FILIPENSES 4:8 - Nuevo Testamento en Quichua Cañar 1996

⁸ C'uyashca criccuna, cunanca ña caillatami nisha nini: Tucui imapipish mana llullac canata, shuccuna alli nishca canata, tucui imatapish allita ruhuac canata, tucui imapipish mapa illac canata, pimanpish c'uyaita ricuchic canata, shinallatac tucuipac alli nishca canatapish yuyaichic. Chai shina yuyaicuna tiyacpica, chaillata yuyashpa c'atichic. Tucui imapipish alli nishca canallata yuyaichic.

Dios Rimashcata Quillcashcami

⁸ Cuyashca criccuna, tucuri shimicunata rimashpaca: “Tucui imapipish mana llullac canata, shuccuna munashca canata, tucui imatapish allita ruhuac canata, tucui imapipish mapa illac canata, pimanpish cuyaita ricuchic canata, shinallatac sumac, tucuipac alli nishca cana yuyaicuna tiyacpica, chaillata yuyashpa catichic” ninimi.

FILIPENSES 4:8 ပူးပေါင်းရင်းမြစ်များ

SAN MATEO 22:16

Chashna yuyarishpami, paicunapac yachacuccunapuramanta, shinallatac mandac Herodespac runacunapuramanta tapuchun cacharcacuna. Shina cachacpi tapuccuna rishpaca: —Yachachiclla. Canca imapish cashcallatami yachachingui, shinallatac Taita Dios munashca shina causachunpish, allimi yachachingui. Canca pitapish mana manchashpa, mana piman tucushpa yachachic cashcatami yachanchic.

MARCOS 6:20

Juantaca cashcata ruhuac, Diospaclla causactami Herodesca yacharca. Chaimantami paita manchashpa, mana imata ruhuachishpa alli charirca. Imata ruhuanata yuyacushpapish, Juan huillacpica, cushilla uyacllami carca.

SAN LUCAS 16:15

Shina asicpimi, Jesusca: “Cancunami gentecunapac ñaupapica, allicuna layalla ricuringuichic. Chashna cacpipish, Taita Diosca cancunapac shungu imata yuyacushcataca yachanmi. Cai pachapi gentecunalla alli nishcacunaca, Taita Diospac ñaupapica millana shinami can.

SAN LUCAS 2:25

Chai punzhacunallapitacmi, Simeón runaca Jerusalenpi causacurca. Paica Diosta manchac, paita cazuc cashpami, israelcunata*f** Taita Dios quishpichingapac shamucta shuyacurca. Simeonca Diospac Espirituhuanmi carca.

SAN LUCAS 23:50

Chai punzhacunallapitacmi Judea llactapi tiyac Arimatea pueblomanta, Taita Diosta alli cazuc, shinallatac gentecunapacpish alli nishca José runa causarca. Paica israelcunata*f** mandaccunapuralla tandanacushcapuramantami carca.

SAN JUAN 7:18

Quiquin munaillamanta rimacca, gentecunapi alli llucshingaraicullami riman. Shina cacpipish Cachacta allipi llucchicmi, imapish cashcata nin. Paica jaicapi mana llullanchu.

HECHOS 10:22

Chashna nicpi paicunaca: —Ñucanchicca pasac soldadocunata mandac Cornelio cachacpimi shamunchic. Paica Diosta cazushcamanta tucui israelcuna alli nishca runami. Paimanmi Dios cachashca ángel ricurishpaca, paipac huasiman canta pushamuchun, shinallatac can ima huillashcatapish uyachun nishca— nircacuna.

HECHOS 22:12

Chai pueblopica, Moisés mandashcacunata alli cazuc, tucui chaipi causac israelcunapacpish*f** alli nishca Ananías runami causacushca carca.

HECHOS 6:3

Chaimanta huauquicuna: Cancunapuramanta alli yachac, alli causac, Diospac Espíritu shungupi junda, canchis runacunata acllaichic. Paicunamanmi micunata chaupichunca, mingashun ninchic.

ROMANOS 13:13

Shina cashcamanta punzhapi puricuc shina, allita ruhuashpa causashunchic. Jatun micuitapish, ubianatapish ama ruhuashunchic, ama huacllirishunchic, ama p'iñanacuipi churashunchic, shuccuna ama charichun nishpa ama munashunchic, shinallatac ima mana allicunatapish ama ruhuashunchic.

ROMANOS 13:3

Mandaccunaca allita ruhuaccunata mana manchachingapacchu, ashtahuanpish mana allita ruhuaccunata manchachingapacmi can. Mandaccunata mana manchashpa causasha nishpaca, allita ruhuashpa causai. Shina causacpimi, mandaccunaca allimi ninga.

