1 TESALONICENSES 1:5 - Nuevo Testamento en Quichua Cañar 1996

⁵ Ñucanchic cancunaman quishpirinamanta alli huillaita huillacushpaca, mana rimaillahuanchu yachachircanchic, ashtahuanpish Diospac Espíritu yachachicpimi, imatapish ruhuaclla Diosmanta allicunata ruhuashpa ricuchircanchic. Ñucanchic cancunaman alli huillaita huillacushcaca chashnatac cashcata alli yachashpa, cancunapac allipac ruhuashcataca yachanguichicmi.

Dios Rimashcata Quillcashcami

⁵ Ñucanchic cancunaman alli huillaita huillacushpaca, mana rimaillahuanchu yachachircanchic, ashtahuanpish Diospac poderhuan, Espirituhuan, allita yachashpami, cancunapac allipac yachachircanchic.

1 TESALONICENSES 1:5 ပူးပေါင်းရင်းမြစ်များ

MARCOS 16:20

Yachacuccuna rishpaca, maipipish tucui gentecunamanmi huillarcacuna. Chashna huillacucpica, Apunchic Jesusmi imapipish paicunataca ayudac carca. Pi mana ruhuaipaccunata ruhuachishpami, Jesusca paicunahuan cashcataca ricuchicurca.]

SAN LUCAS 1:1

Cai ñucanchic llactapi imalla tucushcacunataca, ñucanchicpuramanta achca uyaccunami callarimanta quillcasha nicurcacuna.

HECHOS 11:21

Taita Dios paicunahuan cacpimi, achcacuna Apunchic Jesusta crishpa, ñaupa mana alli causaita saquircacuna.

HECHOS 16:14

Chai huarmicunapurapica, Tiatira pueblomanta Lidia huarmimi ñucanchic yachachishcataca uyacurca. Chai huarmica morado sumac liensota c'atucmi carca, shinallatac Taita Diosta yuyaricmi carca. Chai huarmimanmi Apunchic Jesusca Pablo tucui imalla nishcata uyashpa cazuchun, alli yuyaita curca.

HECHOS 2:33

Taita Dios Jesusta causachishpaca, jahua pachapi paipac alli maquimanmi tiyachirca. Chashnallatac Taita Diosca pai cusha nishca paipac Espirituta Jesusman cucpimi, paica ñucanchicman cachashca. Chaitami cunan cancunaca ricucunguichic, uyacunguichic.

ROMANOS 1:16

Alli huillaica puntaca israelcunata,*f** mana israelcunatapish*f** maijanpish crictaca quishpichingapac, imatapish ruhuaclla Taita Diosmanta shamushcami. Chaimantami alli huillaita huillanataca mana pingani.

ROMANOS 15:13

Shuyana yuyaita cuc Taita Diosllatac, criccuna cashcamanta cancunamanca sumac causaitapish, cushi canatapish yallita cushca canman. Imatapish ruhuaclla paipac Espiritullahuantac japingapac shuyana yuyaita yallita charichunmi, chashnaca nini.

ROMANOS 2:16

Alli huillaita ñuca huillashca shina, tucui gentecuna pacalla ruhuashcata Taita Dios Jesucristomanta taripai punzhapimi chashnaca ricuringa.

1 CORINTIOS 1:24

Ashtahuanpish Dios c'ayashcacunamanca, israelcunaman cashpa, mana israelcunaman cashpa, Cristomanta huillashcaca Taita Dios imatapish ruhuaclla, shinallatac yachac cashcatami ricuchin.

1 CORINTIOS 10:33

Ñucaca mana quiquinpac allita mashcashpami, imata ruhuashpapish tucuipac allipac paicuna quishpirichun ruhuacuni.

1 CORINTIOS 3:16

Cancunaca Dios causana huasi cashcata, shinallatac Diospac Espiritupish cancunapac shungupi causacushcataca, ¿manachu yachanguichic?

1 CORINTIOS 3:6

Shina cashpami ñucaca muyuta tarpuc shina, cutin Apolosca parcuc shina cancunamanca yachachircanchic. Shina cacpipish tarpushca muyuta huiñachicca Taita Diosmi can.

1 CORINTIOS 4:20

Dios mandacucpi causanaca mana shimillahuan “allimi cani” nirinachu, ashtahuanpish imatapish ruhuac cashcatatac ricuchinami.

1 CORINTIOS 9:14

Chai shinallatacmi Apunchic Jesusca maijanpish quishpirinamanta alli huillaita huillaccunaca chai huillashcallamantatac micuchun nishpa mandashca.

2 CORINTIOS 3:6

Diosllatacmi paipac mushuc ari ninacuita huillachunca, yuyaita cushpa ñucanchicman yachachirca. Chaica mana Moisés mandashcapi quillcashca shinachu, ashtahuanpish Diospac Espíritu yachachishcami. Moisés mandashcaca chingarina cashcatami ricuchin, ashtahuanpish Diospac Espirituca causaitami cun.

GÁLATAS 2:2

Chaimanca Taita Dios “rinami cangui” nicpimi rircani. Chaiman chayashpaca, criccunata pushaccunallahuanmi tandanacurcani. Ñuca punta huillacushcapish, cunan huillacushcapish ama yanga cachunmi, mana israelcunaman*f** quishpirinamanta huillacushcataca allita yachachircani.

