1 Kōrinto 4:10 - Rapa Nui

¹⁰ E manaꞌu ena te nuꞌu o te ao nei he maꞌa-maꞌa a mātou ꞌo te aŋa ki te Kiritō, ꞌe a kōrua e manaꞌu ena: ꞌo te ai a kōrua o te Kiritō he nuꞌu mārama-rama. Ki te manaꞌu takoꞌa o te nuꞌu o te ao nei he nuꞌu taꞌe pūai a mātou, ꞌe a kōrua e manaꞌu ena he nuꞌu pūai kōrua. Te nuꞌu o te ao e taꞌe haka au rō ꞌana i a mātou, ꞌe ki a kōrua e moꞌa atu ena.

1 Kōrinto 4:10 ပူးပေါင်းရင်းမြစ်များ

Māteo 24:9

»E vaꞌai rō i a kōrua ki te nuꞌu mo tōtōā; e tiŋaꞌi e haka mate rō, ꞌe e maꞌu rō te riri mo kōrua e te taŋata o te hau taꞌatoꞌa, he haka moe o kōrua i te manaꞌu ꞌi ruŋa i a au.

Māteo 5:11

»Ko te koa i a kōrua ꞌi te hora vā-vā ꞌe tōtōā atu e te taŋata, ꞌe ꞌi te hora haꞌaꞌino hai rauhuru nō atu reo-reo ꞌo te peꞌe mai o kōrua ki a au.

Ruka 10:16

He kī ia e Ietū ki tāꞌana nuꞌu hāpī: «Te nuꞌu haka roŋo atu e haka roŋo mai ꞌana; te nuꞌu taꞌe haŋa atu e taꞌe haŋa mai ꞌana; ꞌe te nuꞌu taꞌe haŋa mai e taꞌe haŋa ꞌana ki te kope uŋa mai i a au».

Ruka 18:9

He ꞌaꞌamu takoꞌa e Ietū i te ꞌaꞌamu haꞌaauraꞌa nei mo te nuꞌu manaꞌu ko rāua nō te nuꞌu aŋa i te meꞌe tī-tika ki te mata o te ꞌAtua ꞌe te tētahi nuꞌu ꞌina:

Ruka 6:22

»Ko te koa i a kōrua ka tute ena e te nuꞌu mai muri i a rāua, ka riri, ka vā-vā ꞌe ka taꞌe haka au ena ꞌi te ai o kōrua o te Poki o te taŋata.

Aŋa o te ꞌĀpōtoro 17:18

He haka tātake ia ki a Pauro e te tētahi nuꞌu maꞌori o te hāpī he ēpikureo ꞌe o te hāpī he ētōiko. ꞌE, ꞌi te huru o te vānaŋa ꞌa Pauro, he ꞌui ki a rāua ꞌā: «¿He aha te meꞌe vānaŋa e te reo-reo era?». ꞌE o te tētahi te kī: «Pa he meꞌe ena: a ia he taŋata haka ꞌite o ruŋa i te ꞌatua o te rua henua». E kī era i te meꞌe nei ꞌo te haka ꞌite o Pauro i te ⌊roŋo riva-riva o ruŋa i a Ietū⌋ ꞌe o ruŋa i te ora o te taŋata mai te mate.

Aŋa o te ꞌĀpōtoro 17:32

I ŋaroꞌa era i te vānaŋa o ruŋa o te ora iŋa mai te mate e te nuꞌu taka-taka ꞌi ira, tētahi he haka ka-kata i a Pauro, ꞌe tētahi atu i kī: «E haŋa rō ꞌana a mātou mo haka roŋo haka ꞌou, ꞌi te tētahi mahana, i taꞌa vānaŋa».

Aŋa o te ꞌĀpōtoro 26:24

I oti era a Pauro i te kī i tū vānaŋa era, he kī e Feto, i haka pūai te reꞌo: —¡Ko maꞌa-maꞌa ꞌā a koe, e Pauro ē! A koe i maꞌa-maꞌa ena he rahi o tuꞌu hāpī.