ROMANOS 14:18

Chai shina ruhuashpa, Cristopacta ruhuacmi Taita Diostapish cushichin, shinallatac runacunapacpish alli nishca can.

ROMANOS 2:29

Israeltac canaca mana gentecunapac ricuillapichu, ashtahuanpish ucu yuyaimantami israel cana. Shinallatac circuncisionta ruhuashcapish shungumantami cana. Chai yuyaica mana imata ruhuachun nishpa quillcashcamantachu, ashtahuanpish Diospac Espiritumantami shamun. Chashna caccunataca mana gentecunachu alli nin, ashtahuanpish Taita Diosmi alli nin.

1 CORINTIOS 4:5

Shinashpaca maijanta juchanchina cacpipish, Apunchic Jesús cutimungacaman amarac imata juchanchinguichicchu. Paimi amsapi imalla pacashcacunatapish, shungu imata yuyashcatapish punzhapi shina tucui ricuchinga. Shina cacpimi, Taita Diosca quiquin imata ruhuashcata ricushpa alli ninga.

2 CORINTIOS 13:7

Cancuna imapish mana allita ama ruhuachunmi, Taita Diosman mañanchic. Chashnaca mana ñucanchic allipi ricuringaraicuchu mañacunchic, ashtahuanpish ñucanchicta pandarishcami nishpa juchanchicucpish, cancuna allicunata ruhuachunmi mañanchic.

2 CORINTIOS 6:8

Maijan cutinca alli nishcami canchic. Maijan cutinca mana alli nishcami canchic. Shinallatac maijan cutinca “allicunami” nincunami. Maijan cutinca “mana allichu” nincunami. Cashcata nicucpipish, “llullaccunami canguichic” nincunami.

2 CORINTIOS 8:18

Alli huillaita huillacushcamanta tucui tandanacushca criccunapac alli nishca, shuc huauquitami Titohuanca cachani.

2 CORINTIOS 8:21

Shina ruhuashpaca, mana Apunchic Jesuspac ñaupallapi alli ricuringapac, ashtahuanpish gentecunapac ñaupapipish alli ricuringapacmi chashna ruhuacunchic.

GÁLATAS 5:22

Ashtahuanpish Diospac Espíritu yuyaita cushca causaccunaca c'uyaccunami, cushi causaccunami, sumacta causaccunami, mana utca p'iñariccunami, llaquiccunami, cuccunami, imatapish pactachiccunami,

EFESIOS 4:25

Tucui criccuna shuc shinalla cashcamantaca ña ama ashtahuan llullashpa, caishuc chaishuchuan imapish cashcallatac nichic.

EFESIOS 5:9

Achic luzca alli shungu canata, imapish cashcata ruhuanata, shinallatac mana llullac cana yuyaitami cun.

EFESIOS 6:14

Shina cashpaca, cashcata nic huillashcahuanca chumbillishca shina sinchi caichic. Shinallatac imatapish cashcata ruhuanataca, shunguta pacac fierro churanata churaric shina churashca caichic.

FILIPENSES 3:1

C'uyashca criccuna, ¡Apunchic Jesushuan shuc shinalla cashcamanta cushicuichic! Ñucamanca chaillatatac, chaillatatac nishpa quillcanaca, mana shaicuchinchu. Cashna nishpa quillcanaca, cancunamanca mai allimi canga.

COLOSENSES 4:5

Mana criccunahuan tandarishpaca, yachaccuna shina alli caichic. Shinallatac huillana cacpica, paicunaman huillanguichiclla.

1 TESALONICENSES 4:12

Chashna ruhuashpa causashpami, imapish mana illaclla, shinallatac mana criccunapacpish alli nishca causanguichic.

1 TIMOTEO 2:2

Tucui ñucanchic sumacta apanacushpa causangapacca, jatun mandaccunamantapish shinallatac llactata mandaccunamantapish Taita Diosman mañashpami causachun munani. Shina mañashpami Diosta cazushpa, imapipish alli nishca cashun.

1 TIMOTEO 3:11

Shinallatac huarmicunapish tucuipac alli nishca, pihuanpish mana huashalla parlaric, alli yuyaita charic, imapipish allita ruhuaccunami cana can.

1 TIMOTEO 3:4

Paipac huasipipish allita pushashpa causac, huahuacunatapish alli cazuchic, alli canata yachachicmi cana can.

1 TIMOTEO 4:12

Criccuna canta ricushpa allita causachunca, allita ruhuashpa, alli shimicunata rimashpa, alli c'uyac, alli cric, shinallatac ima mapa yuyaicuna illacmi cana cangui. Pacta cantaca “huambraracmi” nishpa rimanmancuna.

