1 Kōrinto 2:6 - Rapa Nui

⁶ Te parautiꞌa, ꞌi roto i te nuꞌu e hio-hio rō ꞌā te rāua haka moe iŋa i te manaꞌu ꞌi ruŋa i a Ietū e hāpī nei a mātou hai vānaŋa mārama-rama, ꞌe rā mārama-rama taꞌe he mārama-rama o te taŋata ꞌo he mārama-rama o te nuꞌu pūꞌoko haka tere o te ao nei. Te pūai, paꞌi, o te rāua mārama-rama pe te ŋaro pe te oho nō.

1 Kōrinto 2:6 ပူးပေါင်းရင်းမြစ်များ

Māteo 13:22

»Te kona mauku pū-pū vī-viri era o te karu he nuꞌu haka roŋo i te roŋo o te ꞌAtua, ꞌe, ꞌi te pūai o te haŋa ki te meꞌe o te ao nei ꞌe ki te ꞌono he mira-mira te manaꞌu. Taꞌatoꞌa meꞌe nei he haka vavau i te vānaŋa o te ꞌAtua ꞌe ꞌina e ko haka rē mo hua ꞌi roto i a rāua.

Māteo 19:21

He pāhono e Ietū: —Mo haŋa ōꞌou mo riro he taŋata ꞌina e tahi hape, ka oho ka hoꞌo tahi tuꞌu hauhaꞌa ꞌe ꞌai ka vaꞌai rō te moni mo te nuꞌu veve. Pē ira he ai tuꞌu hauhaꞌa ꞌi te raŋi. ꞌE ꞌai koe ka oho iho mai ꞌi muri i a au mo taŋata hāpī ꞌāꞌaku.

Māteo 5:48

»E ai kōrua he nuꞌu ꞌina e tahi hape, pa he Matuꞌa o kōrua ꞌi te raŋi.

Ruka 16:8

»I ꞌite era i rā meꞌe e tū taŋata ꞌono era he kī: “¡Ko te mārama-rama i te kope aŋa i te meꞌe tuꞌu pē rā!”». He kī haka ꞌou e Ietū: «He aŋi ꞌā, ꞌata hau ꞌi te ꞌite te nuꞌu taꞌe ⌊haka moe i te manaꞌu⌋ ꞌi ruŋa i te ꞌAtua mo aŋa i te meꞌe mo te rāua riva-riva ki te nuꞌu haka moe i te manaꞌu ꞌi ruŋa i te ꞌAtua.

1 Kōrinto 1:28

Te nuꞌu taꞌe haka au ꞌe taꞌe haŋa e te taŋata, te auraꞌa, te nuꞌu ꞌina e tahi hauhaꞌa, ki te rāua kī, ko te nuꞌu nei te nuꞌu i haꞌataꞌa e te ꞌAtua māꞌana, mo haka takeꞌa: te nuꞌu e hauhaꞌa rō ꞌā ki te mata o te taŋata, ki te mata o te ꞌAtua taꞌe pē ira.

1 Kōrinto 12:8

O te Vārua Maitai te vaꞌai ki te tētahi taŋata i te pūai mo vānaŋa i te vānaŋa mārama-rama; ꞌe o te Vārua Maitai takoꞌa ꞌā te vaꞌai ki te rua i te pūai mo haka ꞌite i te meꞌe hōhonu o te ꞌAtua haka ꞌite e ia mau ꞌā ki rā taŋata.

1 Kōrinto 14:20

E te taina, ka haka rē te manaꞌu ŋā poki o ruŋa i te ŋā meꞌe nei. Mo haŋa o kōrua mo manaꞌu pa he ŋā poki, e manaꞌu ia pa he ŋā poki poreko iho mo te meꞌe taꞌe tano.

1 Kōrinto 2:1

E te taina, hora oho vānaŋa atu era ōꞌoku o ruŋa i te meꞌe manaꞌu e te ꞌAtua mo aŋa taꞌe haka ꞌite mai era e ia ꞌi muꞌa ꞌā, taꞌe hai vānaŋa nehe-nehe mo haka takeꞌa atu ꞌō i tōꞌoku mārama-rama a au i haka ꞌite atu ai.