Aŋa o te ꞌĀpōtoro 9:16

E haka takeꞌa rō e au i te rahi o te ꞌati ka topa ena ꞌi ruŋa i a ia ꞌo te haka ꞌite ꞌo te oho o ruŋa i a au.

1 Kōrinto 1:21

Te ꞌAtua, paꞌi, ꞌi tōꞌona mārama-rama ꞌAtua i kī ai: te taŋata e ko riva mo ꞌite ko ai a ia hai mārama-rama taŋata mau nō. ꞌE, ꞌi tōꞌona riva rahi, i manaꞌu ai mo haka eꞌa i te taŋata mai roto i te ūtuꞌa o te hara ꞌe mo vaꞌai i te ora ꞌāpī ꞌina he hopeꞌa raꞌa hai haka moe o rāua i te manaꞌu ꞌi ruŋa i tāꞌana roŋo o ruŋa i a Ietū Kiritō, roŋo haka ꞌite e mātou, ka ai atu he meꞌe maꞌa-maꞌa nō atu e tahi mo te nuꞌu taꞌe haka moe i te manaꞌu ꞌi ruŋa i a Ietū.

1 Kōrinto 1:23

ꞌE a mātou ꞌina he aŋa i te ŋā meꞌe era. Te mātou meꞌe aŋa he haka ꞌite he oho o ruŋa i te Kiritō veo era ꞌi ruŋa i te tātaurō. Te meꞌe nei he parauꞌino e tahi mo te hūrio, ꞌe mo te kirieko he meꞌe maꞌa-maꞌa nō atu e tahi.

1 Kōrinto 1:25

Te meꞌe aŋa e te ꞌAtua tuꞌu pa he meꞌe maꞌa-maꞌa e tahi mo te taŋata, he meꞌe ꞌata hau rō atu ꞌi te mārama-rama ki te manaꞌu mārama-rama taꞌatoꞌa o te taŋata. ꞌE te meꞌe o te ꞌAtua tuꞌu pa he meꞌe taꞌe pūai, he meꞌe ꞌata hau rō atu i te pūai ki te pūai taꞌatoꞌa o te taŋata.

1 Kōrinto 10:12

ꞌO ira, te kope manaꞌu e haka moe riva-riva rō ꞌana a ia i te manaꞌu ꞌi ruŋa i a Ietū e uꞌi ꞌo hara.

1 Kōrinto 2:14

Te kope taꞌe haka moe i te manaꞌu ꞌi ruŋa i a Ietū ꞌe kore o te Vārua Maitai o roto i a ia ꞌina he toꞌo mōꞌona i te hāpī haka ꞌite e te Vārua Maitai; te hāpī nei he meꞌe maꞌa-maꞌa e tahi mōꞌona. ꞌE ꞌina e ko aŋi-aŋi, ꞌi te meꞌe era o te Vārua Maitai mau nō te haka aŋi-aŋi i te auraꞌa parautiꞌa o rā hāpī.

1 Kōrinto 2:3

I māroa atu ai a au ꞌi muꞌa o kōrua ꞌina e tahi ōꞌoku pūai e ŋaroꞌa era e au ꞌe e rurū rō ꞌā ꞌi te riꞌa-riꞌa, ꞌo taꞌe haka tano au i te meꞌe haŋa o te ꞌAtua.

1 Kōrinto 3:18

E uꞌi ꞌo reo-reo ki a kōrua ꞌā hai manaꞌu ena pē nei ē: nuꞌu mārama-rama kōrua ki te mata o te taŋata o te ao nei. I hau rō atu ꞌi te tano mo riro o kōrua pa he nuꞌu taꞌe mārama-rama, ki riro iho ai kōrua mo te ꞌAtua he nuꞌu mārama-rama mau ꞌā.

1 Kōrinto 3:2

ꞌE, pa he ŋā poki ꞌomo-ꞌomo ū hai ū e vaꞌai ena ꞌe taꞌe hai kai paŋahaꞌa, pē ira tāꞌaku meꞌe hāpī atu era, he hāpī taꞌe aŋarahi mo aŋi-aŋi e kōrua. Kai tano riva-riva ꞌana, paꞌi, a kōrua mo aŋi-aŋi i te hōhonu o te hāpī o te ꞌAtua, ꞌe ꞌātā ki te hora nei, ko te ai iŋa ꞌā pē ira.

