IYYAASU 18:16 - Qullaawa Maxaafa

¹⁶ Hakkiinni, Refayimi lagichira aliyye goofimarchira noohu Hinoomi lagichi qotira ilaalu hundira dirranno. Hakkiinni sae, Iyaabuusootu goorora wodiidi gafira noohu Hinoomi lagichi widoonni hige Ayini-Rogeeli sa"anno.

IYYAASU 18:16 ပူးပေါင်းရင်းမြစ်များ

LAYINKI SAAMUEELI 17:17

Hatte yannara Yoonaataaninna Akima"aasi Katama e'anna anfanninsakki gede Ayini-Rogeeli Buichowa ofolte no. Mitte beetto marte ikkanni noore baala kultunsa. Insano affinore hadhe moote Daawitira kultusi.

LAYINKI SAAMUEELI 5:18

Filisxeemeno dagge xerri yite Refayimi Lagicha amaddu.

UMI MOOTOOLLA 1:9

Mitto barra Adooniyaasi, Ayini-Rogeeli yinanni buichowa Zoheleeti Kinchi mule ge'reewo, woraammanna harditino wodha gorre kakkali. Annisi ooso roduuwasi baalanna Yihudu roorroota baala kakkalote jilira dagganno gede woshshi.

LAYINKI MOOTOOLLA 23:10

Iyosiyaasi Hinoomi Lagichira nooha Tofeeti yinanniha dagate maganna magansi'nanni darga lageessi. Kunni garinni labbaaha woy meyata beettosi Molookira shilqishannohu hee'rannokki gede assi.

UMI DUDUWO 14:9

Hakkunnira albaanni Filisxeeme dagge Refayimi Lagicha e'e horritino.

LAYINKI DUDUWO 28:3

Hinoomi Lagichira hixaana giire, Israeele hattenne baatto ragidhu waro Kaaliiqi shorre hunino gosata tiyyi'nanni woga amade, umisi ooso kakkalino.

LAYINKI DUDUWO 33:6

Ilino oosono Hinoomi Lagichira shilqote kakkalo asse shiqishi. Qoleno kiilanninna hellee la"anni qaallooletenninna ekera coyishshiishshannori ledo ma'lino. Kunni garinni Kaaliiqa hanqissannota lowo bunshe loosino.

ISAYAASI 30:33

Lowo dirira albaanni, Asoori moote giirrannihu, giirate dargi qixxaawe no. Hakko hala'ladonna diime ikkino dargano, lowo haqqe duunnoonni; haqqeno ruqanu gedeehu Kaaliiqi fooli itanno.

ERMIYAASI 19:11

Hakkawoyintenni Olantote Mootichi, «Kuni doru uduunnichi layinkimeeshsho dhaawamannokkinte gede, konne mannanna konne katama hakko garinni hiiqqaqqeemmo; reeshsha madaadhitannowa hoogge massite Tofeeti madaadhitanno.

ERMIYAASI 19:2

Hiiqqaqqamino bacci noo waalchi widoonni higge Hinoomi Lagichira gobbaanni fulte, ani kuleemmohere,

ERMIYAASI 19:6

Kunnira, konne darga Tofeetinna Hinoomi yaa agurre, Gorrote Dargaati yinanni yanna dagganno.

ERMIYAASI 32:35

Labballonna seenne oosonsa Molooki yinanni maganira kakkaltara Hinoomi Lagichira Ba"aalira kakkalote darga seekkitino. Ani togo asse diyoommonsa; togo assite Yihuda cubbu giddora eessitanno yee dihedoommo» yee dawarie.

IYYAASU 15:63

Kayinnilla, Yihudu manni Yerusaalamete heedhannore Iyaabuusoota shorre huna didandiino. Kunnira, Iyaabuusootu techo geeshsha Yerusaalamete Yihudu manni ledo heedhanno.

IYYAASU 18:28

Seelai, Eleefi, Yabuusi (Yerusaalame) Gibianna Qiriyaati-Yiariimi Yinanniri kiironsa mitteenni 14 katamma ikkitanna, gaangaawinsara noore shiimmaadda katammano giddo amaddanno. Kunnira, Biiniyaami ga're iqqa assidhe adhitino baatto tenneeti.

EJJEETTO 1:21

Biiniyaami ga're kayinni, giddonsa heedhannore Iyaabuusoota hakkiinni fushsha didandiitino. Kunnira, Iyaabuusootu techo geeshsha Biiniyaamootu ledo mitteenni heedhanno.

EJJEETTO 1:8

Yihudu manni Yerusaalame qase amadi; mannano bisetenni doddole, katamano giiri.

EJJEETTO 19:10

Leewaawichu kayinni hakko hashsha hakkiicho galara hasi'rinokkihura, hogomboonnire lamenta harresinna galtesi adhe Yabuusi yinanniwa Yerusaalame ha'ri.