1 Kōrinto 2:13

ꞌO ira, hora ena o mātou e hāpī ena o ruŋa i te ꞌAtua, e vānaŋa nei hai vānaŋa haka ꞌite mai e te Vārua Maitai, taꞌe hai vānaŋa mārama-rama hāpī mai e te taŋata. Pē ira e haꞌaauraꞌa nei i te meꞌe o te ꞌAtua hai vānaŋa vaꞌai mai e te Vārua Maitai.

1 Kōrinto 2:8

Rā meꞌe manaꞌu era e te ꞌAtua mo aŋa ꞌina kai aŋi-aŋi e te nuꞌu pūꞌoko haka tere o te ao nei. ꞌĀhani, paꞌi, a rāua i aŋi-aŋi, e ko veo ꞌi ruŋa i te tātaurō i te tātou Pūꞌoko Haka Tere, kope i a ia te parau o te meꞌe taꞌatoꞌa.

1 Kōrinto 3:1

E te taina, hora era ꞌā ōꞌoku ꞌi muri i a kōrua, kai tano a au mo hāpī atu i a kōrua pa he hāpī iŋa ōꞌoku i te nuꞌu haka tere e te ⌊Vārua Maitai⌋ paꞌari ꞌi te meꞌe o te ꞌAtua. I hāpī atu ai pa he nuꞌu taꞌe haka moe rahi i te manaꞌu ꞌi ruŋa i a Ietū, maꞌu oho i te manaꞌu o te ao nei, pa he ŋā poki ꞌi te meꞌe o te ⌊Kiritō⌋.

2 Kōrinto 1:12

E te taina, e koa nei a mātou ꞌi te meꞌe era e haka ꞌite rō mai ꞌana e te mātou māhatu pē nei ē: te noho iŋa o mātou ꞌi roto i a kōrua ꞌe ꞌi roto i te taŋata taꞌatoꞌa hai moꞌa ꞌe hai parautiꞌa o te ꞌAtua. A mātou e haka tere nei hai haka moe i te manaꞌu ꞌi ruŋa i te riva rahi o te ꞌAtua, ꞌe taꞌe ꞌō hai mārama-rama o te taŋata.

2 Kōrinto 13:11

Mo haka mao atu, e kuā taina ē, e koa kōrua ꞌe e noho ꞌina e tahi hape. E haka haŋu kōrua i a kōrua ꞌā, e ai kōrua e tahi mau nō manaꞌu ꞌe e noho ꞌi roto i te haumārū. Pē ira te ꞌAtua, vaꞌai i te haŋa ꞌe i te haumārū, ka haꞌamaitai ena i a kōrua.

2 Kōrinto 4:3

ꞌE mo ai o te meꞌe puru i te manaꞌu ꞌo aŋi-aŋi i te auraꞌa parautiꞌa o te roŋo riva-riva haka ꞌite e mātou, mo te nuꞌu taꞌe eꞌa mau nō mai roto i te ūtuꞌa o te hara ka ai ena.

2 Kōrinto 4:4

Te nuꞌu nei, ꞌi te taꞌe haka moe i te rāua manaꞌu ꞌi ruŋa i a Ietū, ko haka pōhāhā ꞌā i te rāua manaꞌu e Rukifero, ꞌatua o te ao nei, ꞌo aŋi-aŋi, ꞌo takeꞌa i te māꞌeha o te mōrī o te roŋo riva-riva o ruŋa i te pūai ꞌe i te nui-nui o te ⌊Kiritō⌋, ꞌāriŋa ora o te ꞌAtua.

Ēfeto 2:2

Te noho iŋa era o kōrua e haka tano era ki te noho iŋa taꞌe tano o te nuꞌu o te ao nei taꞌe haŋa ki te ꞌAtua, ꞌe e aŋa era i te meꞌe haŋa ꞌa Rukifero, he pūꞌoko haka tere o te tātane e noho mai ena ꞌi roto i te tokerau. ꞌĀꞌana te haka tere i te manaꞌu o te nuꞌu taꞌe haꞌatura ki te ꞌAtua.

