FAARSO 44:2 - Qullaawa Maxaafa

² Ati daga baattonsa aaninni shorrite, ate manna baattonsara worootto; wole gosa qorichishshe, mannakki kayinni qawaaxxisootto.

FAARSO 44:2 ပူးပေါင်းရင်းမြစ်များ

LAYINKI SAAMUEELI 23:12

Saami kayinni hakko uurre, Filisxeemete ledo olami; hakko barrano Kaaliiqi lowo qeelle abbino.

LAYINKI SAAMUEELI 7:10

Manni'yara Israeelete mitto darga doore hakkiicho heedhanno gede assoommo. Hakko heedhannowa kunni ka'a gadagu diamadannonsa. Kawiira daggeenna gashshitannonsare worummonsahunni kayisse, haxawarra gosa yanna yannantenni qassinonsa. Kunni ka'a kayinni hattoori di"ikkanno. Diinikkiwiinnni agarammoheranna minekkino kaajjishe ragidhannohe ilano eemmohe gede coyi'roommo.

FAARSO 105:44

Wole daga baatto uyinsa; wolootu daafurte loosidhino jajja ragisiisinsa.

FAARSO 78:55

Mannisi alba hige ha'ri deerrinni, daga albinsanni shorrino; baattono siiwotenni beehinonsa. Dagate minnano mannisira uyino.

FULO 10:2

ki'neno, tenne maalalenni Gibitsoota asse godo'loommo gara ooso'neranna ooso'ne oosora kultinanni. Kunninni, ki'ne baalunku ani Kaaliiqa ikkoommota affinanni» yiisi.

FULO 15:17

Kunnira, ati mannakki haadhe ha'ratto; ate ilaali aana massite worattonsa; hakkuno hee'rattora doodhootto dargaati; Qullaawu Mini angakki mintinoho.

FULO 15:19

Israeelete manni baaru giddoonni hige moola baatto kaxxanni fuli; Kaaliiqi kayinni Feriooni, faradi gaare, faradunna faradaasine baaru giddora e'uta, waa aanansa kamballi assi.

FULO 23:28

Ki'nera balaxe alba qole harridiida soye, Hiwoota, Kana"aanootanna Hitoota albi'nenni shorreemmo.

FULO 34:11

Techo barrinni hajajeemmohe hajajo agadhi; anino Amooraawoota, Kana"aanoota, Hitoota, Ferizoota, Hiwootanna, Iyaabuusoota albi'nenni shorreemmo.

ISAYAASI 51:9

Kaaliiqa ballo kai! Ka'e wolqakki leellishi! Albi ilamara assittonte gede kainke! Reaabi murmuroottohu ateeti.

ERMIYAASI 32:23

Insa kayinni dagge tenne baatto ragidhuhu gedensaanni, atera hajajamanna seerakki agadha gibbino. Hajajoottonsareno diwonshitino; konne busha coye baala abboottonsahu kunni daafiraati.

KIIRO 13:32

Togo yite kaphu duduwo mannu mereero fincitanni, «Hatti la'ne dangoommo gobba manna diwortannote; hakko hee'ranno manni baalunku jajjabbaho.

MARRO 32:7

Alba saino dirire qaagge; kultanno'nena annuwa'ne xa'me. Alba sainore kultanno'nena geerra'ne xa'me.

MARRO 4:38

Tenne baatto iilla rakkini yannara, ki'nenni roore jajjabbanna jawaata daga albi'nenni hoolino. Hatto assinohu, techo la'inanninte gede ki'ne insa gobba haa're masse baattonsa iqqa asse aa'neraati.

MARRO 7:1

«Magani'ne Kaaliiqi martine ragidhinanni baatto massanno'nenna haammata ki'ne roortannota jajjabbanna wolqaataamma 7 daga: Hitoota, Gergesoota, Amooraawoota, Kana"aanoota, Ferizoota, Hiwootanna Iyaabuusoota albi'nenni shorranno yannara,

IYYAASU 10:11

Amooraawootu, Israeelootu olantowiinni Beetihorooninni Azeqa eelallitte higge xooqqanni heedheenna, Kaaliiqi gordunni lowiddaanna kaade dirrisi. Kunnira, Israeelootu shitinorinni roore kaade shitinori kiiro lowo geeshsha batidhu.

IYYAASU 10:42

Israeelete Magani Kaaliiqi Israeelete gaaramino daafira, Iyyaasu tenne mootoollanna gashshootensa baalanka mitte hige gaadino gaadinni qeele gudise amadi.

IYYAASU 11:23

Kaaliiqi Muse hajajino garinni, Iyyaasu baatto baala angasira qo'li. Mitte mittente ga'rera iqqa asse Israeelootu baalunkura beehi. Hakkunni gedensaanni olu uurreenna baatto fooliishshidhu.

IYYAASU 21:43

Kunnira, Kaaliiqi akaakkansara aara xaarinonsa baatto baala, Israeelootaho uyinsa. Baatto ragidhuhu gedensaanni, teesse heedhu.

IYYAASU 24:12

Ki'ne alba higgine qaaffini deerrinni, 2 Amooraawootu mootoolla fushshe hunate insa wodana ba'anno gede assoommo. Kuni baalu ikkinohu bagadi'nenninna urde'nenni di"ikkino.

IYYAASU 3:10

Ki'ne alba higgine hadhinanni bikkinni, isi Kana"aanoota, Hitoota, Hiwoota, Ferizoota, Gergesoota, Amooraawootanna Iyaabuusoota albi'nenni hoolanno. Heeshshote Magani mereero'ne noota affinannihu,

EJJEETTO 6:13

Gedewooni daware, «Mooticha'ya, Kaaliiqi ledonke hee'roommero kuni baalu qarri iillannonkeni? Annuwanke, ‹Kaaliiqi Gibitsete gobbanni fushshinonke› yitanna macciishshinoommo. Xa kayinni Kaaliiqi ninke callachishinonke. Midiyaamootu angara sayise uyinonke» yii.