SAN MATEO 24:31 - Nuevo Testamento en Quichua Cañar 1996

³¹ Chashna shamushpaca, ñuca angelcunatami cachasha. Trompetapi sinchita tocacpi, paicunami ñuca acllashcacunata cai pachapi tiyac mai llactacunamantapish tandachingacuna.

Dios Rimashcata Quillcashcami

³¹ Ñuca angelcunata cachashpami. Paicunami trompetapi sinchita tocashpa, ñuca acllashcacunataca tucui cai pachamanta tandachinga.

SAN MATEO 24:31 ပူးပေါင်းရင်းမြစ်များ

SAN MATEO 13:41

Runa Tucungapac shamushca ñucami, ñuca mandashca causaccunapurapi mana alli ruhuaccunatapish, shuccunata pandachiccunatapish tandachichun, ñuca angelcunata cachasha.

SAN MATEO 24:22

Chai llaqui punzhacunata Taita Dios mana ashata chaupicpica, pipish mana causai pudinmanchu. Ashtahuanpish Taita Diosca pai acllashcacunata c'uyashcamantami, chai llaqui punzhacunataca chaupinga.

SAN MATEO 24:24

Chai punzhacunapica ‘ñucami Cristo cani’ nishpa huillaccunapish, ‘Diosmantami huillacunchic’ niccunapish tiyangami. Chaicunaca pi mana ruhuaipaccunatapish, pi mana ricushcacunatapish ruhuashpa ricuchingami. Chashna ruhuashpaca, Taita Dios acllashcacunatapish ima shinapish pandachinatami yuyangacuna.

SAN MATEO 24:32

Higo yura ima shina tucucta ricushpa, yuyaita japichic. Chai yurapi p'angacuna cutin huiñashpa jundarimucta ricushpaca, ña usiai chayamucuctami yachanguichic.

SAN MATEO 25:31

Runa Tucungapac shamushca*f** ñuca mandangapac cutimushpaca, sumaimana cashcahuan achicyachishpa, tucui angelcunandicmi shamusha. Chashna cutimushpaca, jatun sumaimana tiyarinapimi tiyarisha.

SAN MATEO 28:18

Jesús paicunapacman cuchuyashpaca: —Taita Diosca ñucataca, cai pachapi jahua pachapi tucui imatapish Mandactami ruhuarca.

MARCOS 13:27

Chashna shamushpaca, ñuca angelcunatami cachasha. Paicunami ñuca acllashcacunataca cai pachapi tiyac mai llactacunamantapish tandachinga.

SAN LUCAS 24:47

Chai q'uipaca Jerusalén pueblomanta callarishpa, tucui llactacunapi causaccunamanmi: ‘Juchayuc cashcamanta llaquirishpa, Taita Diosman cutirichic. Shina cutiricpimi, Taita Diosca cancunapac juchacunata perdonanga’ nishpa huillanguichic.

SAN JUAN 11:52

Mana chai llactapi causaccunallamantachu huañuna carca, ashtahuanpish caita chaita rishpa causacuc Diospac huahuacunaca tandarishpa, shuclla tucushpa causachunmi huañuna carca.

ROMANOS 10:18

Shina cacpipish: “Cristomanta huillashcataca, ¿manachu uyarcacuna?” nishpami tapuni. ¡Paicunaca uyarcacunami! Dios quillcachishcapica: “Paicuna huillashcaca tucui cai pachapimi uyarishca. Shinallatac paicuna rimashcacunaca allpa tucuricamanmi uyarishca” ninmi.

1 CORINTIOS 15:52

Chashnaca ñahuita quimllai shinallapimi, tucuri trompeta tocashpa uyaricpica, ñucanchicca shuctacyachishca cashun. Shinallatac huañushcacunaca mana cutin huañungapacmi causachishca canga. Shinallatac ñucanchicca shuctacyachishcami cashun.

EFESIOS 1:10

Taita Diosca cai cusha nishcataca pactana punzha chayacpimi pactachirca. Jahua pachapi, cai pachapi tiyac imacunatapish Cristo mandachunmi, tandachishpa chashnaca ruhuarca.

1 TESALONICENSES 4:16

Mandac Dios caparishcapish, angelcunata mandac ángel caparishcapish, shinallatac Taita Diospac trompeta tocashcapish uyaringami. Chashna uyaricpica, Apunchic Jesusllatacmi jahua pachamanta shamunga. Chashna tucucpica, maijanpish Apunchic Jesusta crishpa huañuccunaracmi causaringa.

2 TESALONICENSES 2:1

Cunanca c'uyashca criccuna, ñucanchic Apunchic Jesús cutimunamantapish, ñucanchic paihuan tandanacunamantapishmi huillashun ninchic.

HEBREOS 12:19

Shinallatac trompeta tocashcatapish, Dios rimashcatapish mana uyarcanguichicchu. Chaita uyaccunaca ama ashtahuan rimarishpa c'atichunmi mañarcacuna.

APOCALIPSIS 1:20

Ñuca alli maquipi canchis lucerocunata charicushcaca, shinallatac canchis candelerocunata can ricushcaca caitami nisha nin: Canchis lucerocunaca, canchis pueblocunapi cac tandanacushca criccunapac angelcunami. Shinallatac canchis candelerocunaca, canchis pueblopi cac tandanacushca criccunami.

APOCALIPSIS 11:15

Canchis niqui angelmi paipac cornetapi sinchita tocarca. Chashna sinchita tocacpimi, jahua pachapi caccunaca: —Tucui cai allpa pachapi cac llactacunaca, ñucanchic Taita Diospac, shinallatac pai cachashca Quishpichic Cristopac mandanami tucushca. Paimi huiñai huiñaita mandanga— nishpa, sinchita caparishcatami uyarcani.

APOCALIPSIS 7:1

Chai q'uipaca cai pachapi tiyac chuscu esquinacunapi chuscu angelcuna shayacuctami ricurcani. Chaicunaca cai pacha allpatapish, mama cuchatapish, ima yuracunatapish ama huaira huactachunmi, chuscu esquinacunapi jarcashpa shayacurca.

APOCALIPSIS 8:2

Chai q'uipaca canchis angelcuna Taita Diospac ñaupapi shayacuctami ricurcani. Paicunaca canchis cornetatami chasquirca.