoꞌa vari ōꞌoku.

1 Kōrinto 4:17 ပူးပေါင်းရင်းမြစ်များ

Māteo 24:45

»E ai kōrua pa he tāvini haꞌatura ꞌe haka roŋo, kope haka pūꞌoko e te taŋata haka aŋa i a ia mo tuhaꞌa i te kai ꞌi tōꞌona hora ki te tētahi tāvini o te hare.

Māteo 25:21

»He kī e tū taŋata era: “He tāvini haꞌatura ꞌe riva koe; ꞌo te haꞌatura ōꞌou ꞌi te meꞌe ꞌiti-ꞌiti nei, he vaꞌai atu e au ꞌata rahi te meꞌe mo hāpaꞌo e koe. Ka uru mai ki koa tāua”.

Māteo 25:23

»He kī e tū taŋata era: “He tāvini haꞌatura ꞌe riva koe; ꞌo te haꞌatura ōꞌou ꞌi te meꞌe ꞌiti-ꞌiti nei, he vaꞌai atu e au ꞌata rahi te meꞌe mo hāpaꞌo e koe. Ka uru mai ki koa tāua”.

Aŋa o te ꞌĀpōtoro 16:1

He oho ia a Pauro ki Reve ꞌe mai ira ki Rītara. ꞌI Rītara i māhani ai ki te taŋata ⌊haka moe i te manaꞌu⌋ ꞌi ruŋa i a Ietū te ꞌīŋoa ko Timoteo. A ia he poki o te viꞌe ⌊hūrio⌋ haka moe i te manaꞌu ꞌi ruŋa i a Ietū ꞌe tōꞌona matuꞌa tane he ⌊kirieko⌋.

1 Kōrinto 11:16

Mo manaꞌu o te kope e tahi e hape rō ꞌana tāꞌaku meꞌe vānaŋa atu ena, he kī atu a au: he meꞌe nei te meꞌe hāpī e mātou e te ⌊ꞌāpōtoro⌋, ꞌe he meꞌe maꞌu e te nuꞌu haka moe i te manaꞌu ꞌi ruŋa i a Ietū ꞌi te kona taꞌatoꞌa.

1 Kōrinto 11:2

E koa rō ꞌana a au ꞌo te rava manaꞌu mai o kōrua ki a au ꞌe, takoꞌa, ꞌo te maꞌu ꞌo te oho nō o kōrua i te hāpī haka ꞌite atu era e au.

1 Kōrinto 11:34

ꞌE mo maruaki o te kope e tahi o roto i a kōrua, ka kai rō ꞌai ꞌi tōꞌona hare, ꞌo haka ūtuꞌa i a kōrua e te ꞌAtua, he taꞌe tano o te kōrua haka tere iŋa ꞌi te hora haka taka-taka mo manaꞌu i te mate o te tātou Pūꞌoko Haka Tere. ꞌE te tētahi meꞌe ꞌui mai era e kōrua, ki tuꞌu atu a au ana haka ꞌite atu.

1 Kōrinto 14:33

Te ꞌAtua, paꞌi, taꞌe he ꞌAtua o te meꞌe mira-mira; tāꞌana meꞌe haŋa he meꞌe tī-tika ꞌe he haumārū. ꞌI te hora taka-taka mo haꞌamuri ki te ꞌAtua, ꞌina ko haꞌatiꞌa i te ŋā viꞌe mo vānaŋa. Pē ira te haka tere iŋa o te nūnaꞌa taŋata taꞌatoꞌa haka moe i te manaꞌu ꞌi ruŋa i a Ietū. Te ŋā viꞌe e haꞌatura ki te rāua kenu, pa he meꞌe hāꞌaki ꞌi ruŋa i te ⌊haka tere iŋa ꞌa Mōtē⌋.

1 Kōrinto 16:1

Te haka taka-taka i te moni mo te nuꞌu haꞌataꞌa e te ꞌAtua māꞌana o Hērutarema, e aŋa pa he meꞌe haka ꞌite e au ki te nūnaꞌa taꞌatoꞌa ⌊haka moe i te manaꞌu⌋ ꞌi ruŋa i a Ietū o te ŋā kona taꞌatoꞌa era o Karatia.

1 Kōrinto 16:10

ꞌE mo tuꞌu atu o Timoteo, e uꞌi e haka naho-naho; a ia e aŋa takoꞌa rō ꞌana pē au ꞌi te aŋa o te tātou Pūꞌoko Haka Tere.