GÁLATAS 5:5

Shina cacpipish ñucanchic crishcallamanta, shinallatac Diospac Espíritu imatapish ruhuaclla cashcamantaca, Taita Dioshuan alli tucuna yuyaillami canchic.

EFESIOS 2:10

Taita Diosmi ñucanchictaca ruhuashca. Chashna ruhuashpaca, Jesucristohuan shuc shinalla tucushcamanta allicunata ruhuachunmi mushucta ruhuashca. Chai allicunata ñucanchic ruhuachunmi, ñaupamanta pacha allichishca.

EFESIOS 3:20

Ima shinami Taita Diosca ñucanchicpi imatapish ruhuaclla cashcata ricuchic shinallatacmi, ñucanchic yuyashcatapish, mañashcatapish yalli imatapish ruhuaclla can. ¡Chaimanta paitaca “sumacmari cangui” nishunchic!

FILIPENSES 2:13

Taita Diosllatacmi imapish paiman allita ruhuana yuyaitapish, allita munana yuyaitapish cancunaman cun.

FILIPENSES 4:9

Ñucamanta imata yachacushcatapish, ñuca ima ruhuashcata ricushcatapish, ñuca ima nishcata uyashcatapish, tucui chaicunata ruhuacpimi, sumac causaita cuc Taita Diosca cancunahuanca canga.

COLOSENSES 2:2

Paicuna tucui shunguhuan crishpa, c'uyanacushpa, sinchiyashpa c'atichunmi, chashnaca ruhuacuni. Chashna ruhuacpimi, Dios pacashca ima shina cashcataca tucui allita yachanga. Chaica Cristomi.

1 TESALONICENSES 2:13

Ñucanchic huillacpi, mana gentecunalla huillashcata yuyashpa, ashtahuanpish quishpirinamanta huillashcaca Diosmanta cashcata yachashpa chasquishcamantami, punzhanta Diostaca pagui nicunchiclla. Chaica Dios rimashca shimi cashpatacmari, cancunata shuctacyachicpi, sumacta causacunguichic.

2 TESALONICENSES 2:14

Chashnaca ñucanchic Apunchic Jesucristohuan sumaimana llactapi causagrichunmi, ñucanchicman alli huillaita huillachishpa, Diosca cancunataca c'ayarca.

2 TIMOTEO 2:10

Chaimantami Taita Dios tucui acllashcacuna Jesucristohuan shuc shinalla tucushpa, sumaimana huiñai causaita paicunapish japichun nishpa cai llaquicunataca apacuni.

2 TIMOTEO 2:8

Mandac Davidpac aillupuramanta cac, shinallatac huañushcacunapuramanta causarishca Jesucristotami yuyarina cangui. Quishpirinamanta huillashpaca, chaitami huillani.

HEBREOS 10:22

Chaimantami mana caita chaita yuyashpa, tucui shunguhuan crishpa, ñucanchic shungupi millai yuyaicuna tiyashcatapish anchuchishca, shinallatac chuya yacuhuan chuyayachishca, Taita Diosman cuchuyana canchic.

HEBREOS 6:11

Cancuna shuyacushcata Taita Dios tucui pactachingacaman, chashna alli c'aticushcata ricuchichunmi munanchic.

1 PEDRO 1:12

Paicuna chashna yachashun nicucpipish, Diosca pai huillachishcaca mana paicunaman cashcata, ashtahuanpish cancunapac allipac cashcatami yachachirca. Chaitatacmi jahua pachamanta shamushca, imatapish ruhuaclla Diospac Espíritu yuyaita cucpi, alli huillaita huillaccunallatac cancunaman huillarca. Cai huillashcacunataca jahua pacha angelcunapish yachanata munancunami.

1 PEDRO 1:3

¡Ñucanchic Apunchic Jesucristopac Taita Diostaca “allimari cangui” nishunchic! Ñucanchic huiñaita causagrina yuyailla cachunmi, paipac sumaimana c'uyaimanta Jesucristota causachishpa, ñucanchictaca cutin huacharishca shinata ruhuarca.

1 PEDRO 5:3

Cancunaman mingashca criccunataca, mana yalli mandashpalla charinachu canguichic, ashtahuanpish alli ruhuashcata paicuna ricushpa c'atichunca, cancunaracmi allita ruhuana canguichic.

2 PEDRO 1:10

Chaimanta c'uyashca criccuna, cancunata Dios acllashpa c'ayashcamantaca, caicunata yuyaipi charishpami causana canguichic. Chashna causashpami, jaicapi mana pandaringuichic.

2 PEDRO 1:19

Chaita urcupi ricushcaca, Diosmanta ñaupa huillaccuna huillashcaca chashnatac cashcatami ricuchin. Chai huillaica tuta punzhayangacaman amsata achicyachic lámpara shina, shinallatac tutamanta achicyachic lucero llucshic shinami, cancunapac shungutaca achicyachicun. Chai huillaita cancuna alli uyashpaca, allimi ruhuanguichic.