1 TIMOTEO 5:10

Paicunaca paicunapac huahuacunata alli huiñachic, huasiman shamuccunatapish alli chasquic, llaquilla causaccunata cushichic, criccunapac chaquita jahuac, shinallatac imatapish allita ruhuaccunami cana can. Tucui cai allicunata ruhuashcamantami, tucuipac alli nishca cana can.

1 TIMOTEO 5:2

Ñaupa huiñai mamitacunataca quiquin mamata shina, shinallatac q'uipa huiñai solteracunataca quiquin panita shina chuya shunguhuan rimangui.

TITO 1:8

Chai mana allicunata ruhuanapac randica, huasiman maijan chayacpipish alli chasquic, imatapish allita ruhuac, cashcata ruhuac, Diospaclla ch'icanyarishca, alli yuyaiyuc, shinallatac tucui ima millaimanta quiquinllatac jarcaricmi cana can.

TITO 2:14

Paica juchacunata anchuchishpa tucui millaimanta quishpichingapac, shinallatac paipaclla cashpa imapish allita ruhuaccuna cachunmi, ñucanchicmanta llaquita apashpa huañurca.

TITO 2:2

Ñaupa huiñai taitacunataca mana p'iñaric, mana pucllaric, alli yuyaiyuc, alli cric, c'uyac, mana p'iñarishpa llaquita apac cachun yachachingui.

TITO 2:7

Ima ruhuaipipish canrac allita ruhuashpa ricuchingui. Yachachicushpapish ama pucllarishpa, ama nic tucushpalla yachachingui.

TITO 3:14

Chashna ñucanchicpuramanta caccunaca allita ruhuashpa, huacchacunaman ima illashcata cushpa ayudashpa, Taita Diospac ñaupapi allicuna cachunmi nini.

HEBREOS 11:2

Ñucanchic ñaupa taitacunataca, paicuna crishcamantami Taita Diosca chasquirca.

HEBREOS 13:18

Ñucanchicmanta Diosman mañaichic. Imapish alli cachun nishpa allita pushana yuyailla cashpami, pipacpish mana juchanchishca cashcata yachanchic.

SANTIAGO 1:27

Maijanpish Taita Diospac ñaupapi Diosta tucui shunguhuan alli cricca, llaquilla cac viuda huarmicunatapish, taita mamata mana charic llaquilla cac huahuacunatapish ayudanami can. Shinallatac cai pachapi tiyac imapish juchallinacunamantaca huacaichirinami can.

SANTIAGO 3:17

Ashtahuanpish Dios cushca yuyaita chariccunaca, puntaca chuya shungu causanatami munancuna, shinallatac sumactami causancuna. Paicunaca alli shungucunami, imamantapish mana p'iñariccunachu, llaquiccunami, pimanpish mana tucuccunachu, imatapish mana huashalla rimaccunachu.

1 PEDRO 1:22

Cunanca tucui shunguhuan criccunapura c'uyanacungapacmi, cashcata nic alli huillaita cazushpa, cancunapac almataca chuyayachishca canguichic. Chashna cashcamantami chuya shunguhuan, tucui munaihuan criccunapura c'uyanacuna canguichic.

1 PEDRO 2:12

Diosta mana cazuccunapac ñaupapica allita ruhuashpa causaichic. Shina causacpimi, cancunata cunan “millaita ruhuaccuna” nishpa juchanchishpapish, cancuna allita ruhuacushcata ricushpaca, Dios taripana punzhapica Taita Diosta “allimari cangui” ningacuna.

1 PEDRO 4:8

Tucuimanta yallica caishuc chaishuc c'uyanacuichic. Chashna c'uyanacushpaca, achca juchacunatami perdonanguichic.

2 PEDRO 3:1

C'uyashca criccuna, caihuanca ishcai cutinmi cancunamanca quillcashpa cachani. Ishcai quillcacunapitacmi alli yuyaihuan allita c'atichun nishpa, cunashpa rimani.

1 JUAN 3:18

Ñuca c'uyashca huahuacuna, ama shimillahuan “c'uyanimi” nishunchic, ashtahuanpish imatapish ruhuashpatac c'uyashcata ricuchishunchic.

1 JUAN 3:3

Chashna cashcamanta maijanpish pai yuyailla cacca, paillatacmi Jesucristo ima jucha illac cashca shinallatac tucui mapamanta anchuricun.

1 JUAN 4:1

C'uyashca criccuna, cai pachapica taucacunami “Diosmanta huillaccunami canchic” niccuna tiyan. Shina cacpipish ama tucuita cringuichicchu, ashtahuanpish Diospac Espirituhuan cashcata, mana cashcata ricunaracmi canguichic.