1 Kōrinto 4:15 - Rapa Nui

¹⁵ Ka rahi atu te nuꞌu hāpaꞌo ꞌe hāpī i a kōrua pa he ⌊kiritiano⌋, e tahi mau nō kope pa he matuꞌa tane o kōrua ko au. ꞌĀꞌaku, paꞌi, i haka ꞌite raꞌe atu i te ⌊roŋo riva-riva o ruŋa i a Ietū Kiritō⌋, ꞌe i kī atu mo ⌊haka moe i te manaꞌu⌋ ꞌi ruŋa i a ia mo ai o kōrua ꞌāꞌana.

1 Kōrinto 4:15 ပူးပေါင်းရင်းမြစ်များ

Rōmano 15:20

ꞌI tōꞌoku ara, tāꞌaku meꞌe aŋa he haka ꞌite i te roŋo riva-riva o te ꞌAtua a te kona kai ꞌite ꞌā o ruŋa o Ietū Kiritō, ꞌo aŋa ꞌo oho a te kona ko haꞌamata era ꞌā te aŋa e te rua.

1 Kōrinto 1:30

Hai ia, paꞌi, e ai nei tātou ꞌa Ietū Kiritō. ꞌE hai Ietū Kiritō e haka tere nei a tātou hai manaꞌu ꞌAtua ꞌe e tano nei ki tōꞌona mata. Hai ia takoꞌa e ai nei tātou he nuꞌu haꞌataꞌa māꞌana ꞌina e tahi hara ꞌe he nuꞌu eꞌa mai roto i te pūai o te hara.

1 Kōrinto 15:1

Hora nei, e te taina ē, e haŋa rō ꞌana a au mo manaꞌu o kōrua ki te ⌊roŋo riva-riva o te ꞌAtua⌋ haka ꞌite atu e au, maꞌu hio-hio e kōrua ꞌi roto i te kōrua māhatu.

1 Kōrinto 3:10

Hai riva rahi o te ꞌAtua, ꞌāꞌaku i haꞌamata i hāpī atu ki a kōrua i te parau ꞌāpī riva-riva o ruŋa i a Ietū Kiritō; ꞌe, takoꞌa, i hāꞌūꞌū i te nuꞌu raꞌe o kōrua mo haka moe i te rāua manaꞌu ꞌi ruŋa i a Ietū, pa he kope ꞌāꞌana i aŋa i te mekerā ꞌi ruŋa ka haka tuꞌu era te hakari o te hare. ꞌE, hora nei, o te tētahi te hāpī te oho atu o ruŋa i a Ietū mo haka hio-hio o kōrua ꞌi te ara o te ꞌAtua, pa he nuꞌu o rāua te haka tuꞌu i te hakari o te hare ꞌi ruŋa i te mekerā. Te meꞌe nō, e uꞌi e aŋa riva-riva te hare.

1 Kōrinto 3:6

A au pa he kope pī i te karu ꞌe a ꞌĀporo pa he kope pī-pī vai, ꞌe o te ꞌAtua te haka tupu ꞌe te haka nui-nui.

1 Kōrinto 3:8

Te kope pī i te karu ꞌe te kope pī-pī hai vai ko tū tōroꞌa ꞌā, ꞌe mo te ꞌAtua e ꞌauhau i te rāua aŋa.

1 Kōrinto 9:12

Mo ai e tano rō ꞌā mo hāꞌūꞌū o kōrua ki te tētahi, ꞌata hau rō atu ia i te tano mo hāꞌūꞌū mai ki a mātou. ꞌE, ka ai atu pē ira, ꞌina ꞌā a mātou kai no-noꞌi atu ꞌā e tahi meꞌe. Te meꞌe aŋa e mātou he haꞌaoromaꞌi i te taꞌatoꞌa nō ꞌati ꞌo taꞌe haŋa te nuꞌu mo haka roŋo i te roŋo riva-riva o ruŋa i te ⌊Kiritō⌋.

1 Kōrinto 9:14

Pē ira te kope haka ꞌite o ruŋa i te ⌊roŋo riva-riva o te ꞌAtua⌋. ꞌĀꞌana mau ꞌā, paꞌi, i kī: hai rā meꞌe ana ravaꞌa mo kai.

