2 PEDRO 2:9 - Nuevo Testamento en Quichua Cañar 1996

⁹ Chashnami Mandac Diosca paipaclla causaccunataca imapish llaquicunamanta quishpichin. Shinallatac millai gentecunataca pai taripashpa, llaquichina punzhacamanmi llaquichishpa charicun.

Dios Rimashcata Quillcashcami

⁹ Mandac Diosca paipaclla causaccunataca imapish llaquicunamanta quishpichinmi. Millai gentecunataca pai taripashpa, llaquichina punzhacamanmi huacaichishpa charicun.

2 PEDRO 2:9 ပူးပေါင်းရင်းမြစ်များ

SAN MATEO 10:15

Sodoma pueblopi shinallatac Gomorra pueblopi causac millai gentecuna ima shinami llaqui tucurca, chaitapish yallimi chai pueblopi causaccunataca, Taita Dios taripana punzhapica llaquichishca canga. Chaica chashnatacmi canga.

SAN MATEO 6:13

Ama ima millaipi urmachun saquinguichu, ashtahuanpish tucui mana allimanta huacaichingui. [Canmi huiñai huiñaita tucuita mandacpish, tucuita ruhuacpish, sumaimana cushicuipish cangui. Chashna cachun]’ nishpa mañanguichic.

ROMANOS 2:5

Ashtahuanpish canca sinchi shungu cashpami, Taita Diosman mana cutirisha ningui. Chaimantami Taita Dios imata ruhuashcata ricushpa taripana punzhapi llaquichishca cangapac, ashtahuan mana allita ruhuashpa c'aticungui.

1 CORINTIOS 10:13

Cancunaca pi mana apaipac mana alli munaitaca mana apashcanguichicchu. Shinallatac Taita Diosca cancuna mana apaipac mana alli munaita apachunca mana saquingachu. Taita Diosca imatapish pactachic cashpami, cancuna mana alli munaita jahualla apachunca, chai munaimanta llucshina yuyaitapish cunga.

2 TIMOTEO 3:12

Maijanpish Apunchic Jesushuan shuc shinalla tucushpa, paipaclla causanata munaccunaca llaquita apangami.

TITO 2:14

Paica juchacunata anchuchishpa tucui millaimanta quishpichingapac, shinallatac paipaclla cashpa imapish allita ruhuaccuna cachunmi, ñucanchicmanta llaquita apashpa huañurca.

2 PEDRO 2:4

Diosca paipac angelcuna cacpipish juchallicpica, mana perdonarcachu, ashtahuanpish ucu pacha amsapimi shitarca. Chaipimi paicunaca Dios taripashpa llaquichina punzhacaman cadenahuan huatashca shuyacun.

2 PEDRO 3:7

Shina cashpapish jahua pachapi, cai pachapi cunan ima tiyashcacunataca, chai rimashcallahuantacmi ninahuan tucuchingapac Taita Diosca huacaichishpa charicun. Chai ninaca Dios taripashpa millaicunata llaquichina punzhapimi, rupachishpa tucuchinga.

SAN JUDAS 1:6

Shinallatac angelcunatapish, paicuna mandacushca jahua shitashpa rishcamantaca, amsa pachapimi tucuri punzhapi taripashpa llaquichingapac huiñaita huatashpa charicun.

APOCALIPSIS 3:10

Cancuna ñuca mandashcacunata pactachinataca ‘saquishallami’ ninataca mana nishcanguichicchu. Chaimantami shamuc punzhapi cai pachapi causaccuna ima shina cashcata ricungapac llaquicuna shamucpi, cancunatapish huacaichisha.