ROMANOS 7:7 - Nuevo Testamento en Quichua Cañar 1996

⁷ Shina cacpica, ¿imatatac nishun? ¿Moisés mandashcacunaca juchami nishunchu? ¡Mana chashnachu yuyana canchic! Shina cacpipish, mandashcacuna mana tiyacpica, ñucaca imami jucha cashcataca mana yachaimanchu carcani. Mandashcacunapi “shucpac charishcata ama munangui” mana nicucpica, shucpac charishcata munanaca jucha cashcataca mana yachaimanchu carcani.

Dios Rimashcata Quillcashcami

⁷ Shina cacpica, ¿imatatac nishun? ¿Mandashcacunaca juchami nishunchu? ¡Mana chashnachu! Shina cacpipish, mandashcacuna mana tiyashca cacpica, ñucaca imami jucha cashcata, mana yachaimanchu carcani. Mandashcacunapi «Ama shucpac charishcata munanguichu» mana nicushca cacpica, shucpac charishcata munana jucha cashcataca mana yachaimanchu carcani.

ROMANOS 7:7 ပူးပေါင်းရင်းမြစ်များ

SAN MATEO 5:28

Ashtahuanpish ñucaca cashnami nini: Maijanpish shuc huarmita ricushpa munashpaca, paipac shungupica ña huacllirinacushca shinallatacmi.

SAN LUCAS 12:15

Chashnallatac Jesusca: —Charishcacunaca mana causaita cunchu. Chaimanta pacta misa tucushpa, imatapish ashtahuan charina yuyailla canguichicman— nirca.

SAN LUCAS 20:16

Pai shamushpaca, chai runacunata huañuchishpa chagratapish quichushpami, shuccunaman cunga” nirca. Jesús chashna nicta uyashpaca, gentecunaca mancharishpami: —¡Amatapish caica chashna tucuchun!— nircacuna.

HECHOS 20:33

Ñucaca pipac cullquitapish, curitapish, churanatapish mana munashcanichu.

ROMANOS 13:9

Dios mandashcacunapica: “Ama huaclliringui, ama huañuchingui, ama shuhuangui, shucpac charishcata ama munangui” ninmi. Tucui cai mandashcacunapish, caishuc mandashcacunapish: “Can quiquinllatac ima shinami c'uyaringui, shinallatac shuccunatapish c'uyangui” nishca shinallatacmi can.

ROMANOS 3:20

Taita Diosca mandashcacunata pactachishcallamantaca pitapish paihuan alli tucuchunca mana chasquingachu. Chai mandashcacunaca ñucanchic juchayuccuna cashcata ricuchingapacllami can.

ROMANOS 3:5

Cunanca gentecuna yuyashca shinami ñuca yuyaillamanta rimagrini: Ñucanchic mana allita ruhuashcacunallatac Taita Diosca cashcata ruhuac cashcata ricuchicpica, ¿imatatac nishun? ¿“Taita Dios llaquichicpica, millaimantami llaquichin” nishunchu?

ROMANOS 4:1

Shina cacpica, ñucanchic ñaupa taita Abrahammantaca, ¿imatatac nishun? ¿Paica imatatac japishca canga?

ROMANOS 4:15

Mandashcacunata yachashpa mana pactachicpica, Diosca llaquichingami. Mandashcacunata mana yachashpa mana pactachicpica, mana juchanchishcachu canga.

ROMANOS 5:20

Mandashcacunata Dios cucpica, juchaca ashtahuanmi mirarirca. Chashna miraricpicarin, Taita Diosca ashtahuanmi c'uyaita ricuchirca.

ROMANOS 6:15

Shina cacpica, ¿imatatac nishun? “Ñucanchicca mana mandashcacunata pactachishpa causana cashcapichu causacunchic, ashtahuanpish Taita Diospac c'uyaimantami causacunchic” nishpaca, ¿juchata ruhuashpa c'aticushunllachu? ¡Chaica mana chashnachu cana can!

ROMANOS 7:11

Mandashcacuna tiyashcamantami juchaca ñuca yuyaipi yaicushpa, mana allita ruhuachishpa pandachirca. Juchaca chai mandashcacunahuanmi, ñucataca huañushca shinata ruhuarca.

ROMANOS 7:13

Mandashcacuna shina alli cashpaca, ¿huañuiman apangachu? ¡Chaica mana chashnachu! Chai mandashcacunaca “juchata ruhuana manatac alli” nishpa ricuchicpipish, juchaca mandashcacunallahuantacmi ñucataca huañushca shinata ruhuarca. Chai mandashcacunallatac ñucata huañushca shinata ruhuashpami, juchaca yallita mana alli cashcataca ricuchin.

ROMANOS 7:5

Cai pacha jucha munashcata ruhuashpa mana allicunata ruhuacucpica, mandashcacunaca ñucanchic yuyaipi yaicushpa, mana allita ruhuachishpami huañuiman aparca.

ROMANOS 7:8

Juchaca mandashcacuna tiyashcamantami ñuca yuyaipi yaicushpa, mana allicunata ruhuachi callarirca. Mandashcacuna mana tiyacpica, juchaca huañushca shinami canman.

1 CORINTIOS 15:56

Gentecuna juchallishcamantami, huañuica nanachishpa charicun. Mandashcacuna jucha tiyashcata ricuchicushcamantami, juchaca mandac tucushca.

EFESIOS 5:3

Cancunaca Diospaclla cashcamantaca “huaclliriccuna” nishcapish, “manapish caipaccunata ruhuaccuna” nishcapish, mana cashpaca “ashtahuan charina yuyaillami causancuna” nishcapish, cancunapurapica pacta uyarishcallapish canman.

COLOSENSES 3:5

Cai pachapi imapish jucha munashcata ruhuangapacca, huañushca shinami cana canguichic. Chaimanta ama huacllirichicchu, manapish caipaccunata ama ruhuaichicchu, ama huacllirina yuyailla caichicchu, ama millaita ruhuana yuyailla caichicchu, shinallatac ama imatapish charina yuyailla caichicchu. Chai yuyailla cashpaca, ruhuashcalla diosta alli nic shinami canguichic.

1 TESALONICENSES 4:5

Diosta mana cazuccuna shina mapa yuyaicunahuan, mana alli munaicunallahuan ama causaichicchu ninmi.

HEBREOS 7:19

Moisés mandashcacunata pactachishpaca, mana pi allitacca tucurcachu. Chaipac randimi Taita Diospacman chayaringapacca, shuc sumac shuyana cashcata shuyacunchic.