ROMANOS 6:22 - Nuevo Testamento en Quichua Cañar 1996

²² Ashtahuanpish cancunaca jucha mandashca causacushcamanta Taita Dios cacharichicpica, paita serviccunami tucushcanguichic. Chashna tucushpaca, Taita Diospaclla ch'icanyarishpa causashpa, huiñai causaita chasquishpami allita japircanguichic.

Dios Rimashcata Quillcashcami

²² Cunan juchamanta Dios cacharichicpica, paita serviccunami canguichic. Chaimantaca Diospaclla chicanyarishpa, huiñai causaitami japircanguichic.

ROMANOS 6:22 ပူးပေါင်းရင်းမြစ်များ

SAN MATEO 13:40

Mana alli q'uihuata p'itishpa tucui rupachic shinaca, cai pacha tucuri punzhapimi canga.

SAN MATEO 13:43

Ashtahuanpish cashcata ruhuaccunaca, inti shinami Taita Dios mandacucpica achic nicunga. Maijanpish rinrita chariccunaca, cai ñuca nishcata alli uyaichic.

SAN MATEO 19:29

Maijanpish ñucata c'atingaraicu huasita, huauquicunata, panicunata, taita mamata, huarmita, huahuacunata, shinallatac allpata saquicca, caicunamanta pasac cutinhuan yallimi japinga, shinallatac huiñai causaitapish japingami.

SAN MATEO 25:46

Chashnacunaca, huiñaita jatun llaquimanmi shitashca canga. Ashtahuanpish cashcata ruhuaccunaca, huiñai causaitami japinga— nirca.

SAN JUAN 15:16

Cancunallatacca ñucataca mana acllarcanguichicchu, ashtahuanpish ñucami cancunataca acllarcani. Cancuna rishpaca, alli granota p'ucuc yura shina causaita ricuchichunpish, chai p'ucushcacuna ama chingarichunpish minganimi. Shina ruhuashpa, cancuna ñuca shutipi imata mañacpica, ñuca Taitaca cungallami.

SAN JUAN 15:2

Ñucapi cac ramacuna mana p'ucucpica, tucui p'itishpami shitanga. Cutin alli p'ucuctaca ashtahuan alli p'ucuchunmi, mana allicunata anchuchishpa saquinga.

SAN JUAN 4:36

Granota tandacca, japina cashcata charinmi. Shinallatac chai tandashca granoca huiñai causaipacmi. Chaimantami granota tandacca tarpuc-huan ishcai tucushpa cushicunga.

SAN JUAN 8:32

Chai rimashcaca cashcata nic cashcatapish ricsinguichicmi. Chai cashcata nic rimashcami huatashca shina caccunataca cacharichinga— nirca.

ROMANOS 6:14

Cancunaca mana Moisés mandashcacunata pactachishpa causana cashcapichu causacunguichic, ashtahuanpish Taita Diospac c'uyaimantami causacunguichic. Chaimanta juchaca cancunataca ña mana mandanachu can.

ROMANOS 6:18

Jucha mandashca causacushcamanta ña cacharishca cashpaca, allita ruhuangapacmi Diosta serviccuna tucushca canguichic.

ROMANOS 6:21

Ashtahuanpish cunan pinganayachic juchacunata ñaupaman ruhuashcamantaca, ¿ima allitatac japircanguichic? ¿Chaicunaca manachu huañuiman apan?

ROMANOS 7:25

Taita Diosllami ñucanchic Apunchic Jesucristomanta chai huañuimantaca anchuchinga. Chaimantami paitaca pagui nini. Ñuca yuyaihuanca Dios mandashcacunata pactachinatacmi yuyani. Shina cacpipish ñuca munaihuanca, jucha mandashcatami ruhuacuni.

ROMANOS 7:4

C'uyashca criccuna, chai shinallatacmi Cristo huañushcamantaca mandashcacunata ama ruhuangapac Cristohuan pacta huañushca shina canguichic. Cunanca Taita Diospacta allita ruhuangapacmi, huañushcacunapuramanta causaric Jesucristopaclla canguichic.

ROMANOS 8:2

Jesucristohuan shuc shinalla tucushpa causaccunataca, Diospac Espíritu causaita cushpa mandacushcamantami, jucha mandashpa causanamantapish, huañuimantapish chashnaca cacharichirca.

