FILIPENSES 1:8 - Nuevo Testamento en Quichua Cañar 1996

⁸ Jesucristo c'uyac shinallatac, ñuca tucui shunguhuan cancunata c'uyacushcataca Taita Diosllatac yachanmi.

Dios Rimashcata Quillcashcami

⁸ Jesucristo cuyac shinallatac, ñuca tucui shunguhuan cancunata cuyacushcataca Diosllatacmi yachan.

FILIPENSES 1:8 ပူးပေါင်းရင်းမြစ်များ

SAN LUCAS 1:78

Ñucanchic Taita Diosca c'uyashpa llaquishcamantami, tutamanta inti achicyamucuc shina, quishpirinata jahua pachamanta cachanga.

ROMANOS 1:9

Ñuca cancunamanta punzhanta mañacushcataca Diosllatac yachanmi. Ñucaca tucui shunguhuan paipacta ruhuashpami, paipac Churimanta alli huillaita huillacuni.

ROMANOS 9:1

Apunchic Jesusta cric cashcamantami, imatapish mana llullashpa cashcatatac nicuni. Shinallatac ñuca yuyaipish Diospac Espíritu pushashca cashcamantaca, caicunaca alli cashcatami yachani.

2 CORINTIOS 13:9

Chaimanta ñucata “shina shinalla cricmi” nicucpipish, cancuna ashtahuan sinchi criccuna cacpimi cushicuni. Cancuna Cristota c'atishpa, ashtahuan sinchiyangacamanmi, Taita Diosman mañashpa c'aticushalla.

2 CORINTIOS 6:12

Ñucanchicca cancunamanca tucui shungu yuyashcatami huillacunchic, ashtahuanpish cancunami pacashpa mana huillanguichic.

2 CORINTIOS 7:15

Cancuna paita alli nishpa, c'uyac shunguhuan chasquishcata yuyarishpa, shinallatac tucui cancuna pai nishcata ruhuacushcamantami, ashtahuan c'uyan.

GÁLATAS 1:20

Taita Dios ricucucpimi, mana llullashpa caicunataca quillcani.

GÁLATAS 3:26

Tucui cancunami Jesucristota crishcamantaca, Diospac huahuacuna canguichic.

GÁLATAS 4:19

C'uyashca huahuacuna, cutinllatacmi shuc huarmi sajuarina nanaihuan llaquita apacuc shina, cancunamanta llaquita apacuni. Chashnami cancuna Cristo causashca shina causangacaman llaquita apacushalla.

FILIPENSES 2:1

Cristo paipac c'uyaihuan cancunata sinchiyachishpa cushichicucpica, Diospac Espiritupish cancunahuanmi. Chaimantami caishuc chaishuc c'uyanacuipish, llaquinacuipish tiyan.

FILIPENSES 2:26

Epafroditoca tucui cancuna ima shina cashcata ricugrina yuyaillami puricun. Ashtahuancarin pai ungushca cashcata cancuna yachashcamantami, tucui shungumanta llaquiricun.

FILIPENSES 4:1

Shina cashcamanta c'uyashca criccuna, Apunchic Jesushuan shuc shinalla cashcamantaca, imapipish sinchi caichic. Cancunaca ñucata cushichiccunami canguichic. Shinallatac cancunamantami coronatapish japisha. Chaimantami c'uyashca criccuna, cancunata ricuna yuyailla cani.

COLOSENSES 2:1

Ñucaca cancunamantapish, Laodicea pueblopi caccunamantapish, shinallatac tucui ñucata ñahui ñahui mana ricsiccunamantapish llaquita apashpa, tucui yuyaihuan ruhuacushcatami yachachun munani.

COLOSENSES 3:12

Taita Diosca cancunata c'uyashpami, paipaclla cachun acllarca. Chaimantami mushuc churanata churaric shina, shungumanta llaquishpa, c'uyashpa, mana jatun tucushpa, mana p'iñarishpa, shinallatac c'uyac shunguhuan causana canguichic.

1 TESALONICENSES 2:5

Mishquilla shimicunahuan jatun tucungaraicu jaicapi mana rimashcatapish, cullquita japingaraiculla imata mana ruhuashcatapish cancunallatac yachanguichicmi, shinallatac Taita Diospish yachanmi.

1 TESALONICENSES 2:8

Cancunata mai c'uyashpami, quishpirinamanta alli huillaita huillashpallapish mana saquishun nircanchic, ashtahuanpish quiquin causaitapish cunatami munarcanchic. Cancunataca maimi c'uyanchic.

2 TIMOTEO 1:4

Ñucaca can huacashcataca yuyaricunillami. Shina cashcamanta cantaca ñahui ñahui ricushpa cushicunatami munani.

FILEMÓN 1:12

Paitaca cambacllamantacmi cachani. Chaimanta ñucata chasquic shinallatac, paitaca chasquingui.

FILEMÓN 1:20

C'uyashca huauqui, Jesusta cric cashcamanta ñuca nishcacunata ruhuashpa cui. Chashna ruhuashpa ñuca shunguta cushichishpami, Apunchic Jesucristomanpish allita ruhuangui.

1 JUAN 3:17

Shina cacpica cai pachapi imalla tiyashcacunata charishpapish, shuc cric ima illaclla cashcata ricushpa mana llaquicca, ¿ima shinatac Diospac c'uyaitaca paipac shungupica charingayari?