DAANIEELI 12:3 - Qullaawa Maxaafa

³ Hatte yannara egennaammu gordu xawaabbi gede xabbanno; lowo manna rosiisse halaalu widira qoltannori baalu hegerera gordu beeddahe gede warri yite xabbanno» yii.

DAANIEELI 12:3 ပူးပေါင်းရင်းမြစ်များ

FULO 34:35

Israeelete manni xawinoha Muse alba la"anno; isi qole Kaaliiqi ledo hasaawara ha'ra geeshsha albasi diphanno.

LAWISHSHA 11:30

Keeraanchimma heeshsho uyitanno; haxawarrimma kayinni barra haransitanno.

LAWISHSHA 3:35

Egennaammu ayirrinye ragidhanno. Hawanyootu kayinni shollinye duu'nitanno» yii.

LAWISHSHA 4:18

«Keeraanote doogo, soodo arrishsho gedeete; barri taalooti geeshsha lexxitanni hadhanno.

ROSIISAANCHO 12:9

Hayyichu rosiisaanchi egennaamo ikkinohura mannaho egenno rosiisino. Isino maammaashsha xiinxallihu gedensaanni, aante aantetenni qixxeesse worino.

ISAYAASI 53:11

Keeraanchu soqqamaanchi'ya lubbosi qarrantuhu gedensaanni, heeshshote xawaabba lae hagiidhanno. Egennosinnino lowo manna keereensanno; saonsano duqqanno.

ERMIYAASI 23:22

Gordoho ane ledo songo ofoltinoha ikkoommero, ki'ne Yihudu manni cubbo'ne aagintaabbinanni gedenna, anewa higginanni gede kultanno'ne.

DAANIEELI 11:33

Mannu mereero noo egennaammi manna rosiisatenni egenno afi'ranno gede assitanno; shiima yanna gedensaanni kayinni gamisu giiratenninna bagadunni reyitanno; jironsa saamanteenna insano usurantanno.

DAANIEELI 11:35

Egennaammu giddonni mito mitoho lowo qarri iillannonsa; ikkeennano kunninni kainohunni ko'rishantenna ximbiiwante fultanno. Kuni coyi Maganu hedinoti goofimarchu yanna iillita geeshsha keeshshanno.

DAANIEELI 12:10

Lowo manni ko'rishantenna ximbiiwante fulte kullanniri nookkire ikkitanno. Haxawarrootu kayinni mittoreno wodanchitannokkihura bunshete aana bunshe leddanno. Wodancha dandiitannori egennaamma callaho.

MAATEWOOSI 13:43

Keeraano kayinni Anninsa Gashshootira arrishshote gede xabbanno. Macca noohu macciishsho!» yiinsa.

MAATEWOOSI 19:28

Yesuusi, «Halaale kuleemmo'nena, Manchi Beetti ayirrinyu barcimira ofollannowa haaro gobbara ane hoode hadhinanniri, ki'neno tonaa lamu ayirrinyu barcimira ofoltinanni; tonaa lamente Israeelete ga'rera yoo yitinanni.

MAATEWOOSI 24:45

Yesuusi lede, «Minisi mannira sagale yannatenni aannohu, Mootichu minisira doodhinohu ammanaminohunna egennaamu soqqamaanchi ayeti?

YOHAANNISI 4:36

Gide mixxannohu hunkiisi guma gudhanno; hegere heeshshora ikkanno laalcho gamba assi'ranno. Wixi'rannohunna mixxannohu mitteenni hagiidhanno.

YOHAANNISI 5:35

Yohaannisi buwanni xawanno caabbichooti; ki'neno shiima yannara isi xawaabbinni hagiidhitinara hasidhinanni.

SOQQAMAASINETE LOOSO 13:1

Antsookiyaho noo beetekiristaanera himanaanote yinanni rosiisaanonna qaale kultannori no. Insano Barnabaasi, kolishshu yinanni Simiooni, Qereenichu Lukiyoosi, shoolki anga gashshinohu Heeroodisi ledo lophinohu Maanahenna Saawuli no.

UMI QORONTOOSI 3:10

Maganu uyinoe elto garinni anino ogeessu manchi gede safo safummo. Wolu ani safoommo safo aana minanno. Mittu mittunku hiitto asse minannoro xunse afo!

EFESOONI SOKKA 4:11

Isi mito mito soqqamaasine, woloota himanaano, mito mito Dancha Duduwo kultannore, woloota qole ammanaano allaaltannorenna gamisoota rosiisaano ikkitanno gede assino.

IBIRAAWOOTA 5:12

Xaa geeshsha keeshshitini yannara ki'ne rosiisaano ikka dandiitinannihu baino; kayinnilla, Maganu qaaliha umi roso wolu manni galagale rosiisa'nera hasiisanno. Kaajjado sagale ita hasiisanno'ne yannara, ado agginanni heedhinoonni.

LAYINKI PHEEXIROOSI 3:15

Mootichinke cinca gato'nera ikkitinota affe. Baxaminohu rodiinke Phaawuloosino uyinoonnisi egenno garinni borreessino'nehuno konneeti.

YOHAANNIS AJUUJA 1:20

Qiniiticho anga'yara la'anni noottori, lamala beeddakkonna culkunni seekkinoonnihu lamalu caabbiyye worranni uduunni tiro kunninni aante noote: Lamala beeddakko lamalante beetekiristaane sokkaasineeti. Culkunni seekkinoonnihu lamalu caabbiyye worranni uduunni lamala beetekiristaaneeti» yiie.

EJJEETTO 5:31

Kaaliiqa, baarigaarrakki baala togo ikkite ba'o; ate baxxannori kayinni, soodo arrishsho gede xabbo. Hakkunni gedensaanni, baatto 40 diri geeshsha keere afidhu.