1 PEDRO 2:11 - Nuevo Testamento en Quichua Cañar 1996

¹¹ C'uyashca criccuna, cancunaca caru llactamanta shamushpa, causac shinallami cai pachapica canguichic. Cai pacha jucha munaicunaca cancunapac almahuanca macanacucunmi. Shina cashcamanta chai munaicunamanta huacaichirichun ninimi.

Dios Rimashcata Quillcashcami

¹¹ Cuyashca criccuna, cancunaca caru llactamanta shamushpa, causac shinallami cai pachapica canguichic. Shina cashcamanta cancunapac almahuan macanacucuc jucha munaicunamantaca huacaichiringuichic ninimi.

1 PEDRO 2:11 ပူးပေါင်းရင်းမြစ်များ

SAN LUCAS 21:34

Cancunallatac alli yuyarichic. Pacta machanallapi, micunallapi, cai pachapi imatapish charinallapi cancunapac shunguta churashpa causacunguichicman. Chashna causacucpica, pacta cancuna mana yuyashca horas chai punzhaca chayamunman.

HECHOS 15:20

Chashna ninapac randica, paicunamanca: ‘Ruhuashcalla dioscunaman ima cushcatapish, yahuartapish, sipishpa huañuchishca aichatapish ama micunguichicchu, shinallatac ama huaclliringuichicchu’ nishpa, quillcashpa cachashunchic.

HECHOS 15:29

Ruhuashcalla dioscunaman cushcacunatapish, yahuartapish, sipishpa huañuchishca aichatapish ama micunguichicchu, shinallatac ama huaclliringuichicchu. Cai nishcacunata cazushpaca, allitami ruhuanguichic. Allilla cashca cachun” nishpami quillcarcacuna.

ROMANOS 12:1

Chaimanta ñuca c'uyashca criccuna, Taita Dios llaquishcamanta cancunapac cuerpota Taita Diosman cushpa, rupachishca shina paipaclla tucushpa, pai munashca shina causachunmi mañani. Chashna ruhuashpami, Taita Diosta tucui shunguhuan alli ninguichic.

ROMANOS 7:23

Shina cacpipish, ñucapi tiyac munaimi ima allita ruhuasha nicucpipish, ñuca allita ruhuana yuyaicunata jarcan. Chashna cashcamantami ñucapi tiyac munaicunaca juchapi huatashca shina charicun.

ROMANOS 8:13

Cai pacha jucha munashca shina causacushpaca, huañunguichicmi. Shina cashpapish Diospac Espíritu yuyaita cushcahuanca, cai pacha jucha munashcataca chingachinguichicmi. Shina chingachishpaca causanguichicmi.

2 CORINTIOS 5:20

Shina cashcamantami ñucanchicca Cristopac randi huillachun cachashca huillaccuna canchic. Shina cashpami Diosllatac “ñucahuan alli tucuichic” nicuc shina, ñucanchicta huillachicun. Chashna cashcamantami “Cristopac shutipi Dioshuan alli tucuichic” nishpa mañacunchic.

2 CORINTIOS 6:1

Cunanca Dios mingashcata paillahuantac ruhuaccuna cashcamantami, ñucanchicca Dios mai c'uyashpa, cancunaman allicunata cushcataca ama yangalla cashcata yuyanguichicchu nishpa rimanchic.

2 CORINTIOS 7:1

Caicunami Dios ñucanchicman allicunata cushami nishcacunaca. Shina cashcamanta c'uyashca criccuna, cuerpotapish, almatapish tucui imapish mapayachinamantaca huacaichirishpa, chuya cashunchic. Shinallatac Taita Diosta manchashpa, paipaclla tucushpa causanata yuyailla cashunchic.

GÁLATAS 5:24

Shinallatac maijanpish Jesucristopac caccunaca cai pacha jucha munaicunandic, imapish yallita mana alli yuyaicunandicmi chacatashca shina causacun.

EFESIOS 2:19

Chaimanta cancunaca ña mana shuctac llactamanta shamushca, shinallatac ña mana quiquin causai llactamanta llucshishca shinachu canguichic, ashtahuanpish Diospaclla caccunapura cashcamantami Diospac huahuacunapura tucushcanguichic.

EFESIOS 4:1

Chaimantami Apunchic Jesuspacta ruhuacushcamanta carcelpi tiyacuc Pablo cancunamanca cashna nini: Cancunaca Taita Dios ima shina causachun c'ayashca shina causaichic.

2 TIMOTEO 2:22

Huambracunapac yuyaita saquishpa, imapish cashcallata ruhuashpa, alli crishpa, tucui shungumanta Taita Diosman mañaccunahuan tandarishpa, c'uyaihuan apanacushpa sumacllata causangui.

HEBREOS 11:13

Tucui chai gentecunami Dios cushami nishcacunata manarac chasquishpa huañurcacuna. Shina cashpapish paicuna crishcamantami, carullamanta alabaduc shina ricurcacuna. Chashnami shuctac llactamanta caccuna shina cashcatapish, shinallatac cai pachapi puriccunalla shina cashcatapish paicunallatac huillarcacuna.

HEBREOS 6:9

C'uyashca criccuna, cashna rimashpapish cancuna imatapish allita ruhuashpa, quishpirinaman pushac alli ñanta c'aticushcatami yachanchic.

SANTIAGO 4:1

Cancunapuraca, ¿ima nishpatac macanacunguichic, p'iñanacushpa rimanacunguichic? Cancunapac shungupi millai munaicuna tiyashpa, caita chaita yuyachicucpimi, chashnaca ruhuanguichic.

1 PEDRO 1:1

Ñucaca Jesús acllashca huillac Pedromi cani. Cai quillcataca quiquin llactamanta llucshishpa, caita chaita rishpa, Ponto, Galacia, Capadocia, Asia shinallatac Bitinia llactapi causac criccunamanmi quillcashpa cachani.

1 PEDRO 1:17

Cancunaca pimanpish mana tucushpa, imata ruhuashcata ricushpa taripac Diosta “Taita” nishpaca, tucui causaipimi cai pachapi causashcacamanca, paita manchashpa, cumurishpa causana canguichic.

1 PEDRO 4:12

C'uyashca criccuna, cric cashcata ricungapac rupachic shina llaquicuna japicpipish, “jaicapi mana japishca llaquicunami japin” nishpa, ama mancharichicchu.

1 PEDRO 4:2

Cai pachapi causashcacaman cai pacha jucha munaicunata mana ruhuashpa, ashtahuanpish Dios munashca shina causangapacmi, chai shinaca saquin.

2 PEDRO 3:1

C'uyashca criccuna, caihuanca ishcai cutinmi cancunamanca quillcashpa cachani. Ishcai quillcacunapitacmi alli yuyaihuan allita c'atichun nishpa, cunashpa rimani.