1 PEDRO 1:20 - Nuevo Testamento en Quichua Cañar 1996

²⁰ Diosca cai pachata manarac ruhuashpami, Cristotaca huañushpa gentecunata quishpichichun nishca. Shina cashpami, cai tucuri punzhacunapi cancunapac allipac quishpichingapac shamurca.

Dios Rimashcata Quillcashcami

²⁰ Diosca cai pachata manarac ruhuashpami, Cristotaca huañushpa gentecunata quishpichichun nishca. Shina cashpami, cai tucuri punzhacunapi cancunapac allipac quishpichingapac shamurca.

1 PEDRO 1:20 ပူးပေါင်းရင်းမြစ်များ

SAN MATEO 25:34

Ñuca alli maqui ladoman caccunataca: ‘Ñuca Taita alli nishcacuna, ñucahuan pacta mandangapac shamuichic, japinguichic. Cai mandanataca Diosmi cai pachata ruhuashca punzhamanta pacha, cancunaman cungapac allichishpa charicushca.

HECHOS 2:23

Chashna cashpapish Taita Dios ñaupaman yachashca, munashca shinallatacmi, Jesustaca cancunaman cucpi, prezu japishpa, millai runacunaman chacatachun cushpa huañuchircanguichic.

ROMANOS 3:25

Taita Diosca Jesucristotaca paipac yahuarta jichashpa, juchacunamanta quishpichichunmi cacharca. Quishpirinataca Jesucristota crishpallami chasquinchic. Chashnami Taita Diosca ñucanchic ñaupa juchacunata perdonashpa, ima shina paihuan alli tucuna cashcata ricuchisha nishca. Chashnaca pai mana p'iñaric cashcamantami ruhuarca.

ROMANOS 8:29

Taita Diosca paipac Churi achca criccunamanta punta cachunmi, ñaupaman ricsishcacunataca callarimanta pacha paipac Churi Jesucristo shina cachun ch'icanyachirca.

GÁLATAS 4:4

Shina cacpipish cachana punzha pactacpimi, Taita Diosca shuc huarmimanta huacharichun paipac Churitaca cacharca. Paica Moisés mandashcacunataca tucuitami cazushpa causarca.

EFESIOS 1:10

Taita Diosca cai cusha nishcataca pactana punzha chayacpimi pactachirca. Jahua pachapi, cai pachapi tiyac imacunatapish Cristo mandachunmi, tandachishpa chashnaca ruhuarca.

EFESIOS 1:4

Taita Diosca paipac c'uyaimantami manarac cai pachata ruhuashpa, ñucanchictaca Cristohuan shuc shinalla tucushpa jucha illac, paipaclla paipac ñaupapi cachun acllashca.

EFESIOS 3:11

Chashnami Taita Diosca ñaupamanta pacha pai imata ruhuasha nicushcata pactachirca. Chashna tucuchunmi, Apunchic Jesucristota cacharca.

EFESIOS 3:9

Tucuita ruhuac Taita Diosca pai imata ruhuasha nicushcataca, ñaupamanta pachami pacashpa charicushca. Chaita huillachunmi ñucamanca mingarca.

COLOSENSES 1:26

Chai huillasha nicushcataca, ñaupa huatacunamanta pachami cancunamanca pacashpa charicushca. Shina cacpipish cunanmi paipaclla caccunamanca huillashca.

1 TIMOTEO 3:16

Pi mana yachashca, Taita Dios llaquishpa huillashcata ñucanchic crishcaca, tucuimanta yalli allimi: Apunchic Jesusca aichayuc tucushpami ricurirca. Diospac Espirituhuan cashcamanta tucuitami misharca. Shinallatac paitaca angelcunapish ricurcami. Mana israelcunamanpish*f** paillamantami paita c'aticcunaca huillashcacuna. Cai pachapica paitaca achcacunami crishcacuna. Jahua pachapipish paitaca alli nishpami chasquishca carca.

HEBREOS 1:2

Shina cacpipish cunan tucuri punzhacunapica, paipac Churitami ñucanchicmanca huillachirca. Taita Diosca Paillahuantacmi, cai pachatapish ruhuarca. Shinallatac tucui ima tiyashcatapish, Paillamantacmi cushca.

HEBREOS 2:14

Ima shinami shuc taita mamapac huahuacunaca shuc aichalla, shuc yahuarlla shina can, chai shinallatacmi Jesuspish ñucanchic shina aichayuc, yahuaryuc carca. Shina cashpami huañuiman apac diablotaca pai huañushpa chingachirca.

HEBREOS 9:26

Chashna ruhuana cashca cacpica, Apunchic Jesusca Dios cai pachata ruhuashca punzhamanta pachaca, tauca cutinmi huañuna canman carca. Ashtahuanpish Apunchic Jesusca cunan punzhacunapica, huiñaipac shuc cutinlla ricurishpa, tucui gentecunapac juchacunata anchuchingapacmi, pai quiquinllatac Diosman curishpa huañurca.

1 PEDRO 1:2

Cancunataca Taita Diosmi ña ñaupamanta pacha pai munashca shina paipac huahuacuna cachun acllashca. Taita Diosca paita c'uyashpa causachun, shinallatac Jesucristopac yahuarhuan chuyayachishca cachunmi, cancunata paipac Espiritumanta paipacllatac ruhuashca. Taita Dios mai c'uyashpa, cancunaman sumac causaita yallita cushca cachun ninimi.

1 JUAN 1:2

Causaita cuctaca Taita Dios cachacpimi ricurcanchic. Chaita ricushpami paimanta cancunaman huillanchic, shinallatac chaica huiñai causaita cuc cashcata huillanchic. Paica Taita Dioshuanmi carca. Chaimanta shamushpami, ñucanchicmanca ricurirca.

1 JUAN 3:5

Jesucristo ñucanchic juchacunata anchuchingapac cai pachaman shamushcataca yachanguichicmi. Paica ima juchata mana charinchu.

1 JUAN 3:8

Maijanpish juchata ruhuacca diablopacmi. Diablomi callarimanta pacha juchata ruhuachicca. Diospac Churica diablo imata ruhuacushcata chingachingapacmi shamurca.

APOCALIPSIS 13:8

Tucui cai pachapi causaccunami chai animaltaca “allimari cangui” ningacuna. Chaicunaca cai pachata Taita Dios ruhuashca punzhamanta pacha huiñaita causangapac quillcachina libropi mana quillcashcachu can. Chai librotaca huañuchishca cac Pactalla Ovejami*f** charicun.