2 TIMOTEO 1:10 - Nuevo Testamento en Quichua Cañar 1996

¹⁰ Chashnami Quishpichic Jesucristota cai pachaman cachashpa, Taita Diosca c'uyac cashcata ricuchirca. Pai quishpirinamanta huillashpa, huañuita chingachirca, shinallatac mana chingarina causaitapish apamurca.

Dios Rimashcata Quillcashcami

¹⁰ Cunanca Quishpichic Jesucristota cai pachaman cachashpami, Diosca cuyac cashcata ricuchirca. Paimi huañuita chingachishpa, quishpirinamanta huillashpa, mana chingarina causaita ricuchirca.

2 TIMOTEO 1:10 ပူးပေါင်းရင်းမြစ်များ

SAN LUCAS 11:36

Cambac tucui shungupi luz shina alli yuyai tiyacpica, ima amsa mana tiyangachu. Luzta japichicpi achicyachic shinami, canpi tiyac luzhuan tucuita alli ricungui” nirca.

SAN LUCAS 13:7

Chashna imata mana tarishpaca, chagrata cuidactami: ‘Ñami quimsa huatata cai yurapica ima mana p'ucushcata ricuni. ¿Imapactac cai allpapi yanga shayacungallari? P'itishpa shitai’ nirca.

SAN LUCAS 2:11

Cunanmi David huacharishca Belén pueblopica, gentecunata Quishpichic huacharishca. Paimi tucuita Mandac, Quishpichic Cristo.

SAN JUAN 1:9

Chai Achicyachicmi tucui gentecunata achicyachingapactac cai pachaman shamurca.

SAN JUAN 14:6

Shina nicpi Jesusca: —Ñucami cashcatatac nicpish, Diospacman pushacpish, shinallatac causaita cucpish cani. Ñucallamantami Taita Diospacmanca chayangacuna.

SAN JUAN 20:31

Chashna cacpipish cancuna Jesusta Quishpichic Cristo cashcatapish, Diospac Churi cashcatapish crichun, shinallatac paita crishpa huiñai causaita charichunmi, caicunataca quillcani.

SAN JUAN 4:42

Chaimantami chai huarmitaca: —Cunancarin mana can huillashcallamantachu crinchic, ashtahuanpish ñucanchicllatac pai ima nishcataca uyashcanchic. Chaimantami cai pachapi causaccunata quishpichingapac shamushca cashcatatac yachanchic— nircacuna.

SAN JUAN 5:40

Cancuna chai causaita charingapacpish, ñucapacmanca mana shamushun ninguichicchu.

HECHOS 13:23

Israelcunata quishpichichunca, Davidpac huahua huahuacunapuramantami Taita Dios cusha nishca shinallatac, Jesustaca curca.

HECHOS 5:31

Chashna causachishpami, Taita Diosca paitaca tucuita Mandac cachunpish, Quishpichic cachunpish, paipac alli maquiman tiyachirca. Israelcuna juchayuc cashcamanta llaquirishpa, Taita Diosman cutiricpi, juchacunata perdonangapacmi chashnaca ruhuarca.

ROMANOS 16:26

Huiñaita causacuc Taita Dios mandashca shinami, cunanca chai pacashcataca ñaupa huillaccuna quillcashca shina ricuchin. Cai pacashcataca tucui cai pachapi causaccuna crishpa cazuchunmi ricuchishca.

ROMANOS 2:7

Maijanpish Taita Diospac alli nishca cangaraicu, huiñai causaita japingaraicu allita ruhuashpa causaccunamanca Taita Diosca huiñai causaitami cunga.

ROMANOS 3:31

Shina cacpica Jesusta crishcamantaca, ¿Moisés mandashcacunataca yangapi churanchicchu? ¡Mana chashnachu! Ashtahuanpish chai mandashcacuna alli cashcatami ricuchinchic.

