1 Kōrinto 14:12 - Rapa Nui

¹² E tano rō ꞌā, e te taina ē, te haŋa mo ai i a kōrua te meꞌe vaꞌai e te Vārua Maitai mo aŋa i te aŋa o te ꞌAtua. Te meꞌe nō, e ani ki a ia mo vaꞌai atu hai ŋā meꞌe ena mo hāꞌūꞌū ki te nuꞌu taꞌatoꞌa haka moe i te manaꞌu ꞌi ruŋa i a Ietū mo pūai o te rāua manaꞌu ꞌi ruŋa i a ia.

1 Kōrinto 14:12 ပူးပေါင်းရင်းမြစ်များ

Rōmano 14:19

ꞌO ira, ki uꞌi ki aŋa i te rāveꞌa taꞌatoꞌa ai mo hāꞌūꞌū i a tātou mo ꞌata ꞌite o ruŋa i te meꞌe o te ꞌAtua, ꞌe mo ai o te haumārū ꞌi roto i a tātou taꞌatoꞌa o te nuꞌu haka moe i te manaꞌu ꞌi ruŋa i a Ietū.

1 Kōrinto 12:31

ꞌO ira, e haŋa tātou mo ai i a tātou te meꞌe hopeꞌa o te hauhaꞌa o te meꞌe vaꞌai e te Vārua Maitai mo aŋa i te aŋa o te ꞌAtua. ꞌE, hora nei, ꞌī a au he haka ꞌite atu i te meꞌe ꞌata hau rō atu i te hauhaꞌa ki tū ŋā meꞌe taꞌatoꞌa ena.

1 Kōrinto 12:7

Hai meꞌe vaꞌai mai mo aŋa i te aŋa o te ꞌAtua e takeꞌa ena: o te Vārua Maitai te haka tere i a tātou. ꞌE nei ŋā meꞌe i vaꞌai mai ai ki a tātou e tahi e tahi mo te riva-riva o te nuꞌu taꞌatoꞌa haka moe i te manaꞌu ꞌi ruŋa i a Ietū.

1 Kōrinto 14:1

ꞌO ira, te meꞌe raꞌe mo ai i a kōrua he haŋa ki te rua; ꞌe, takoꞌa, e haŋa ki te meꞌe vaꞌai e te ⌊Vārua Maitai⌋ mo aŋa i te aŋa o te ꞌAtua. ꞌE, o te ŋā meꞌe vaꞌai ena e te Vārua Maitai, te meꞌe ꞌata hauhaꞌa he vānaŋa i te meꞌe haka ꞌite e te ꞌAtua hai ꞌarero aŋi-aŋi e te nuꞌu.

1 Kōrinto 14:13

Te kope ki a ia te meꞌe i vaꞌai ai he vānaŋa i te ꞌarero kē taꞌe ꞌite e ia e ani ki te ꞌAtua mo vaꞌai i te pūai mo haꞌaauraꞌa i tāꞌana vānaŋa era.

1 Kōrinto 14:26

Tāꞌaku kī, e te taina ē: ꞌi te hora taka-taka o kōrua mo haꞌamuri ki te ꞌAtua, e tano nō te tētahi nuꞌu mo hīmene i te hīmene haꞌahana-hana, ꞌe te tētahi atu mo hāpī ꞌo mo haka ꞌite i te meꞌe haka aŋi-aŋi e te ꞌAtua, ꞌo mo vānaŋa hai ꞌarero kē taꞌe ꞌite e ia, ꞌo mo kī i te haꞌaauraꞌa o rā vānaŋa. Te meꞌe taꞌatoꞌa nei e aŋa mo te riva-riva o te nūnaꞌa taꞌatoꞌa o te taŋata haka moe i te manaꞌu ꞌi ruŋa i a Ietū.

1 Kōrinto 14:5

Mo vānaŋa o kōrua taꞌatoꞌa i te ꞌarero kē taꞌe ꞌite e kōrua, he koa a au. Te meꞌe nō, mo te riva-riva o te taꞌatoꞌa, i hau rō atu ꞌi te tano te vānaŋa o kōrua i te meꞌe haka ꞌite e te ꞌAtua hai ꞌarero mo aŋi-aŋi e te nuꞌu ki te vānaŋa i te ꞌarero kē taꞌe ꞌite e kōrua, mo kore o te kope mo haꞌaauraꞌa i rā vānaŋa. ꞌO ira ꞌata hau rō atu tōꞌoku koa mo vānaŋa o kōrua i te meꞌe haka ꞌite atu e te ꞌAtua.

Tito 2:14

A Ietū, paꞌi, ko vaꞌai ꞌā i a ia ki te mate mo kore o te pūai o te hara mai ruŋa i a tātou, ki ai ai tātou he nuꞌu haꞌataꞌa māꞌana, ꞌina e tahi hara, ꞌe haŋa mo aŋa i te meꞌe riva-riva ki tōꞌona mata.