Apocalipsis 18:23 - Quiché Bible

²³ Ri u sakil jun chäj man cäjuluw ta chic awuc'. Man cätataj ta chi awuc' ri u ch'abal ri ach'ajilaxel mawi ri lok'om pataninel. Ri e ajc'ayib ri xebel bic iwuc' nabe canok e are' ri nimak na qui k'ij cho ri uwächulew, xebasub conojel ri nimak tak tinimit cumal tak ri e awitzinic.”

RI KꞌAKꞌ TESTAMENTO PA TZIJOBꞌAL KꞌICHEꞌ

²³ Man katunan ta chi wi ri qꞌaqꞌ tunabꞌal awukꞌ xuqujeꞌ man katataj ta chi nimaqꞌij rech kꞌulanem, rumal cher ri aꞌwaꞌjkꞌayibꞌ sibꞌalaj nim kan kiqꞌij pa ronojel ri uwachulew xuqujeꞌ xaꞌmenkꞌetij konojel ri tinimit rech ri uwachulew rukꞌ ri aqꞌijinik.

K'iche'

²³ Man cätunun tä chi na pa tak ja ru sakil ri jun candela, man cätataj tä c'ut ri wojcorem pa tak ri c'ulanem. Nabe canok ri ajc'ayib ri e c'o awuc' e are nimak qui k'ij cho ruwächulew. Xesubtaj c'u conojel qui wäch winak cho ruwächulew ruc' ri itzinic ri xabano, —xcha'.

K'iche' (New Orthography)

²³ Man kätunun tä chi na pa taq ja ru saqil ri jun candela, man kätataj tä k'ut ri wojkorem pa taq ri k'ulanem. Nab'e kanoq ri ajk'ayib' ri e k'o awuk' e are nimaq ki q'ij cho ruwächulew. Xesub'taj k'u konojel ki wäch winaq cho ruwächulew ruk' ri itzinik ri xab'ano, —xcha'.

Apocalipsis 18:23 ပူးပေါင်းရင်းမြစ်များ

Ucab Ajawinelab 9:22

Ri Joram aretak xril ri Jehu, xubij che: “¿La re jamaril ri a petic Jehu?” Ri Jehu xutzelej u bixic che: “¿Jas ta che c'o jamaril, ri a nan, Jezabel c'ä u takem ri qui chac re nim ch'utin xukuje' tak ri q'ui qui wäch tak ritzibal ri quebubano?”

Ri Job 21:17

¿Jampa' ta chupinak ri qui chäj ri banal tak etzelal? ¿Jampa' ta e kajinak pa jun u q'ueyowal? ¿Jampa' ta oyowarinak ri Dios cuc' e u jachom ta c'u pa ri rikoj c'ax?

E C'ambal tak Tzij 24:20

rumal rech chi ri banal etzelal man utz ta cutaklebej na: ri banal etzelal cayubquen na jacha' jun chäj.

Ri Isaiy 23:8

¿Jachin xtakow ulok wa' puwi' ri Tir ri qui nimal tinimit, ri e c'o wi ajc'ayib ri nimak qui k'ij, ri e c'o wi lok'omanelab ri nimak na qui banic cho ri uwächulew?

Ri Isaiy 47:9

Man c'o ta c'u canabej, xa pa jun k'ij quepe na we quiäkasakil ri' pawi': catcanaj na malca'n ixok, xukuje' man e c'o ta chi awal, pune' c'u quebaban q'ui k'ijinic xukuje' quebaban jalan tak qui wäch subunic.

Ri Jeremiy 16:9

Rumal rech chi ri in, ri Ajawaxel, ri c'o ronojel u cuinem, ri u Dios ri Israel, quink'alajisaj: In quinban na chi quebetanabax pa we ulew ri' ri bix tak que nimak'ij xukuje' quech quicotemal, xukuje' tak ri bix quech tak c'ulanem. We jastak ri' quebec'ulmataj na chquipam tak ri kas qui k'ij, kas c'u ix quixilow na.

Ri Jeremiy 25:10

Quenbana' chi chquixo'l chi man quetataj ta chic bixonic quech nimak'ij xukuje' jajatem, mawi tak bixonic re c'ulanem, mawi ri u juc'uq'uem ri quiebal, mawi quilitaj ta chic ri chäj tzijitalic.

Ri Jeremiy 7:34

Quebenwetzelaj na qui wäch tak ri bix re nimak'ij xukuje' re jajatem ri queban chquipam tak ri tinimit re Juda xukuje' xo'l tak ri ja pa Jerusalen, xukuje' tak ri bix quech c'ulanem; ronojel ri ulew cäq'uextaj na pa jun chaki'j uwo sak.”