1 Kōrinto 9:16

Taꞌe he meꞌe mo teꞌo-teꞌo e haka ꞌite e oho nei o ruŋa i te roŋo o te ꞌAtua; he meꞌe mau ꞌā mo aŋa e au. ꞌE, ¡ko te ꞌaroha mo taꞌe aŋa ōꞌoku pē ira!

1 Kōrinto 9:18

ꞌE i ai era pē nei, te ꞌauhau mōꞌoku he koa o te haka ꞌite o te oho i te roŋo riva-riva o te ꞌAtua taꞌe e ꞌauhau mai, te auraꞌa, ꞌina e tahi ꞌāꞌaku meꞌe no-noꞌi atu, ka ai atu e tano rō ꞌana a au mo aŋa pē ira.

1 Kōrinto 9:23

E aŋa nei a au i te meꞌe taꞌatoꞌa nei mo rahi mo oho o te nuꞌu haka moe i te rāua manaꞌu ꞌi ruŋa i te ⌊roŋo riva-riva o ruŋa i a Ietū⌋, ꞌe mo ai i a au ꞌe i te tētahi nuꞌu te meꞌe hōrea mai era e te ꞌAtua.

2 Kōrinto 4:5

ꞌIna a mātou he haka ꞌite he oho o ruŋa i a mātou. E haka ꞌite nei o ruŋa i a Ietū Kiritō, he Pūꞌoko Haka Tere o te taꞌatoꞌa. Te meꞌe mau nō haka ꞌite e mātou o ruŋa i a mātou: he tāvini mātou o te taꞌatoꞌa ꞌi te haŋa o mātou ki a Ietū.

Karatia 3:24

Mo tātou te haka tere iŋa ꞌa Mōtē pa he kope hāpaꞌo ŋā poki, haka tika i te tātou ara ꞌātā ki te tuꞌu iŋa mai o Ietū Kiritō, ki ai ai hora era ōꞌona ka tuꞌu mai ena he tano a tātou ki te mata o te ꞌAtua hai haka moe i te manaꞌu ꞌi ruŋa i a ia.

Karatia 3:25

ꞌE, hora nei, ko tuꞌu mai ꞌā rā rāveꞌa era he haka moe i te manaꞌu ꞌi ruŋa i a Ietū mo tano o tātou ki te mata o te ꞌAtua, ꞌe ꞌina toe tātou he hāpaꞌo ꞌe he haka tika e te haka tere iŋa ꞌa Mōtē.

Karatia 4:19

E te ŋā poki haŋa rahi ꞌāꞌaku ē, pa he māui-ui ŋaroꞌa e te viꞌe aꞌu i te poki te māui-ui ŋaroꞌa e au mo kōrua ꞌātā ka ai rō te kōrua huru taꞌatoꞌa pē Ietū Kiritō ꞌā.

2 Timoteo 4:3

Nā e tuꞌu rō te mahana e ko haŋa haka ꞌou te taŋata ki te hāpī parautiꞌa. Te meꞌe ka aŋa era he kimi i te maꞌori hāpī i te meꞌe haŋa nō o rāua mo haka roŋo,

Firemono 1:19

Hai rima mau ꞌana ōꞌoku o Pauro e pāpaꞌi atu ena: māꞌaku mau ꞌā e ꞌauhau atu. Ka ai atu pē ira, ꞌina ko rehu i a koe e ai rō ꞌana tuꞌu tārahu mōꞌoku: hai au, paꞌi, i ravaꞌa ai e koe i te ora ꞌāpī ꞌina he hopeꞌa raꞌa vaꞌai e te ꞌAtua.

Tanatiako 1:18

Te ꞌAtua, ꞌi te ai ko haŋa ꞌā, i vaꞌai rō mai i te ora ꞌāpī ꞌina he hopeꞌa raꞌa hai haka moe i te manaꞌu ꞌi ruŋa i tāꞌana roŋo o ruŋa i te parautiꞌa, ki ai ai a tātou he raꞌe o roto i tāꞌana meꞌe aŋa taꞌatoꞌa.

1 Pētero 1:23

A kōrua, paꞌi, ko poreko haka ꞌou mai ꞌana, ꞌe taꞌe mai roto i te taŋata, he meꞌe e mate nō, mai roto i te vānaŋa o te ꞌAtua, he meꞌe ora ꞌe ꞌina e ko mate ki te hora hopeꞌa.