HECHOS 13:3 - Nuevo Testamento en Quichua Cañar 1996

³ Ña ayunashpa mañashca q'uipaca, Bernabepac, Saulopac uma jahuapi maquita churashpami: “Allilla ringuichic” nishpa cacharcacuna.

Dios Rimashcata Quillcashcami

³ Ayunashpa mañashca quipaca, Bernabepac, Saulopac uma jahuapimi maquita churashpami cacharca.

HECHOS 13:3 ပူးပေါင်းရင်းမြစ်များ

SAN LUCAS 2:37

Shinami, ña pusac chunga chuscu huatata viuda causarca. Chai yuyac huarmica Diosman mañana huasiman rinata mana saquishpami, tutapish, punzhapish Diosta servishpa, ayunashpa, Taita Diosman mañashpa causac carca.

HECHOS 1:24

Chaimantaca: “Mandac Taita Dioslla, canmi tucui gentecunapac shunguta ricsingui. Cunanca cai ishcaicunamantaca, maijantapish can acllashcata ñucanchicman ricuchiyari.

HECHOS 13:2

Shuc punzha paicuna ayunashpa, Taita Diosman mañashpa tiyacucpimi, Diospac Espirituca: “Bernabetapish, Saulotapish ñuca ruhuai nishcata ruhuachun cachaichic. Paicunataca ñami acllarcani” nirca.

HECHOS 13:4

Chashna Diospac Espíritu paicunata cachacpica, Bernabeca Saulondicmi Seleucia puebloman chayarcacuna. Seleuciamantami, barcopi tiyarishpa Chipre llactaman rircacuna.

HECHOS 14:23

Shinallatac tandanacushca criccunapurapica, maipipish pushac runacunataca acllarcacunami. Chashna acllashpaca, ayunashpa Taita Diosman mañashpami, paicuna crishca Apunchic Jesusman mingarcacuna.

HECHOS 14:26

Chai Atalia pueblomantaca barcopi tiyarishpami, Pabloca Bernabendic Antioquía puebloman cutircacuna. Chai pueblomantami, criccunaca paicunata Taita Dios huacaichichun nishpa mingashca, llucshirishca carcacuna.

HECHOS 15:40

Shinallatac Pablopish Silasta acllashpa ri callaricpica, Taita Dios mai c'uyashpa alli pushachunmi, criccunaca Taita Diosman mingarcacuna.

HECHOS 6:6

Ña chashna acllashpaca, Jesús acllashca huillaccunapacmanmi pushamurcacuna. Paicunaca chai runacunapac uma jahuapi maquita churashpami, Taita Diosman mañarcacuna.

HECHOS 9:17

Chashna nicpi, Ananiasca Saulo shuyacuc huasiman rishpa, Saulopac uma jahuapi maquita churashpaca: —Huauqui Saulo. Can caiman shamucucpi, ricuric Apunchic Jesusllatacmi, cambac ñahui cutin ricuchun, shinallatac Diospac Espíritu cambac shungupi junda cachunpish, ñucataca cambacman cacharca— nirca.

ROMANOS 10:15

Shinallatac quishpirinamanta huillachun pipish mana cachacpica, ¿ima shinatac huillangacunayari? Dios quillcachishcapica: “Alli huillaita huillangapac chayaccunaca, ¡mai sumacmi can!” ninmi.

1 TIMOTEO 4:14

Criccunata pushaccuna cambac uma jahuapi maquita churashpa mañacpica, Dios imata ruhuachun cushcata pacta cungaringuiman. Paicunaca Taita Dios yuyaita cucpimi, chashnaca ruhuarcacuna.

1 TIMOTEO 5:22

Maijanpish Taita Diospacta ruhuachun uma jahuapi churashpa Taita Diosman mañangapacpish, puntaca alli yuyarinami cangui. Pacta juchayuccunaman tucushpa, mana allita ruhuanguiman. Tucui imapish mana allimantaca huacaichiringui.

2 TIMOTEO 1:6

Shina cashcamanta cambac uma jahuapi ñuca maquita churacpi, Taita Dios ima ruhuana cashcata cushcataca, nina huañugricucta causachic shina cutin causachichunmi nini.

2 TIMOTEO 2:2

Tauca gentecunapac ñaupapimi ñuca ima yachachishcataca uyarcangui. Chaitaca yachachinata pudic alli criccunaman, paicunapish shuccunaman yachachichun mingai.

3 JUAN 1:6

Paicunami can ima shina c'uyaita charishcataca tandanacushca criccunapac ñaupapi huillarcacuna. Paicuna ashtahuan Diospacta ruhuashpa purichunmi, imallahuan ayudashpa c'atichun mañani.

3 JUAN 1:8

Chaimantami ñucanchic criccunaca paicunata imallahuan ayudashpa, cashcata nic alli huillaita huillanata ayudanacuna canchic.