SAN MATEO 7:15 - Nuevo Testamento en Quichua Cañar 1996

¹⁵ ‘Diosmantami huillacunchic’ nishpa, llullashpa huillaccunamantaca huacaichiringuichic. Paicunaca jahuallatacca, ovejacuna shina c'uyaillami. Shina cashpapish ucu shungupica, atuc shina millaicunami cancunapacmanca shamuncuna.

Dios Rimashcata Quillcashcami

¹⁵ Cancunapacman shamuc llulla huillaccunamanta cuidaringuichic. Paicunaca oveja carata churarishca, cutin ucu shungupica, atuc shina millaicunami.

SAN MATEO 7:15 ပူးပေါင်းရင်းမြစ်များ

SAN MATEO 10:17

Cancunataca, llactata mandaccunamanpish japichingacunami. Paicunaca tandanacuna huasicunaman apashpapish macangacunami. Chaimanta alli yuyaihuan puringuichic.

SAN MATEO 16:11

Ñucaca mana tandapi churana levaduramantachu parlacuni, ¿ashtahuanpish chaitaca manachu entendinguichic? Fariseocunapac, saduceocunapac yachachishcaca levadura shina cashcamantami parlacuni. Chaitaca ama chasquinguichicchu— nirca.

SAN MATEO 16:6

Chaipimi Jesusca: —Uyaichic, fariseocunapac,*f** saduceocunapac*f** levadurataca, pacta chasquinguichicman— nirca.

SAN MATEO 24:11

Shinallatac achca llullac huillaccunami shamushpa, achca gentecunata llullashpa pandachingacuna.

SAN MATEO 7:14

Ashtahuanpish huiñai causaiman apac ñanca, ñanpish, pungupish quichquimi, mana yaicuipacllachu. Ashallacunami chaitaca yaicuncuna.

SAN LUCAS 12:15

Chashnallatac Jesusca: —Charishcacunaca mana causaita cunchu. Chaimanta pacta misa tucushpa, imatapish ashtahuan charina yuyailla canguichicman— nirca.

SAN LUCAS 6:26

¡Aij, tucui gentecunapac ñaupapi alli nishcacunalla, imachari tucunguichic! Chai gentecunapac ñaupa taitacunapish, llullashpa huillaccunataca chashnallatacmi alli nircacuna.

SAN JUAN 10:12

Ashtahuanpish cullquillamanta michicca mana alli michicchu. Mana paipac ovejacuna cashcamantaca atuc shamucta ricushpapish, shitashpa rinllami. Shina ruhuacpica, atucca ovejacunata manchachishpa, maitapish shiguashpa cachanllami.

HECHOS 13:40

Chaimanta alli yuyarichic. Ñaupa huillaccunaman Taita Dios ima shina huillachishcaca, pacta cancuna chashna tucunguichicman. Paica cashnami nishca:

HECHOS 13:6

Tucui chai Chipre llactapi huillashpa puricushpaca, Pafos pueblomanmi chayarcacuna. Chaiman chayashpaca, israelcunapuramanta Barjesús brujo runahuanmi tuparcacuna. Paica: “Diosmantami huillacuni” nishpa, llullac runallami carca.

GÁLATAS 2:4

Ashtahuanpish mandashcacunamanta cacharirishpa, Jesucristohuan shuc shinalla tucushpa causacucta ricungapacllami, “cricmi canchic” nishpa maijancunaca pacalla yaicurcacuna. Paicunaca paicuna shina mandashcapi huatashca shina causachunmi munancuna. Chaimantami Titotaca circuncisionta ruhuachun nircacuna.

EFESIOS 4:14

Shina cashpami ñucanchicca huahuacuna imatapish jahualla cric shina, chai pandachishpa puric, yachac tucushca gentecuna yachachishcata c'atishpa, huaira apashca shinaca ña mana cashun.

EFESIOS 5:6

Chashna mana allita ruhuashcamantami Taita Dios p'iñarishpa, tucui paita mana cazuccunataca llaquichinga. Chaimanta yanga parlocunahuanca pipish cancunata ama pandachichun.

FILIPENSES 3:2

“Circuncisionta*f** ruhuanami canguichic” nishpa mana allita yachachic, allcu shina gentecunamantaca huacaichiringuichic.

COLOSENSES 2:8

Chai llullashpa yachachiccuna cancunata yanga paicuna yuyashcallahuan crichichunca, ama saquinguichicchu. Paicunaca ñaupa taitacuna yachashcallata, shinallatac cai pacha imapish tiyashca manchanallacunatami yachachincuna. Ashtahuanpish Jesucristomantaca mana yachachincunachu.

2 TIMOTEO 3:13

Ashtahuanpish millaita ruhuaccunapish, shinallatac shuccunata pandachiccunapish punzhantami ashtahuan ashtahuan mana allipi c'atingacuna. Chashna cashpami ashtahuan pandachishpa, paicunapish pandaringacuna.

2 TIMOTEO 4:3

Cashcata nic huillashcata mana uyashun nina punzhacuna chayamungami. Gentecunaca paicuna munashca shinata yachachichunmi, shuctac shuctac yachachiccunata mashcanga.

2 PEDRO 3:17

Chaimanta c'uyashca criccuna, puntaman caicunata ña yachashcamantaca, mana allita ruhuaccuna pandata yachachicpi, chaita uyashpa alli c'aticushcata saquishpa paicunata mana c'atingapacca, allimi huacaichirina canguichic.

1 JUAN 4:1

C'uyashca criccuna, cai pachapica taucacunami “Diosmanta huillaccunami canchic” niccuna tiyan. Shina cacpipish ama tucuita cringuichicchu, ashtahuanpish Diospac Espirituhuan cashcata, mana cashcata ricunaracmi canguichic.

SAN JUDAS 1:4

Chaica ñucanchicpurahuanmi, llullashpa yachachishpa maijan llullac huillaccuna tandarishca. Chaicunatami ñaupa punzhacunamanta pacha Diosca jatun llaquiman rina cashcata huillashca. Chaicunaca millai runacunami. “Ñucanchic Taita Dios c'uyacmi” nic tucushpallami, imapipish mana jarcarishpa, mana alliman pushancuna. Chashna ruhuashpami, ñucanchicta Mandac shuclla Apunchic Jesucristotapish “paica mana quishpichicchu” nincuna.

APOCALIPSIS 16:13

Dragonpac shimimantapish, manchana animalpac shimimantapish, llullac huillacpac shimimantapish sapoman riccha quimsa mana alli espiritucuna llucshicuctami ricurcani.

APOCALIPSIS 17:6

Chai huarmitaca Taita Diospaclla caccunapac, shinallatac Jesusmanta huillaccunapac huañuchishca yahuarhuan machashca cashcatami ricurcani. Chaita ricushpaca, yallitami mancharishpa saquirircani.

APOCALIPSIS 19:20

Chai manchana animaltapish, llullashpa huillactapish prezu japircacunami. Chai llullashpa huillacca chai manchana animalpac ñaupapimi pi mana ruhuaipaccunata ruhuashpa ricuchic carca. Cai ruhuashcacunahuanmi chai llullashpa huillacca manchana animalpac shutita frentepi chariccunatapish, shinallatac chai animalman ricchata alli niccunatapish umashca carca. Chai ishcaicunataca causactami azufrehuan rupacuc nina cuchapi shitashca carca.

APOCALIPSIS 20:10

Chai llullashpa crichic diablotaca azufrehuan rupacuc nina cuchamanmi shitashca carca. Chaipica llullashpa huillactapish, manchana animaltapish shitashcami carca. Chaipica tutapish, punzhapish huiñaitami llaquichishca canga.