1 Kōrinto 4:8

Te huru, e manaꞌu ena kōrua ꞌina he meꞌe toe mo ꞌite o ruŋa i te ꞌAtua ꞌe i a kōrua te meꞌe taꞌatoꞌa vaꞌai e te ⌊Vārua Maitai⌋ mo aŋa i tāꞌana aŋa. Te huru takoꞌa, e manaꞌu ena kōrua a kōrua he ꞌariki ꞌe ꞌina e tahi meꞌe haŋa toe mo vaꞌai atu e mātou. ¡Pē hiva ꞌana ꞌō he parautiꞌa he ꞌariki a kōrua mo haka tere o tātou ananake!

2 Kōrinto 10:10

ꞌĪ a au e kī atu ena: nā ꞌi roto i a kōrua te nuꞌu kī: pūai riꞌa-riꞌa tāꞌaku vānaŋa ꞌi te hora pāpaꞌi atu, ꞌe, ꞌi te hora ꞌi muꞌa i a kōrua, e tuꞌu rō ꞌā pa he kope taꞌe pūai ꞌe taꞌe ꞌite mo tātara.

2 Kōrinto 11:19

¡A kōrua e manaꞌu ena he nuꞌu mārama-rama kōrua, ꞌe te aŋa he haꞌaoromaꞌi hai haŋa i te nuꞌu maꞌa-maꞌa!

2 Kōrinto 11:29

ꞌo viri tāꞌue e tahi o rāua ki roto ꞌi te hara ꞌo te taꞌe pūai o tōꞌona haka moe iŋa i te manaꞌu ꞌi ruŋa i a Ietū ꞌe ꞌo te haka hara i a ia e te kope e tahi. Ka meꞌe era, he riri ia a au mo rā kope era ꞌāꞌana i haka hara.

2 Kōrinto 13:9

He koa a mātou mo pūai o kōrua ꞌi te ara parautiꞌa o te ꞌAtua ka ai atu e ai rō ꞌana te nuꞌu manaꞌu ꞌina mātou pūai pa he ꞌāpōtoro. ꞌE he pure he oho a mātou mo kōrua mo tuꞌu ki te roa ena ꞌina e tahi hape.

2 Kōrinto 4:12

A mātou e oho mau rō ꞌā mo mate ꞌo te haka ꞌite i te roŋo riva-riva o ruŋa i a Ietū, ꞌe a kōrua, hai nei meꞌe mau ꞌā, e ravaꞌa ena i te ora ꞌāpī ꞌina he hopeꞌa raꞌa.

2 Kōrinto 6:8

E ai rō ꞌā te nuꞌu haka nui-nui i a mātou, ꞌe te nuꞌu parauꞌino mai. E ai rō ꞌā te nuꞌu vānaŋa riva-riva ꞌe te nuꞌu vānaŋa rake-rake o ruŋa i a mātou. A rāua he kī nō mai te aŋa i te mātou reo-reo, ka ai atu he parautiꞌa te mātou meꞌe kī.

1 Tētārōnika 4:8

ꞌE te taina taꞌe haŋa ꞌe taꞌe haꞌatura ki te hāpī nei e hārui ꞌana i te ꞌAtua hai tuaꞌivi, taꞌe ꞌō i te taŋata; o te ꞌAtua, paꞌi, te hāpī nei ꞌe ꞌāꞌana te uŋa atu i te ⌊Vārua Maitai⌋ mo noho ꞌi roto i a kōrua.

1 Pētero 4:14

E koa kōrua mo vā-vā atu e te nuꞌu ꞌo te ai o kōrua ꞌa Ietū Kiritō; hai meꞌe nei e ꞌite ena: te ⌊Vārua Maitai⌋ pūai o te ꞌAtua nā ꞌi ruŋa i a kōrua ꞌi te hora taꞌatoꞌa.