1 Kōrinto 4:14

Te meꞌe nei e au e pāpaꞌi atu ena taꞌe mo haka haꞌamā i a kōrua, mo haka tī-tika i te kōrua manaꞌu, pa he ŋā poki haŋa rahi ꞌāꞌaku.

1 Kōrinto 4:15

Ka rahi atu te nuꞌu hāpaꞌo ꞌe hāpī i a kōrua pa he ⌊kiritiano⌋, e tahi mau nō kope pa he matuꞌa tane o kōrua ko au. ꞌĀꞌaku, paꞌi, i haka ꞌite raꞌe atu i te ⌊roŋo riva-riva o ruŋa i a Ietū Kiritō⌋, ꞌe i kī atu mo ⌊haka moe i te manaꞌu⌋ ꞌi ruŋa i a ia mo ai o kōrua ꞌāꞌana.

1 Kōrinto 4:2

Ko ꞌite ꞌana e kōrua: te taŋata ki a ia e vaꞌai ena i te aŋa e haka tano tahi i te meꞌe kī mo aŋa.

1 Kōrinto 7:17

Huru kē huru kē te tātou noho iŋa i vaꞌai mai ai e te tātou Pūꞌoko Haka Tere ko Ietū Kiritō: kē mo taureꞌa-reꞌa, kē mo hāipo-ipo, kē mo ꞌekaravo, mo taꞌe ꞌekaravo, mo ⌊hūrio⌋ ꞌe mo taꞌe hūrio. ꞌE tāꞌana meꞌe haŋa: he noho he oho taꞌatoꞌa o tātou pa he hora kī mai era e ia ꞌi roto i te tātou māhatu mo haka moe i te manaꞌu ꞌi ruŋa i a Ietū. Ko te meꞌe nei te meꞌe hāpī e au ꞌi roto i te nūnaꞌa taꞌatoꞌa o te taŋata haka moe i te manaꞌu ꞌi ruŋa i a Ietū.

1 Kōrinto 7:25

ꞌE, te nuꞌu taꞌe hāipo-ipo, ꞌina e tahi ꞌāꞌaku roŋo mo haka ꞌite ki a rāua vaꞌai mai e Ietū, Pūꞌoko Haka Tere o tātou. ꞌE, ka ai atu pē ira, a au pa he taŋata aŋa i tāꞌana meꞌe kī hai riva rahi o te ꞌAtua, he kī atu au i tōꞌoku manaꞌu.

2 Kōrinto 8:18

ꞌI muri i a Tito i uŋa atu ai a au i te taina e tahi. E vānaŋa riva-riva rō ꞌā o ruŋa i a ia te taina taꞌatoꞌa o Mātērōnia, he tano o tāꞌana aŋa he haka ꞌite i te ⌊roŋo riva-riva o te ꞌAtua⌋.

Ēfeto 6:21

Mo te tātou taina haŋa rahi nei ko Tīkiko e maꞌu atu i te parau ꞌāpī o ruŋa i te meꞌe taꞌatoꞌa topa mai ki a au. E hāꞌūꞌū rō mai ꞌana a Tīkiko, ꞌe he tāvini takoꞌa pē au o te ꞌAtua ꞌite i te haka tano i tāꞌana meꞌe kī.

Fīripo 2:19

Ana haŋa a Ietū, e ko roa he uŋa atu a au i a Timoteo, ꞌe, ka hoki mai ena a ia mai i a kōrua, he koa a au ꞌi te parau ꞌāpī ka maꞌu mai ena o ruŋa i a kōrua.

Fīripo 2:22

Ko ꞌite ꞌana, hoꞌi, kōrua pē hē te huru o Timoteo ꞌe pē hē a ia i hāꞌūꞌū i oho mai ai mo haka ꞌite i te ⌊roŋo riva-riva o te ꞌAtua⌋. E hāꞌūꞌū mai nei pa he poki mau ꞌana ꞌāꞌaku.

Kōrosa 1:7

Te meꞌe ena ꞌa Epafara, kope haŋa rahi o mātou aŋa takoꞌa ki te ꞌAtua, i hāpī atu. A ia he tāvini parautiꞌa ꞌa Ietū Kiritō.

Kōrosa 4:9

ꞌE nā ꞌi muri i a ia i uŋa takoꞌa atu ena i a Onetimoro, he taina haŋa rahi o tātou ꞌite takoꞌa mo haka tano i tāꞌana meꞌe kī. A ia o te kona ena o kōrua. Mo rāua e ꞌaꞌamu atu i te meꞌe taꞌatoꞌa o nei.