ROMANOS 6:6

Ñaupa ñucanchic ima shina causashcaca, Cristohuan chacatarishca shina cashcataca yachanchicmi. Chashnaca ñucanchicpi tiyac juchacuna ama mandashpa c'atichunmi, chai juchacunataca chingachishpa, Cristohuan chacatarishca shina canchic.

1 CORINTIOS 15:26

Tucuripi tucuchina cashca, p'iñac huañuitapish Diosca tucuchingami.

1 CORINTIOS 4:5

Shinashpaca maijanta juchanchina cacpipish, Apunchic Jesús cutimungacaman amarac imata juchanchinguichicchu. Paimi amsapi imalla pacashcacunatapish, shungu imata yuyashcatapish punzhapi shina tucui ricuchinga. Shina cacpimi, Taita Diosca quiquin imata ruhuashcata ricushpa alli ninga.

2 CORINTIOS 5:4

Cai carpa huasi shina cuerpohuan causacushpaca, llaquihuanmi causacunchic. Lluchulla shinaca mana cashun ninchicchu, ashtahuanpish churanata churaric shinami, cai huañunalla cuerpotaca mushuc causaihuan chingachinata munanchic.

GÁLATAS 5:4

Maijan cancunapurapi Moisés mandashcacunata pactachishpalla Taita Dioshuan alli tucushun nishpaca, Cristomanta caruyashpami Dios mai c'uyashcamantapish ch'icanyarishcacuna.

EFESIOS 1:18

Cancuna pai c'ayacpi imata shuyana cashcata yachachun, shinallatac paipaclla caccunaman Dios cusha nishcaca sumac cashcata yachachunmi, alli yuyaita cuchun nishpa Diosman mañani.

EFESIOS 1:9

pai munashcamanta ñaupaman cusha nishca pacashcataca, Cristomanta ñucanchic japichun ricuchirca.

2 TESALONICENSES 2:8

chai millaita ruhuac runami ricuringa. Paitami Apunchic Jesusca cutin shamushpa, paipac shimihuan p'ucushpa huañuchinga, shinallatac paipac sumac achiclla cashcahuanmi chingachinga.

2 TIMOTEO 1:1

Ñucaca Taita Dios munashcamanta, Apunchic Jesucristo acllashca huillac Pablomi cani. Apunchic Jesucristohuan shuc shinalla tucushcamanta, pai cushami nishca causaita huillacmi cani.

2 TIMOTEO 1:8

Chashna cashcamanta ñucanchic Apunchic Jesucristomanta huillanatapish, huillacushcamanta ñuca prezu tiyacushcamantapish ama pinganguichu, ashtahuanpish alli huillaita huillacushcamanta llaquita apana cacpica, Taita Dios imatapish ruhuaclla cashcahuan ñuca shina llaquita apanguilla.

2 TIMOTEO 4:1

Canmanca Taita Diospac ñaupapi, shinallatac huañushcacunatapish, causaccunatapish Jatun Mandac shina taripangapac shamuc Apunchic Jesucristopac ñaupapimi caitaca mingani:

2 TIMOTEO 4:8

Cunan punzhamanta pachami cashcata ricuchic, ñucaman cuna cashca coronata Taita Diosca charicun. Chaitaca cashcata ruhuashpa taripac Apunchic Jesucristomi, taripana punzhapica cunga. Mana ñucallamanchu cunga, ashtahuanpish tucui pai cutimuna punzhata c'uyaihuan shuyaccunamanpish cungami.

TITO 2:11

Taita Dios tucui gentecunata quishpichisha nishpa, mai c'uyac cashcata ricuchishcamantami, chashnaca yachachina cangui.

TITO 2:13

Shinallatac chai c'uyaimi, ñucanchicta Mandac Dios Quishpichic Jesucristo sumaimana cashcahuan, cutimuna cushicui punzha pactanata shuyanata yachachicun.

TITO 3:4

Chashna causacucpipish ñucanchicta Quishpichic Taita Diosca pai c'uyac, llaquic cashcata ricuchishpami,

HEBREOS 10:32

Ñaupa punzhacunapi Dios yuyaita cucpi, jatun llaquicunata macanacuc shina apashcata cancunallatac yachanguichicmi.

