YIHUDA 1:15 - Qullaawa Maxaafa

¹⁵ Hakkore Magano magansidhannokkire, assitino bunshenni qorichishannonsa; haxawarrootahonna cubbaataamma baalaho, assitanno bunshe baalatenna Maganu aana coyidhanno saora yoo yaannonsa» yee coyi'rino.

YIHUDA 1:15 ပူးပေါင်းရင်းမြစ်များ

FAARSO 139:20

Insa ate aana busha coye coyidhanno; baarigaarretenni su'makki huntanno.

FAARSO 149:9

Maganu hajajino garinni manna qorichishshanno; kuni, Maganu mannisira uyino ayirrinyeeti. Kaaliiqi galatamo!

FAARSO 31:18

Wolqatenninna boo'natenni, keeraano mishshanni coyidhanno kaphaano afii beewo.

FAARSO 37:6

Keeraanchimmakki xawaabbu gede, halaalekkino barri arrishsho gede xawisanno.

FAARSO 73:9

Maganu aana busha coyidhanno; mannu aanano afii-wo'ma coyidhanno.

FAARSO 94:4

Maahoyye gibbinori naaxxitannohunna, bushu loosinsanni boo'nitannohu mamooti geeshshaati?

FAARSO 98:9

Isi baattote aana baalunkura halaalenna taalo coyi'rara daanni noona, insa Kaaliiqa magansidho!

FULO 16:8

Museno daware, «Kaaliiqira mageeshshi geeshsha gunguntinoonniro macciishshino; kunnira hawarro maala, soodono sagale hasidhini geeshsha itisanno'ne; aanno'nehu Kaaliiqaatina, ninke assine anfeemmori dino; gunguntinoonnihuno dininkeraatina Kaaliiqiraati» yii.

ROSIISAANCHO 11:9

Ati wedellichu, wedellichimmakkinni tashshi yoohe; wedellichimmakki yannara wodanikki hagiidho; wodanikki hedinoha, illekki la'inoha assi. Ikkollana kunni baalunku coyira Maganu yoote shiqishannohetano habbooti.

ROSIISAANCHO 12:14

Maganu baalanka coye, maaxaminohano ikkiro mannu looso baala, danchano bushano yoote shiqishanno.

HIZIQEELI 35:13

Ane seyatte, boo'natenni aana'ya coyi'roottore macciishshoommo› yiino yite kulisi» yii.

DAANIEELI 11:36

«Aliyye moote hasi'rinore baala wonshanno; umosino maganna baalate aliidiha asse kiiranno; maganna baalate aliidi Magani aana kunni albaanni macciishshine egenninoonnikkiha xonote qaale coyi'ranno. Maganu hedino coyi wo'ma hasiissanno daafira, Maganu hanqi aanasi daa geeshsha assannori qinaannosi. Maganuno hedinore baala assanno.

DAANIEELI 7:20

Qoleno konni moyichi umi aana noo buudda tonnenterenna mereerinsanni 3 buqqise tugihu gedensaanni fulihure shiimu buudire roorse afammora hasi'roommo. Kunni shiimu buudira illuwanna afuu noosi; wolootu baalunkunni roore waajjishannohonna boo'natenni coyi'rannoho.

YOHAANNISI 5:27

Beettu, Manchi Beetto ikkino daafira, yoo yaanno gede roorre uyinosi.

SOQQAMAASINETE LOOSO 17:31

Isi doodhino manchi widoonni qole manna baalaho halaalu yoo yaanno barra hirqino. Konne coye manna baalaho egensiisinohu, isi doodhinoha reyotenni kayiseeti» yii.

ROOMU SOKKA 14:10

Ati rodookki mayira bushiishatto? Woy mayira mishatto? Mitto barra ninke wo'munku Maganu yoo barcimi albaanni uurrineemmo.

ROOMU SOKKA 2:16

Kuni ikkannohu ani kuleemmohu Danchu Duduwi garinni, Maganu Yesuusi Kiristoosi widoonni qole mannunnita maaxante noo hedo qorichishanno Barraati.

ROOMU SOKKA 2:5

Aagintaawa hoogakkinninna mokkookka ikkakkinni, Maganu hanqinna halaalaancho yoo dagganno barrira hanqosi aanaho lexxatto.

UMI QORONTOOSI 4:5

Kunnira, Mootichu Yesuusi yoo yaara daa geeshsha, aye aanano yoo yitinoonte. Isi daanno woyite, tunsote go'le noore haa're xawo fushshanno; mannu wodani giddo nooreno reqecci assanno. Hakka waro, Maganu baalanka gari garisinni jajanno.

UMI QORONTOOSI 5:13

Gobbaanni noori aana yoo yaannohu Maganoho. Kunnira, Qullaawa borro yitannonte gede, busha mereeri'nenni hunne.

UMI XIMOOTEWOOSI 1:9

Seera uyinoonnihu danchu mannira ikkinokkita anfoommo; seera uyinoonnihu hajajantannokkirira, haxawarrootaho, maganittete heeshsho heedhannokkiriranna cubbaataammaho, qullaawoota ikkitinokkiriranna ayyaanaamo coye mishshannorira, anna woy ama shitannoriranna mannu lubbo huntannoriraati.

YIHUDA 1:16

Kuri, uminsata busha yorto ha'runsitanni, wo'manka woyite gunguntannoreetinna mittu coyira nafa hagiidhitannokkireeti; afiinsanni boo'nate qaali fulanno; uminsara injaannore hasidhanni wole manna bokkeessitanno.

YOHAANNIS AJUUJA 13:11

Layinki moyicho baattote giddonni fulanna afummo. Ge'reewunnita labbannoti lame buudda noosi. Isino dhudhuufu gede coyi'ranno.

YOHAANNIS AJUUJA 22:20

Konne coye farci'rannohu, «Ee, rahe dayemmo!» yaanno. Hamii'ni! Mooticha Yesuusa, amo!

UMI SAAMUEELI 2:3

«Manna'ya, naaxxate coyi afii'nenni fuloonke; afii-wo'mano coyidhinoonte. Kaaliiqi Maganu egennaamohona, mannu looso baala keene la"annohu isooti.