Kōrosa 1:28

ꞌI te kona taꞌatoꞌa, e hāpī e oho nei mātou o ruŋa i a Ietū Kiritō, ꞌe hai mārama-rama vaꞌai mai e te ꞌAtua, e hatu e hāpī nei ki te nuꞌu mo haka moe i te rāua manaꞌu ꞌi ruŋa i a Ietū. Te meꞌe haŋa, paꞌi, o mātou he maꞌu i te nuꞌu taꞌatoꞌa ꞌa Ietū Kiritō ki muꞌa o te ꞌAtua ko paꞌari ꞌana ꞌi te meꞌe o te ꞌAtua ꞌe ꞌina e tahi hape.

Kōrosa 4:12

A Epafara, tāvini takoꞌa o Ietū Kiritō, ꞌī e ꞌaroha atu ena. A ia takoꞌa o te kona ena o kōrua, ꞌe te aŋa nō ꞌāꞌana he ani ki te ꞌAtua mo kōrua ꞌi roto i tāꞌana pure, mo haka hio-hio atu i te manaꞌu ꞌi ruŋa i a Ietū, ki aŋi-aŋi riva-riva ai e kōrua he aha te meꞌe haŋa o te ꞌAtua mo kōrua.

ꞌEvereo 5:14

ꞌE te nuꞌu paꞌari e tano rō ꞌā mo ŋau-ŋau i te kai paka-paka. Pē ira te nuꞌu manaꞌu paꞌari mo te meꞌe o te ꞌAtua e tano rō ꞌana mo aŋi-aŋi i te hāpī ꞌata hōhonu o te ꞌAtua o ruŋa i te meꞌe tano ꞌe i te meꞌe taꞌe tano mo aŋa ꞌo te ai hai rā meꞌe e haka tere ena i a rāua.

ꞌEvereo 6:1

ꞌO ira, e te taina ē, ꞌina tātou ko noho mau rō ꞌai ꞌi ruŋa i te hāpī raꞌe o ruŋa i te ⌊Kiritō⌋. Ki ꞌata hāpī ki oho tātou ꞌātā ka paꞌari rō ꞌi te meꞌe o te ꞌAtua, ꞌo teka-teka ꞌo oho nō tātou ꞌi ruŋa i te hāpī raꞌe era pe he hāpī o ruŋa i te huri iŋa o te manaꞌu ki te ꞌAtua, o ruŋa i te haka tapa iŋa mai roto i te meꞌe taꞌe tano maꞌu ki te mate, o ruŋa i te haka moe iŋa i te manaꞌu ꞌi ruŋa i a Ietū,

Tanatiako 3:15

Taꞌe o te ꞌAtua te huru ena; he meꞌe o te ao nei, o te taŋata ꞌe o Rukifero.

Tanatiako 3:2

A tātou, te taŋata taꞌatoꞌa e hape rahi rō ꞌā. ꞌE mo ai tāꞌue o te kope taꞌe hape ꞌi tāꞌana meꞌe kī, he taŋata ꞌina e tahi hape ia ꞌi muꞌa o te ꞌAtua ꞌe he taŋata ꞌite mo haka noho i a ia ꞌo hara.

1 Pētero 5:10

ꞌE ki oti i te haꞌaoromaꞌi tahi i te ꞌati topa atu ꞌi ruŋa i a kōrua, he meꞌe e ko roa rahi, he haka riro e te ꞌAtua i a kōrua he nuꞌu ꞌina e tahi hape, e hio-hio rō ꞌana te manaꞌu ꞌi ruŋa i a ia, nuꞌu pūai mo haꞌaoromaꞌi, ꞌe nuꞌu noho, ki te hora hopeꞌa, ꞌi te ara o te ꞌAtua. A ia, paꞌi, he ꞌAtua kī mai, ꞌi tōꞌona riva rahi, mo noho o tātou ꞌi muri i a ia ꞌina he hopeꞌa raꞌa ꞌi roto i tōꞌona nui-nui ꞌana-ꞌana hai haka moe o tātou i te manaꞌu ꞌi ruŋa i a Ietū Kiritō,