Ri Nahum 3:4

Ronojel qui mac quech tak ri qui mac quech ri nim ch'utin ri' ri nojinak che nimal xukuje' u jelisam rib, ajtij re itzinic, ri cumal tak ri e u mac ri quech ri nim ch'utin xukuje' tak ri e ritzinic quebusub tak tinimit xukuje' nimak tak tinimit.

Hechos 8:11

Xquitatabej ri u tzij, rumal rech chi e u subum ulok ruc' ri ritzibal.

Apocalipsis 12:9

Xq'uiak c'u bic ri nimalaj dragon, ri ojer cumätz, ri cäbix itzel xukuje' Satanas che, ri quebusub conojel ri winak. Xq'uiak bic cho ri uwächulew. Xukuje' ri u tako'nib xeq'uiak bic ruc'.

Apocalipsis 17:2

Ri ajawinelab aj uwächulew xemacun ruc' ri ajmacalaj ixok quech nim ch'utin. Rumal ri u wa'l ri u uva, ri e jekel cho ri uwächulew e k'abarinak rumal ri u macunic ri ixok ri quech nim ch'utin.”

Apocalipsis 17:5

C'o jun bi'aj tz'ibatal cho ri u metz'al ri u palaj, jun awatalic wa': “Ri nimalaj Babilon, qui nan ri quemacun cuc' ri e nimak ch'utik, xukuje' qui nan conojel ri itzelalaj tak jastak ri e tz'il ri e c'o cho ri uwächulew.”

Apocalipsis 18:22

Man quetataj ta chic ri cok'ebal ri arp xukuje' ri ajk'ojomab, ri cok'ebal ri su' xukuje' tak ri trompet. Man c'o ta chi winak awuc' ri quena'w ta che tak chac. Xukuje' ri u juc'uq'uic ri ca' man cätataj ta chic awuc'.

Apocalipsis 18:3

Rumal ri u wa'l u uva conojel ri nimak tak tinimit xek'abar ruc' ri u rayixic ri u macunic. Ri ajawinelab aj uwächulew qui banom macunic ruc'. Ri ajc'ayib re ri uwächulew e k'inomarinak rumal ri u chuk'ab ri u k'inomal.”

Apocalipsis 18:9

Ri ajawinelab aj uwächulew ri xcuc'aj quib ruc' che qui banic macunic, ri qui mulin wi' k'inomal ruc', ri e are' cäquil na ri u sibal aretak cäc'atic, quebok' na, cäquiq'uis na quib che ok'ej puwi'.

Apocalipsis 21:8

Are c'u ri cäquixe'j quib, ri man quecojon taj, ri e tz'ilobinak cumal itzelalaj tak jastak, ri cämisanelab, ri xak cäcuc'aj quib cuc' achijab ixokib che qui banic ri macunic, ri cäquiban itzinic, ri cäquik'ijilaj tak diosib, ri e banal tak tzij, quebe ri e are' pa ri cho ri cänicow wi ri k'ak' xukuje' asubre, are wa' ri ucab cämical.”

Apocalipsis 22:15

Chquij c'u ri u chi' quec'oji' wi can ri winak ri cäquiban tz'ilalaj tak jastak ri quequiban ri itzinic, ri xak cäcuc'aj quib cuc' achijab ixokib che qui banic macunic, ri cämisanelab, ri quequik'ijilaj tak diosib, xukuje' conojel ri cäkaj ri banoj tzij chquiwäch, ri cäquiban subunic.

Apocalipsis 22:5

Man c'o ta chi chak'ab. Man cajwataj ta chic ri u sakil ri chäj chque, mawi ri u sakil ri k'ij rumal rech chi ri Ajawaxel Dios cäjuluw na paquiwi', ri e are' quebajawin na amak'el chbe k'ij sak.

Apocalipsis 6:15

Ri ajawinelab re ri uwächulew, ri nimak qui k'ij, ri e qui nimal ri ajch'ojab, ri k'inomab, ri c'o qui chuk'ab, conojel ri lok'om tak pataninelab, xukuje' conojel ri e tzokopitalic, conojel xcawaj quib pa tak ri jul xukuje' chquixo'l ri nimak tak abaj ri e c'o pa ri juyub.

Apocalipsis 9:21

Mawi ne xequitanaba' ta ri cämisanic, ri itzinic, ri xak cäcuc'aj quib cuc' achijab ixokib che qui banic macunic, mawi ne ri e eläk'anic.