2 CORINTIOS 7:4 - Nuevo Testamento en Quichua Cañar 1996

⁴ Ñucaca cancuna ima shina cashcata ricushpa cushicushpami, cai tucui llaquicunahuan cashpapish, ashtahuan c'atina yuyaita japishpa, yallita cushicuni.

Dios Rimashcata Quillcashcami

⁴ Cancunahuanca shungumantami parlani. Ima shina cashcata ricushpami cai tucui llaquicunahuan cashpapish, cushicushpa ashtahuan catina yuyaita japini.

2 CORINTIOS 7:4 ပူးပေါင်းရင်းမြစ်များ

HECHOS 5:41

Ña mandaccuna cacharicpi llucshishpaca: “¡Jesús llaquita apashca shinami, paita c'aticushcamanta Taita Diosca ñucanchictapish llaquita apachun saquishca!” nishpami, Jesús acllashca huillaccunaca munai cushicushpa rircacuna.

ROMANOS 5:3

Mana chaillamantachu cushicunchic, ashtahuanpish llaquita apashcamantapish cushicunchicmi. Chai llaquicunami mishangapac ashtahuan alli crina yuyaita cun.

1 CORINTIOS 1:4

Jesucristomanta Taita Dios cancunaman sumac allicunata cushcamantaca, punzhantami Taita Diostaca pagui nicunilla.

2 CORINTIOS 1:4

Taita Diosca ñucanchicta ima shinami llaquihuan cacpi cushichin, chai shinallatac shuccuna ima llaquihuan cacpi cushichichunmi, ñucanchictapish cushichin.

2 CORINTIOS 10:8

Apunchic Jesús mandashcamanta, ñuca cancunata imatapish ruhuachun nishpa ashata jatun tucushpa mandashpapish, mana pinganichu. Apunchic Jesusca ñucataca mana cancunata chingachichunchu mandarca, ashtahuanpish alli cricta ruhuashpa, sinchiyachichunmi mandarca.

2 CORINTIOS 11:21

Ñucanchictaca “manchashcamantami mana paicuna shina ruhuashca canga” ninguichicchari. ¡Chaimantaca pinganayanmi! Shina cacpipish shuctaccuna imamantapish jatun tucucpica, jatun tucuna mana alli cacpipish, jatun tucusha ninimi.

2 CORINTIOS 2:14

Cristohuan ñucanchic mishaccuna cashcata ricuchingapacmi, Taita Diosca tucuipac ñaupapi millaita mishashpa pushacun. Shinallatac mai llactapipish mishquilla ashnacuc shina Cristopac alli huillai ñucanchicmanta huillarichunmi, tucuipi pushacun. Chashna cashcamantami Taita Diostaca pagui nicunalla canchic.

2 CORINTIOS 3:12

Chai sumaimana huillashca yuyailla cashpami, mana manchashpa tucuiman huillacunchic.

2 CORINTIOS 7:14

Cancunamantaca “allicunami” nishpami utcaman Titomanca ña parlarcani. Chaica chashnatacmi cashca. Ñucanchicca ima shinami cancunaman cashcatatac parlarcanchic, chashnallatacmi “allicunami” nishpa, Titoman parlashcaca chai shinatac pactashca.

2 CORINTIOS 8:24

Caipi chaipi cac tandanacushca criccuna cancuna c'uyac cashcata yachachunca, cai huauquicunata allita chasquichic. Chai shina cancuna allita chasquicpimi, ñucanchic cancunata “allicunami” nishcaca mana yanga canga.

FILIPENSES 1:14

Shinallatac ñuca caipi prezu cacta yachashpami, maijancunalla saquirishpa achca criccuna ashtahuan sinchi cric tucushpa, Apunchic Jesusmanta mana manchashpa, Diosmanta alli huillaita huillacuncuna.

FILIPENSES 1:20

Imamanta mana pingaichishca canatami, ñuca tucui shunguhuan munani. Shinallatac ñuca causaipi ima ruhuashcacunahuan, ñuca huañushca q'uipapish Cristoca tucuipac alli nishca cachunmi munani. Chaimantami cunanpish, tucui punzhacunapish paimanta mana manchashpa huillasha nini.

FILIPENSES 1:26

Chashna causacushparac cancunapacman cutimucpimi, Jesucristohuan shuc shinalla tucushcacunaca ñucamanta ashtahuan cushicunguichic.

FILIPENSES 2:17

Cancuna crishpaca, Taita Diosman cushpa rupachic shinami cushcanguichic. Chaita pactachingapacca, ñuca quiquin causaita chingachina cacpipish chingachishallami. Chashna yuyashpami, tucui cancunahuan cushicuni.

COLOSENSES 1:24

Cancunamanta llaquita apacushcamantaca, cunanca cushicunimi. Chashnami, Cristo paipac cuerpo shina criccunamanta llaquita apashca shina, ñucapish ñuca cuerpopi llaquita apana cashcataca llaquita apacuni.

1 TESALONICENSES 2:19

Apunchic Jesús cutimui punzhapi paipac ñaupapica, ¿pimantatac cushicushun? ¿Pimantatac “allimi canchic” nishca cashun? Shinallatac ¿pimantatac ñucanchic shuyacushca japina cashcatapish japishun? Chaitaca cancunamantami japishun.

1 TESALONICENSES 2:2

Filipos pueblopi ñucanchicta yallita c'amishpa, llaquichishca cashcataca yachanguichicmi. Shinallatac cancunapacman chayashpa ñucanchic llaquihuan cashpapish, Diosllatac mana manchashpa cancunaman paimanta alli huillaita huillachun yuyaita cushcatapish yachanguichicmi.

2 TESALONICENSES 1:4

Cancunata llaquichicucpipish, p'iñacucpipish alli crishpa, sinchita c'aticushcataca, tandanacushca criccunamanca cushicushpami parlanchic.

FILEMÓN 1:7

C'uyashca huauqui, cambac c'uyaihuanmi Diospaclla cac tucui criccunataca cushichishcangui. Chaimantami ñucapish cushicushpa, Diospacta ruhuana yuyailla cani.

SANTIAGO 1:2

Ñuca c'uyashca criccuna, cancunata ima llaquicuna japicpipish, cushicuita cuna cashcatami yuyana canguichic.