1 CORINTIOS 7:22

Maijan amoyuc cashca cashpapish, Apunchic Jesusta crishpaca, ña mana amoyucchu can, cunanca Apunchic Jesuspacta ruhuachun acllashcami. Shinallatac maijanpish mana amoyuc cashca cashpapish, cunanca Apunchic Jesuspacta ruhuachun c'ayashcami.

2 CORINTIOS 3:17

“Mandac Dios” nishpaca, paipac Espiritutami ninchic. Maijanpish Mandac Diospac Espirituhuan cashpaca, huatashca shinamanta ña cacharirishcami can.

GÁLATAS 1:10

Chashna nishpaca gentecunalla alli nichunca mana munanichu, ashtahuanpish Dios alli nishca canatami munani. Gentecunalla ñucata alli nichun nishpaca, ña mana Cristopacta ruhuacchu caiman.

GÁLATAS 5:13

C'uyashca criccuna, cancunataca Taita Dios ama huatashca shina causachunmi c'ayarca. Cunanca “ña mana huatashca shinachu canchic” nishpaca, imapish mana alli munaicunataca ama ruhuanguichicchu. Chaipac randica caishuc chaishuchuan c'uyanacushpa, ayudanacushpa causaichic.

GÁLATAS 5:22

Ashtahuanpish Diospac Espíritu yuyaita cushca causaccunaca c'uyaccunami, cushi causaccunami, sumacta causaccunami, mana utca p'iñariccunami, llaquiccunami, cuccunami, imatapish pactachiccunami,

EFESIOS 5:9

Achic luzca alli shungu canata, imapish cashcata ruhuanata, shinallatac mana llullac cana yuyaitami cun.

FILIPENSES 1:11

Cancuna Jesucristollamanta alli grano p'ucuc shina allita ruhuacpimi, Taita Diostaca “allimari cangui, sumacmari cangui” ningacuna.

FILIPENSES 4:17

Cancuna ima cushcata chasquicunallataca mana yuyanichu, ashtahuanpish cancuna carashcamantaca Taita Diospac ñaupapi ashtahuan charichunmi munani.

COLOSENSES 1:10

Diosman mañacunchic. Chai shina yachacushpami, Jesucristopacta ruhuaccuna ima shina causana cashca shina causashpa, punzhanta Diostaca cushichinguichic. Chashnami grano alli p'ucuc shina, tucui imapipish allita ruhuashpa, Diosmantapish allita yachacunguichic.

COLOSENSES 4:12

Jesucristopacta ruhuac, cancunapuramanta Epafraspish “allilla cashca cachun” nishpami cachan. Cancuna alli c'atishpa, tucui shunguhuan Diospac munaita alli yachashpa, Diospacta ruhuachunmi, punzhanta Taita Diosman mañacunlla.

TITO 1:1

Diospacta ruhuac, shinallatac Apunchic Jesucristo acllashca huillac Pablomi caita quillcashpa cachani. Dios acllashcacuna cashcata nic huillashcata yachashpa, crishpa paipaclla causachunmi, chashnaca huillani.

HEBREOS 12:14

Diospaclla mana causashpaca, pipish Apunchic Jesustaca mana ricungachu. Chaimanta Diospaclla causashpa, tucui mashnahuan apanacushpa, alli causanata munaichic.

SANTIAGO 1:1

Ñucaca Diospacta, Apunchic Jesuspacta ruhuac Santiagomi cani. Israelpac*f** chunga ishcai aillucuna shiguarishpa, caipi chaipi causac criccunata “allillachu canguichic” nishpami, cai quillcata cachani.

1 PEDRO 1:9

Cancunaca crishpa, quishpirinata japigricushcamantami, chashnaca cushicunguichic.

1 PEDRO 2:16

Huatashca shinamanta cacharichishcami canguichic. Shina cashpapish “cacharishcami canchic” nishpaca, ima millaitapish ama ruhuaichicchu. Chaipac randica Diospacta ruhuaccuna shina causaichic.

APOCALIPSIS 7:13

Chaimantaca chai yuyaccunapuramanta shucca: —Chai yuraclla churanata churashcacunaca, ¿picunatac, maimantatac shamushca?— nishpami, ñucaman tapurca.