1 Timoteo 1:18

E Timoteo, e te poki ꞌāꞌaku ē, ꞌī a au he haka rē atu i te roŋo nei: pa he vaꞌai iŋa o te vaꞌehau i a ia ꞌi te hora o te tamaꞌi, ana vaꞌai takoꞌa koe i a koe mo haka ꞌite mo oho o ruŋa i te roŋo parautiꞌa o te ꞌAtua hai pūai o tuꞌu haka moe iŋa i te manaꞌu ꞌi ruŋa i a ia ꞌe hai manaꞌu riva-riva takoꞌa ōꞌou tano ki te meꞌe kī era e te perofeta o ruŋa i a koe ꞌi muꞌa ꞌā. ꞌE nā tētahi nuꞌu, ꞌi te taꞌe haka roŋo ki te rāua manaꞌu riva-riva, ko oho kē ꞌana mai roto i te ara o te ꞌAtua.

1 Timoteo 1:2

he ꞌaroha atu ki a koe, e Timoteo ē. A koe pa he poki parautiꞌa mau ꞌana ꞌāꞌaku ꞌi te haka moe iŋa i te manaꞌu ꞌi ruŋa i a Ietū. Ka ai ꞌi ruŋa i a koe te riva rahi, te haka ꞌaroha ꞌe te haumārū o te ꞌAtua, he Matuꞌa o tātou, ꞌe o Ietū Kiritō, he Pūꞌoko Haka Tere o tātou.

2 Timoteo 1:2

he ꞌaroha atu hai haŋa ki a koe, e Timoteo ē. A koe pa he poki parautiꞌa mau ꞌā ꞌāꞌaku. Ka ai ꞌi ruŋa i a koe te riva rahi, te haka ꞌaroha ꞌe te haumārū o te ꞌAtua Matuꞌa, ꞌe o Ietū Kiritō, he Pūꞌoko Haka Tere o tātou.

2 Timoteo 2:2

E kimi koe hai ŋāŋata haka tano i te rāua meꞌe kī, ŋāŋata ꞌite takoꞌa mo hāpī i te rua. Ki a rāua koe ana haka ꞌite mo hāpī e rāua ki te tētahi i te hāpī parautiꞌa o ruŋa i a Ietū Kiritō haka ꞌite atu era e au ꞌi te hora hāpī ōꞌoku i te nuꞌu.

2 Timoteo 3:10

ꞌE a koe, e Timoteo ē, ko ꞌite riva-riva ꞌana i tāꞌaku meꞌe hāpī, i te huru o tōꞌoku noho iŋa, i tāꞌaku meꞌe haŋa mo aŋa, i tōꞌoku haka moe iŋa i te manaꞌu ꞌi ruŋa i a Ietū, i tōꞌoku haumārū, i tōꞌoku haŋa ki te rua ꞌe i tōꞌoku haꞌaoromaꞌi iŋa i te ꞌati hai pūai

Tito 1:5

E haŋu, i haka rē ai a au i a koe ꞌi te motu ena ko Kereta mo haka tī-tika ōꞌou i te meꞌe toe mo aŋa o nā, ꞌe mo uꞌi takoꞌa ōꞌou hai ŋāŋata mo pūꞌoko haka tere o te ŋā nūnaꞌa ena e haka moe ena i te manaꞌu ꞌi ruŋa i a Ietū o te kona taꞌatoꞌa o Kereta, pa he meꞌe kī atu era e au.

Meꞌe Haka Takeꞌa 2:10

’ꞌIna koe ko riꞌa-riꞌa ꞌi te ꞌati ka topa ena. Tētahi o kōrua e puru rō ꞌi roto i te hare maꞌuꞌaurī hai Rukifero, he rāveꞌa e tahi mo haka ꞌatu atu i a kōrua taꞌatoꞌa. E hoꞌe ꞌahuru mahana ka ꞌamo ena kōrua i rā ꞌati. E haka noho e oho nō koe i tuꞌu manaꞌu ꞌi ruŋa i a au ka ai atu he mate koe ꞌo te aŋa pē ira, ꞌe he vaꞌai atu e au i te ora ꞌāpī ꞌina he hopeꞌa raꞌa mo haka koa i a koe.

Meꞌe Haka Takeꞌa 2:13

‘Ko ꞌite ꞌana a au e noho ena koe ꞌi te kona ꞌa Rukifero te haka tere, ꞌe, ka ai atu pē ira, kai haka tapa koe i tuꞌu manaꞌu mai ruŋa i a au, ꞌe kai haka rē i tāꞌaku hāpī, korohaŋa ꞌi te hora tiŋaꞌi era ꞌi nā i a Antipa, he mataꞌite parautiꞌa ōꞌoku.