ROMANOS 8:23 - Nuevo Testamento en Quichua Cañar 1996

²³ Mana paicunallachu llaquita apacun, ashtahuanpish Dios cusha nishcata japingapac ña paipac Espirituta chariccunapish llaquita apacunchicmi. Taita Dios paipac huahuacunata ricuchina punzhapi ñucanchic cuerpota huatashca shinamanta llucchictami shuyashpa, shungumanta llaquita apacunchic.

Dios Rimashcata Quillcashcami

²³ Mana paicunallachu llaquita apacun, ashtahuanpish Dios cusha nishcata japingapac ña paipac Espirituta chariccunapish llaquita apacunchicmi. Chaica, Dios paipac huahuacunata ruhuangacaman, ñucanchic cuerpota huatashca shinamanta llucchingacamanmi shungupi llaquita apacunchic.

ROMANOS 8:23 ပူးပေါင်းရင်းမြစ်များ

SAN LUCAS 20:36

Taita Dios causachishcamantaca, paipac huahuacunami canga. Shinallatac angelcuna shinapish cangami. Chaimanta paicunaca ña mana huañungacunachu.

SAN LUCAS 21:28

Chai tucui llaquicuna callaricpica, Taita Dios cancunata ña quishpichigricushcatami yachanguichic. Chaimanta cancunaca ñahuita huichaiman churashpa chaparacuc shina, cushicuihuan chaparacuichic— nirca.

ROMANOS 5:11

Chaillapish mana canchu, ashtahuanpish Apunchic Jesucristomanta Taita Dioshuan alli tucushcamantami Diosmanta cushicunchic.

ROMANOS 5:3

Mana chaillamantachu cushicunchic, ashtahuanpish llaquita apashcamantapish cushicunchicmi. Chai llaquicunami mishangapac ashtahuan alli crina yuyaita cun.

ROMANOS 5:5

Taita Diosca paipac Espirituta cushpami, ñucanchic shungupica yallita c'uyaita churashca. Chaimanta mana yangamantachu shuyacunchic.

ROMANOS 7:24

¡Aij, ñucalla! Ñucapi tiyac huañunaman apac juchamantaca, ¿pitac anchuchingayari?

ROMANOS 8:19

Taita Dios tucui ima ruhuashcacunami, maijancunalla Diospac huahuacuna cashcata ricuchina punzhata ricuna yuyailla shuyacuncuna.

1 CORINTIOS 1:7

Chai shina cacpimi, Apunchic Jesucristo cutimunata cancuna shuyacuccunamanca, Taita Diosca imatapish paipacta ruhuachun ayudacunlla.

2 CORINTIOS 1:22

Paimi ñucanchicta paipaclla cachun sellohuan unanchishca shinata ruhuashca. Shinallatac ñucanchic shungupi paipac Espirituta churashpami, q'uipa punzhapi ñucanchic japina cashcata ricuchishca.

2 CORINTIOS 7:5

Macedonia llactaman chayashcamanta pachaca imata mana samarircanchicchu, ashtahuanpish maipipish mana ricunachishpa, mana criccuna llaquichicpimi, llaquihuan carcanchic. Shina cashpami, ñucanchic shungupica yalli llaquilla carcanchic.

GÁLATAS 5:5

Shina cacpipish ñucanchic crishcallamanta, shinallatac Diospac Espíritu imatapish ruhuaclla cashcamantaca, Taita Dioshuan alli tucuna yuyaillami canchic.

EFESIOS 1:14

Taita Diosca paipac Espirituta cushpami, ñucanchictaca huatashca shina cashcamanta tucui cacharichishpa, paipacllata ruhuashpa, pai cusha nishcata chasquiccuna cashcata ricuchin. ¡Chashna ruhuashcamantaca Taita Diosta “allimari cangui” nishunchic!

EFESIOS 4:30

Taita Diosca juchapi huatashca shinamanta cacharichishpa pushana punzhacamanmi, Diospaclla cashcata ricuchishpa causachun, ñucanchictaca paipac Espirituhuan unanchishpa ch'icanyachirca. Chaimanta millaita rimashpa ama Diospac Espirituta nanachichicchu.

EFESIOS 5:9

Achic luzca alli shungu canata, imapish cashcata ruhuanata, shinallatac mana llullac cana yuyaitami cun.

2 TIMOTEO 4:8

Cunan punzhamanta pachami cashcata ricuchic, ñucaman cuna cashca coronata Taita Diosca charicun. Chaitaca cashcata ruhuashpa taripac Apunchic Jesucristomi, taripana punzhapica cunga. Mana ñucallamanchu cunga, ashtahuanpish tucui pai cutimuna punzhata c'uyaihuan shuyaccunamanpish cungami.

TITO 2:13

Shinallatac chai c'uyaimi, ñucanchicta Mandac Dios Quishpichic Jesucristo sumaimana cashcahuan, cutimuna cushicui punzha pactanata shuyanata yachachicun.

HEBREOS 9:28

Shinallatacmi Apunchic Jesusca achca gentecunapac juchacunata p'ichangapacca, pai quiquinllatac curishpa huañurca. Q'uipataca ña mana juchacunata anchuchingapac shamungachu, ashtahuanpish paita shuyacuccunata quishpichingapacmi shamunga.

1 PEDRO 1:7

Cancuna crishcaca curi shinami. Curi alli cactaca ninapi rupachishpami ricun. Chai shinallatac cancuna alli crishcata ricungapacca, llaquicunaca japinami can. Shina llaquita apana cacpipish, mana chingaric crishcaca chingariclla curitapish ashtahuan yallimi can. Chai shina llaquichishca cashpapish crinata mana saquishpaca, Jesucristo ricuricpica, sumacyachishca, “allimi cangui” nishcami canguichic.

1 JUAN 3:2

C'uyashca criccuna, ñucanchicca ña Diospac huahuacunami canchic. Shamuc punzhapi ima shinami ñucanchic cana cashcataca manarac yachanchicchu. Shina cashpapish Jesucristo ricuricpica, pai shina cana cashcatami yachanchic. Paitaca pai ima shina cashcatami ricushun.