ROMANOS 6:4 - Nuevo Testamento en Quichua Cañar 1996

⁴ Taita Dios ima shinami paipac sumaimana imatapish ruhuaclla cashcahuan Cristota huañushcacunapuramanta causachirca, chai shinallatac ñucanchicpish mushuc causaita causangapac bautizarishpaca, Cristo huañushca shina huañungapac, shinallatac pai enterrarishca shina enterraringapac bautizarircanchic.

Dios Rimashcata Quillcashcami

⁴ Diosca, paipac poderhuanmi Cristota huañushcacunapuramanta causachirca, chai shinallatacmi ñucanchicpish mushuc causaita causangapac bautizarircanchic. Shinallatac Cristo huañushca shina huañungapac, pai enterrarishca shina enterraringapacmi bautizarircanchic.

ROMANOS 6:4 ပူးပေါင်းရင်းမြစ်များ

SAN JUAN 11:40

Shina nicpi Jesusca: —‘Can crishpaca, Taita Dios imatapish ruhuaclla cashcataca ricunguimi’ nishpa, ¿manachu nircani?— nirca.

SAN JUAN 2:11

Galilea llactapi tiyac Caná pueblopi Jesús chashna ruhuashpami, pipish mana ruhuaipaccunataca ruhuanata callarirca. Chashna ruhuashpami, paica pi mana ruhuaipaclla cashcata ricuchirca. Chashna ruhuacpimi, paipac yachacuccunaca pai Diosmanta shamushca cashcata crircacuna.

HECHOS 2:24

Chashna cancuna Jesusta huañuchicpipish, Taita Diosca llaquiman apac huañuimantaca cacharichishpami causachirca. Shina ruhuacpimi, huañuipish Jesustaca mana ati pudirca.

HECHOS 2:32

Taita Diosca pai cachashca Jesusllatatacmi causachirca. Ñucanchicca chai ricushcata huillaccunami canchic.

ROMANOS 6:19

Chashnaca cancunapac yuyaicuna mana entendinalla cacpimi, gentecuna entendinalla shinata rimani. Ima shinami utcaman cancunapac cuerpota imapish millanayaita, mana allita ruhuachun saquircanguichic, chai shinallatac cunanpish cancunapac cuerpotaca Diospaclla tucushpa, allita ruhuashpa servic cachun saquichic.

ROMANOS 6:3

Ñucanchic bautizarishpaca, tucuimi Jesucristohuan shuc shinalla tucushpa, paihuan huañungapac bautizarircanchic. ¿Chaitaca manachu yachanguichic?

ROMANOS 6:8

Ñucanchic Cristohuan huañushca cashpaca, paillahuantac causana cashcatami crinchic.

ROMANOS 6:9

Cristo huañushcacunapuramanta causarishcatapish, ña mana huañuna cashcatapish yachanchicmi. Huañuica paitaca ña imata mana ruhuangachu.

ROMANOS 7:6

Mandashcacunaca huatashca shinami charicurca. Shina cacpipish cunanca mandashcacunata ama ruhuangapac cacharirishpa, huañushca shinami tucushcanchic. Chashna Dios cacharichicpimi, ñaupa quillcashca mandashca causanamanta llucchishpa, Diospac Espíritu mushuc yuyaita cucpi, Diosta servishpa causacunchic.

ROMANOS 8:11

Jesusta causachic Diospac Espiritullatac cancunapi causacucpica, Diosllatacmi cancunapac huañunalla cuerpotaca cancunapi causac paipac Espiritumanta causachinga.

1 CORINTIOS 6:14

Shina cashcamanta ima shinami Taita Dios Apunchic Jesusta causachirca, chashnallatacmi ñucanchictapish pai imatapish ruhuaclla cashcahuanca causachinga.

2 CORINTIOS 13:4

Ari, paica imatapish mana ruhuaipac shinami, cruzpi chacatashca carca. Shina cashpapish imatapish ruhuaclla Diosmantami causacun. Chai shinallatacmi ñucanchicca Cristo shina, imatapish mana ruhuaipac shina canchic. Shina cashpapish paihuan shuc shinalla tucushpami, Taita Dios imatapish ruhuaclla cashcahuan cancunapac allipac causashun.

2 CORINTIOS 5:17

Chaimanta maijanpish Cristohuan shuc shinalla tucushpaca, mushuc runami tucun. Ñaupa causaita saquishpami, mushuc causaita causan.

EFESIOS 4:17

Apunchic Jesusmantami cancunamanca caicunata mingani. Chai yanga, quiquin munaillata ruhuashpa Diosta mana ricsiccuna shinaca, ña ama causaichicchu.

EFESIOS 5:8

Ñaupaca amsallapimi cancunaca causarcanguichic. Cunanca Apunchic Jesushuan shuc shinalla tucushcamanta achic luzpimi causacunguichic. Shina cashcamantaca achic luzpi causacuc shina causaichic.

COLOSENSES 3:10

Cancuna mushuc churanata churaric shinami, mushuc yuyaita japishcanguichic. Imatapish ruhuac Taita Dios mushucta ruhuashpa pushacpimi, cancunaca pai shina tucunguichic. Chashna cashpami, Taita Diosta allita ricsic chayanguichic.

COLOSENSES 4:1

Amocuna, cancunapish shuc Amota jahua pachapi charishcamanta, cancunapac serviccunamanca allita yuyarishpa, imatapish cashcata ruhuaichic.

1 PEDRO 3:21

Shinallatac chai yacuca bautizarinatami ricuchicurca. Jesucristo huañushcacunapuramanta causarishcamantami, yacupi bautizarishpaca cunanca quishpirishca canchic. Bautizaricpica ima mapata mana anchuchinchu, ashtahuanpish mana alli yuyaicuna ama tiyachun Taita Diosman mañana yuyaicunatami cun.

1 JUAN 2:6

Maijanpish “Taita Dioshuan shuc shinallami cani” nishpaca, Jesucristo causashca shinallatacmi causana can.