AMOOTSI 2:8 - Qullaawa Maxaafa

⁸ Asale baata dandiitannokki buxane aaninni uddano amadote adhitanno. Kakkalo shiqishshanno darga baalawa hattenne uddano diphite goxxanno. Asalaasinete anganni murote adhitinota woyinete xajje abbite Maganinsa mine agganno.

AMOOTSI 2:8 ပူးပေါင်းရင်းမြစ်များ

FULO 22:25

«Manni'ya giddonni ledo'ne hee'ranno buxichira liqiissitiniro, qallo adhitinoonte.

ISAYAASI 57:7

Kakka'litinaranna foortinanni magansidhinara, seeddaanna ilaalla iimira fultinanni.

HIZIQEELI 18:12

buxanenna qarrantinore miiciro, manni jajja wolqatenni adhiro, woxe liqiissanno woyite amadote adhinoha qolannokkiha ikkiro, wole daga magansidhannowa mare kaphu maganna magansi'ratenni tiyyi'nanni coye assiro,

HIZIQEELI 18:7

Ayeno didoganno; woy aye jajjano wolqatenni diadhanno. Woxe liqiissanno woyite amadisiinsoonnisire baala qolanno; hudi'rinoha itisanno; kallinoha uddisiisanno.

HIZIQEELI 23:41

Biifino daallasinsara ofollino; ani oommonsari hixaanunna ejersu zayite gattukkinni, dancha coye baala albansaanni noo xarapheezzi aana dire worino.

HOOSEI 4:8

Manni'ya cubbi ki'nera jiro ikkino'ne daafira, mannu cubbo lede loosara hasidhinanni.

HOOSEI 7:14

Daallasinsa aana haabbe raartannota ikkinnina wodaninsanni anewa higge dihuuccidhanno. Gidenna woyinete xajje afidhara kayinni dagate gede bisonsa huduuxxitanni huuccidhanno; ane aanano mokkookkitanno.

AMOOTSI 3:14

Loosino cubbi daafira, Israeelete manna qorichisheemmo barra, Beeteli Katami giddo nooha kakkalote darga diigeemmo; kakkalote darga noo buuddano, hiiqqaqqante baattote aana ubbanno.

AMOOTSI 4:1

Maqalloonnihu Baasaani lali gede missinoonniri, Samaariyu meenti, konne coye macciishshe. Ki'ne wolqa hoogginore raateessitinanni; buxane gawajjitinanni; wo'manka woyite ayyiddaanna'ne, dimbisanno ago abbanno'ne gede qarrissinanni.

AMOOTSI 6:4

Daaniichu hinkonni seesiinsoonni daallasira goxxinanni; ge'reewu wilii'lenna, lalu siitta ittinanni; haranchu daallasi aana gangalattinanni.

AMOOTSI 6:6

Woyinete xajje birilletenni ikkikkinni, gawatetenni agginanni. Lowo geeshsha waaga iibbado shitto buudhitinanni; Israeelete aana daggino baora kayinni, horonta didadillitinanni. Konne baala coye assitinanni daafira, ki'nera aanne'e!

UMI QORONTOOSI 10:21

Mootichu finiinchira agginanni, qoltine durriisu finiinchira aga didandiitinanni. Mootichu sagale ittinanni heedhine, qoltine durriisu sagale ita didandiitinanni.

UMI QORONTOOSI 10:7

«Mannu itaranna agara ofolli; sirbahono kai» yine borreessinoonninte gede, insa giddonni gamisu kaphu maganna magansidhino; ki'neno insa gede ikkitinoonte.

UMI QORONTOOSI 8:10

Egenno afidhinoonniri kaphu maganna galmira ittinanna wodana lophinokkihu afiro, kaphu magannara kakkalloonniha itate diyoranno?

EJJEETTO 9:27

Gatinni woyinensa xinqidhe huuncituhu gedensaanni, maganinsa mine hagiirru ayyaana ayirrissu. Hakkiicho ittanninna agganni Abemeleeki xontu.