1 Kōrinto 15:20 - Rapa Nui

²⁰ ꞌE te parautiꞌa, te Kiritō ko ora ꞌā mai te mate. A ia he raꞌe o te meꞌe mo kato, te auraꞌa, he kope raꞌe mo ora mai te mate.

1 Kōrinto 15:20 ပူးပေါင်းရင်းမြစ်များ

Aŋa o te ꞌĀpōtoro 2:24

I oho era he haka ora e te ꞌAtua, he haka eꞌa mai te ꞌati o te mate i a Ietū; taꞌe, paꞌi, te mate mo rē ki a ia.

Aŋa o te ꞌĀpōtoro 26:23

e mate rō te ⌊Kiritō⌋, ꞌe ko ia te raꞌe ka ora ena mai te mate, ki haka māꞌeha ai pa he mōrī i te manaꞌu o te hūrio ꞌe o te nuꞌu taꞌe he hūrio hai haka ꞌite ki a rāua i te rāveꞌa pē hē te ꞌAtua ana haka eꞌa i te taŋata mai roto i te ūtuꞌa o te hara ꞌe ana vaꞌai i te ora ꞌāpī ꞌina he hopeꞌa raꞌa.

Rōmano 8:11

Mo ai nā ꞌi roto i a kōrua te Vārua o te ꞌAtua haka ora i a Ietū mai te mate, māꞌana takoꞌa e haka ora i te kōrua hakari mai te mate hai Vārua ōꞌona ꞌi roto o kōrua.

1 Kōrinto 15:23

ꞌe taꞌatoꞌa ꞌi tōꞌona hora: ꞌi raꞌe te Kiritō, ꞌe ki hoki mai a ia, he nuꞌu ꞌāꞌana.

1 Kōrinto 15:6

I haka takeꞌa takoꞌa rō i a ia ki te nuꞌu ꞌata rahi ki te pae hānere e taka-taka rō ꞌā, he nuꞌu ⌊haka moe i te manaꞌu⌋ ꞌi ruŋa i a ia. Te rahi raꞌa o rā ŋā nuꞌu ko te ora iŋa ꞌana ꞌātā ki te hora nei ꞌe tētahi ko mā-mate ꞌā.

Kōrosa 1:18

A ia he Pūꞌoko Haka Tere o tātou o te nuꞌu taꞌatoꞌa haka moe i te manaꞌu ꞌi ruŋa i a ia, ꞌe a tātou pa he hakari ōꞌona. Māꞌana e haka tika mai, pa he pūꞌoko e haka tika ena i tōꞌona hakari. ꞌE a ia takoꞌa he kope raꞌe i haka ora e te ꞌAtua mai te mate, ki ai ai ko ia te raꞌe ꞌi te meꞌe taꞌatoꞌa.

1 Tētārōnika 4:16

Pē ira ka topa ena: e ŋaroꞌa rō te reꞌo ohu o te merahi ra-rahi ꞌe te puhi iŋa o te koneta o te ꞌAtua. He topa mai ia a Ietū mai te raŋi, ꞌe te nuꞌu mā-mate haka moe i te manaꞌu ꞌi ruŋa i a ia he ora haka ꞌou.

1 Pētero 1:3

Ki haꞌahana-hana tātou i te ꞌAtua, Matuꞌa o te tātou Pūꞌoko Haka Tere ko Ietū Kiritō. A ia, paꞌi, ko vaꞌai mai ꞌana i te ora ꞌe i te noho iŋa ꞌāpī, he rahi o tōꞌona haka ꞌaroha mo tātou. ꞌE, ꞌi te ai ko haka ora ꞌana e ia i a Ietū mai te mate, e ꞌite nei a tātou e haka ora takoꞌa rō mai i a tātou mai te mate pe muꞌa ka oho ena,

Meꞌe Haka Takeꞌa 1:5

ꞌe o Ietū Kiritō, he mataꞌite haka ꞌite i te parautiꞌa o ruŋa i te ꞌAtua, ꞌe tāꞌana vānaŋa he parautiꞌa mau ꞌā. A ia he kope raꞌe ora haka ꞌou mai te mate ꞌe ꞌina kai mate haka ꞌou, ꞌe i a ia te parau mo haka tere i te ꞌariki taꞌatoꞌa o te ao. Te Kiritō e haŋa rō mai ꞌā ki a tātou, ꞌe ko haka eꞌa ꞌana i a tātou mai roto i te hara hai toto tehe era ōꞌona.

Meꞌe Haka Takeꞌa 14:13

He ŋaroꞌa ia e au i te reꞌo e tahi mai te raŋi e kī ꞌā: «Ka pāpaꞌi te meꞌe nei: “Ko te koa i te nuꞌu mate, ꞌi te hora nei ꞌe pe muꞌa ka oho ena, ⌊haka moe i te manaꞌu⌋ ꞌi ruŋa i te tātou Pūꞌoko Haka Tere ko Ietū Kiritō”». «ꞌĒ-ē —i kī ai e te ⌊Vārua Maitai⌋— e haka ora rō rāua mai te rāua aŋa, ꞌe e vaꞌai rō hai meꞌe mo haka koa ꞌo te rāua meꞌe riva-riva aŋa».