2 PEDRO 1:1

Ñucaca Jesús acllashca huillac, shinallatac Jesucristopacta ruhuac Simón Pedromi cani. Ñucanchic Dios Quishpichic Jesucristo cashcata ruhuac cashcamanta, ñucanchic shinallatac sumaimana crishcata chasquiccunamanmi, “allillachu canguichic” nishpa quillcashpa cachani.

2 PEDRO 1:11

Chashna cacpimi ñucanchicta Mandac Quishpichic Apunchic Jesucristoca, pai huiñaita mandacucman cancunataca imamanta mana jarcarishpa yaicuchun saquingalla.

2 PEDRO 1:3

Taita Diosca Jesucristota ricsichishpami, pai imatapish ruhuaclla cashcahuan ñucanchic paita allita yuyariccuna cachun, tucui ima illashcatapish ñucanchicmanca cushca. Cristoca pai cashcata ruhuac cashcata, sumaimana cashcata ricuchingapacmi c'ayarca.

2 PEDRO 2:20

Maijanpish ñucanchicta Mandac Quishpichic Jesusta crishpa, chai mana alli causaimanta anchurishcacunami. Chashna anchurishca cashpa, cutin chai mana alli causaiman tigrarishpaca, ñaupa ima shina causacushcatapish ashtahuan yallimi tucun.

2 PEDRO 3:18

Shina tucunapac randica, ñucanchic Quishpichic Apunchic Jesucristota ashtahuan ricsishpa, pai mai c'uyac cashcata yachashpa, ashtahuan c'uyanacuichic. ¡Paica cunanpish, huiñai huiñaipacpish sumaimana alli nishca cachun! Chashna cachun.

2 PEDRO 3:2

Diospaclla cac ñaupa huillaccuna nishcatapish, Quishpichic Apunchic Jesús mandashcata pai acllashca huillaccuna cancunaman huillashcatapish yuyarichicyari.

1 JUAN 1:2

Causaita cuctaca Taita Dios cachacpimi ricurcanchic. Chaita ricushpami paimanta cancunaman huillanchic, shinallatac chaica huiñai causaita cuc cashcata huillanchic. Paica Taita Dioshuanmi carca. Chaimanta shamushpami, ñucanchicmanca ricurirca.

1 JUAN 4:14

Ñucanchicllatacmi Taita Dios cachashca paipac Churi cai pachapi causaccunata quishpichingapac shamushcataca ricurcanchic. Chaimantami huillanchic.

APOCALIPSIS 18:1

Chai q'uipaca imatapish ruhuaclla cashcahuan, jahua pachamanta shuc ángel urai shamucuctami ricurcani. Chai ángel paipac sumaimana cashcahuan achicyachicpimi, cai pachaca punzha shina achicyarca.

APOCALIPSIS 2:7

Maijanpish rinrita chariccunaca, Diospac Espíritu tandanacushca criccunaman ima nicushcataca uyachun. Maijanpish millaita mishaccunamanca Diospac llactapi cac causaita cuc yuramantami carasha.

APOCALIPSIS 20:14

Chai q'uipaca Ucu Pachatapish, Huañuitapish rupacuc nina cuchapimi shitashca carca. Chaica q'uipa huañuimi.

APOCALIPSIS 22:14

Maijanpish causaita cuc yuramanta micungapacpish, chai puebloman punguta yaicungapacpish churanata tacshariccunamanca, ¡mai cushicuimi canga!

APOCALIPSIS 22:17

Diospac Espiritupish, Pactalla Ovejapac*f** huarmipish Jesustaca “shamui” ninmi. Shinallatac maijan caita uyacpish “shamui” nichun. Maijanpish yacunaihuan cashpa shamusha nicca shamushpa, causaita cuc yacuta mana imata cushpa ubiachunlla.