1 TESALONICENSES 2:2 - Nuevo Testamento en Quichua Cañar 1996

² Filipos pueblopi ñucanchicta yallita c'amishpa, llaquichishca cashcataca yachanguichicmi. Shinallatac cancunapacman chayashpa ñucanchic llaquihuan cashpapish, Diosllatac mana manchashpa cancunaman paimanta alli huillaita huillachun yuyaita cushcatapish yachanguichicmi.

Dios Rimashcata Quillcashcami

² Filipos pueblopi ñucanchic camishca, llaquichishca cashcatapish yachanguichicmi. Chashna llaquihuan cacpipish, alli huillaita huillachun Diosllatac sinchiyachishcatapish yachanguichicmi.

1 TESALONICENSES 2:2 ပူးပေါင်းရင်းမြစ်များ

HECHOS 14:3

Chashna cacpipish, Pabloca Bernabendic Jesús paicunahuan cashcata yachashpa, chai pueblopi unaicaman saquirishpami: “Taita Diosca mai c'uyacmi” nishpa, mana manchashpa huillarcacuna. Apunchic Jesús paicunahuan cacpimi, pi mana ruhuaipaccunatapish, pi mana ricushcacunatapish ruhuarcacuna.

HECHOS 14:5

Chashna tucushpaca israelcunapish, mana israelcunapish mandaccunahuan tandanacushpami: “Paicunataca c'amishpa, rumicunahuan shitashun” ninacurcacuna.

HECHOS 16:12

Chaimantaca Macedonia llactapi cac, jatun Filipos pueblomanmi rircanchic. Chai pueblopica, Roma*f** llactamanta shamushcacunami causacushca carcacuna. Chai pueblopimi asha punzhacunata carcanchic.

HECHOS 16:19

Chai huambramanta cullquita japina tucuricpimi, Pablota chai amocunaca Silasndic japishpa, jatun plazapi cac mandaccunapacman aparcacuna.

HECHOS 16:37

Shina nicpipish, Pabloca soldadocunataca: —Ñucanchicca Roma llactamanta cashca shinallatacmi canchic. Shina cacpipish ñucanchictaca manarac imata tapushpami, tucui gentecunapac ñaupapi macachishpa, carcelpi churachircacuna. Chashna ruhuashca jahuachu, cunanca pacalla cacharichun nishcacuna. Paicuna cacharingapac shamungacamanmi, ñucanchicca mana rishpa, caillapitac cashun— nirca.

HECHOS 17:1

Pabloca Silasndic Anfípolis pueblota, Apolonia pueblotapish rishpaca, Tesalónica pueblomanmi chayarcacuna. Chaipimi israelcuna*f** tandanacuna huasi tiyarca.

HECHOS 17:17

Chaimantami tandanacuna huasiman yaicushpa israelcunahuanpish,*f** Diosta yuyaric mana israelcunahuanpish*f** rimanacurca. Chashnallatac jatun plazaman shamuccunahuanpish, punzhantami rimanacurca.

HECHOS 19:8

Chai pueblopi cac israelcuna*f** tandanacuna huasiman shamuc gentecuna crichunmi, Taita Dios mandacucmanta huillashpa, Pabloca quimsa quillacaman chai huasimanca mana manchashpa puric carca.

HECHOS 4:13

Pedropish Juanpish mana manchashpa, allita rimacta uyashpami, chai mandaccunaca: —¿Ima shinatac cai maipi yachacungapacllapish mana rishca, yanga runacunaca chashna rimancunayari?— nishpa, mana amirircacuna. Chaimantami paicunaca Jesushuan puriccuna cashcata yachac chayarcacuna.

HECHOS 4:20

¡Ñucanchicca ñucanchic imalla ricushcata, uyashcata huillanataca manatac saquishunchu!— nircacuna.

HECHOS 4:31

Chashna mañashca q'uipaca, paicuna tandanacushca tiyacuc huasica chucchurcami. Diospac Espíritu tucui chaipi caccunapac shungupi junda cacpimi, paicunaca mana manchashpa, Diosmanta huillarcacuna.

HECHOS 5:41

Ña mandaccuna cacharicpi llucshishpaca: “¡Jesús llaquita apashca shinami, paita c'aticushcamanta Taita Diosca ñucanchictapish llaquita apachun saquishca!” nishpami, Jesús acllashca huillaccunaca munai cushicushpa rircacuna.

ROMANOS 1:1

Jesucristopacta ruhuac Pablomi caita quillcani. Diosmanta alli huillaita huillachunmi, ñucataca Taita Diosca Jesusmanta huillac cachun c'ayashpa ch'icanyachirca.

2 CORINTIOS 3:12

Chai sumaimana huillashca yuyailla cashpami, mana manchashpa tucuiman huillacunchic.

COLOSENSES 2:1

Ñucaca cancunamantapish, Laodicea pueblopi caccunamantapish, shinallatac tucui ñucata ñahui ñahui mana ricsiccunamantapish llaquita apashpa, tucui yuyaihuan ruhuacushcatami yachachun munani.

1 TESALONICENSES 1:5

Ñucanchic cancunaman quishpirinamanta alli huillaita huillacushpaca, mana rimaillahuanchu yachachircanchic, ashtahuanpish Diospac Espíritu yachachicpimi, imatapish ruhuaclla Diosmanta allicunata ruhuashpa ricuchircanchic. Ñucanchic cancunaman alli huillaita huillacushcaca chashnatac cashcata alli yachashpa, cancunapac allipac ruhuashcataca yachanguichicmi.

2 TIMOTEO 1:12

Chashna huillac cashcamantami tucui cai llaquicunataca apacuni. Shina cacpipish ñuca pita crishcataca yachanimi. Shinallatac ñucaman mingashcataca, shamuc punzhacaman huacaichina cashcatapish allimi yachani. Chashna cashcamanta manatac pinganichu.

SAN JUDAS 1:3

C'uyashca criccuna, ñucapish, cancunapish quishpirishca cashcamantami, cancunamanca yallita quillcanata munarcani. Shina cacpipish cunanca Diospaclla caccunaman paicuna crichun yachachishcata, macanacuc shina sinchita c'atina cacpimi, cai quillcata cachani.