HEBREOS 6:19 - Nuevo Testamento en Quichua Cañar 1996

¹⁹ Cai shuyacushca yuyaica, barcota charic llashac fierro anclas shinami, ñucanchic almataca alli sinchita chariracun. Shinallatac cai shuyacushcami, jahua pacha Diosman mañana huasipi tiyac, lienso pañu jarcashca Diospaclla ucuman ñucanchictaca yaicuchin.

Dios Rimashcata Quillcashcami

¹⁹ Cai shuyacushca yuyaica, barcota charic llashac fierro anclas shinami, ñucanchic yuyaitaca alli sinchita charicun. Cai shuyacushcami, ñucanchictaca jahua pacha Diosta mañana huasipi tiyac, lienzo paño jarcashca Diospaclla ucuman yaicuchin.

HEBREOS 6:19 ပူးပေါင်းရင်းမြစ်များ

SAN MATEO 27:51

Chai pachami Diosman mañana huasi ucupi jarcachishca liensoca, jahuamanta uraiman chaupita lliquirirca. Shinallatac allpa chucchucpi, jatun rumicunapish chictarircami.

HECHOS 23:6

Chai tandanacushca mandaccunapuramanta maijancunaca saduceocuna,*f** maijancunaca fariseocuna*f** cacta ricushpami, tucui chaipi caccunapac ñaupapi Pabloca sinchita rimashpaca: —Caipi tandanacushca huauquicuna. Ñucaca fariseo runami cani. Ñuca taitapish fariseomi. Taita Dios huañushcacunata causachinata crishcamantami, caipi cancuna ñucata tapushpa juchanchicunguichic— nirca.

HECHOS 27:29

Rumicunapi huactarinata manchashpami, barcota charic chuscu anclacunata huashaman cacharircacuna. Tutarac cacpimi, ña punzhayamanlla nicurcacuna.

HECHOS 27:40

Yacu ucuman cacharishca anclacunata charicuc huascacunata p'itishpami, chai anclacunataca yacullapitac saquircacuna. Barcota caiman chaiman apac caspicunataca cacharishpa, barcota purichic ñaupa lado liensotapish jahuaman churacpimi, huairaca barcotaca allpaman cuchuyachi callarirca.

ROMANOS 4:16

Abraham crishcamantami, paipac huahua huahuacunamanca Taita Dios cusha nishca pai c'uyashcallamanta cushca cachun, chashnaca nishca. Dios cushami nishcaca mana mandashcacunata cazuccunallamanchu, ashtahuanpish Abraham shina tucui criccunamanpish canmi. Chashna cacpimi, Abrahamca tucui ñucanchicpac taita shina tucushca.

ROMANOS 4:18

Taita Diosca Abrahamtaca: “Cambac huahua huahuacunaca achcami tucunga” nishcami. Abrahamca maita mana huahuata charipac cashpapish, crishpa shuyacushcamantami, chai nishca shinallatac tauca llactacunapi causaccunapac taita tucurca.

ROMANOS 5:4

Chashna alli crina yuyaita charishpami, alli nishca cashun. Chai shina alli nishca cashpami, cushicuihuan shuyacushun.

1 CORINTIOS 13:13

Caicunamanta nishpaca, crinapish, imata shuyana cashcata shuyanapish, shinallatac c'uyaita charinapish tiyashpa c'atingallami. Ashtahuanpish cai quimsacunamanta yallica c'uyaimi.

1 CORINTIOS 15:58

Shina cashcamanta ñuca c'uyashca criccuna, pi ama urmachichunca Apunchic Jesusta tucui shunguhuan crishpa c'atiraichic. Apunchic Jesuspac ruhuaitaca punzhanta ashtahuan ashtahuan ruhuacuichiclla. Apunchic Jesushuan shuc shinalla tucushcamantaca, cancuna imata ruhuashcapish mana yanga cashcataca cancunallatac yachanguichicmi.

EFESIOS 2:6

Ñucanchictapish Taita Diosca Jesucristohuan causachishpami, jahua pachapi paihuan pacta tiyachirca.

COLOSENSES 1:27

Chashnami Taita Diosca paipaclla causaccunaman yachachishpa, pacashca cashca sumaimana alli cashcata tucui gentecunaman ricuchisha nirca. Chai pacashca huillasha nicushcaca, cancunapi causacuc Cristomi can. Cristo cancunapi causacushcamantami, japina cashca sumaimana cashcataca ricuna yuyailla canguichic.

COLOSENSES 3:1

Cancunaca ña Cristohuan pacta causarishca cashcamantaca, jahua pachapi japigrina yuyailla caichic. Jahua pachapica, Cristomi Taita Diospac alli maqui ladoman tiyacun.

2 TIMOTEO 2:19

Shina cacpipish Taita Diosca huasita ruhuangapac callaripi churashca rumi shinatami, paipac rimashcataca churashca. Chai rimashcaca: “Taita Dios pai acllashcacunataca ricsinmi. Shinallatac Diosta criccunaca tucui millaimanta anchurinami can” nishcami.

HEBREOS 4:16

Chaimanta c'uyac Dios ñucanchicta llaquichun, shinallatac ima llaquihuan cacpipish paipac jatun c'uyaimanta ayudachun, paipacman tucui shunguhuan cuchuyashpa mañashunchic.

HEBREOS 9:3

Chaipac q'uipa jarcachishca ucuca, Diospaclla ch'icanyachishca ucumi carca.

HEBREOS 9:7

Ashtahuanpish chai yaicushcalla ucumanta, q'uipa ucumanca curacunata jatun mandac curallami huatapi shuc cutinlla yaicuc carca. Chaiman yaicushpaca, pai quiquinpac juchamantapish, imatapish mana yachashpa gentecuna juchallishcamantapish, Diosman cungapac animalcunata huañuchishca yahuartami apashpa yaicuc carca.

1 PEDRO 1:3

¡Ñucanchic Apunchic Jesucristopac Taita Diostaca “allimari cangui” nishunchic! Ñucanchic huiñaita causagrina yuyailla cachunmi, paipac sumaimana c'uyaimanta Jesucristota causachishpa, ñucanchictaca cutin huacharishca shinata ruhuarca.