Proverbios 17:3 - Biblia Mixe de Quetzaltepec

³ Yë pu'ts pujxn ets poop pujxn yë'ë mëët yë jëën yaj'ijxmatsy; e yë jot winma'any yë'ë Tios nyija'ap wi'ix yajpaaty.

Biblia Dc en Mixe de Quetzaltepec

³ Yë pu'ts pujxn ets poop pujxn yë'ë mëët yë jëën yaj'ijxmatsy; e yë jot winma'any yë'ë Dios nyija'ap wi'ix yajpaaty.

Proverbios 17:3 ပူးပေါင်းရင်းမြစ်များ

Isaías 48:10

Tëë mijts nyajwa'atsy, je'eyëp ko ka'ap jyëtu'unëty tä ja'ay poop pujxn tyajwa'atsyën, yë'ë mëët të nyajwa'atsy yë ëyo'on jotmay,

Jeremias 17:10

Ëjts, mëti'ipë Wintsën'ajtpën, mëti'ipë nyija'awëtyääpyën yë jot winma'any, mëti'ipë wa'ats y'ixy'äjtypyën wi'ix ja'ay tu'ukjaty myäy tyäjyën, mëti'ipë myooytyääpyën nitu'ukjaty yë ja'ay kyuma'ayën ijxtëm të tyuny të kyäjpxyën.

Salmos 26:2

Ix yë njuukyajtënës, winma'any'ijxkës, ijxmats yë njot nwinma'anyës. Tëkokyë xy'ijxta'ajëty wi'ixës nmay ntajyën.

Proverbios 27:21

Yë pu'ts pujxn ets poop pujxn jap yaj'ixy jëënjotypyën janty yë'ë, e ja'ay yë'ë mëët yajtuk'ixy wi'ix jyä'äy'ätyën ko oy yajnimëtyä'äky.

1 Pedro 1:7

Jä'ä ko jëtu'un miits ja mëpëjkënëty ijxtëm ja pu'ts pujxnën mëti'ipë jëwyiin nitoopyën ets yaj'ixy pën oy. Ja mëpëjkpë mëti'ipë myëtënääpyën ja ëyo'on jotmay, yë'ë wäänëni'ik tsoowpatp këtiinëm ja pu'ts pujxn mëti'ipë wintëkoopyën; ko miits näjyëtu'un myaj'ijxmatstëty ets xymyëtänëtëty ja ëyo'on jotmay, kumay miits mnaxa'antë, mëj'äämpy ets wyintsë'ëkë ko ënäty ja Jesukristë myiny.

1 Crónicas 29:17

Ëjts nija'apës Wintsën, ko mijts wa'ats jot winma'any xy'ixy xynyijawë, yë'ë mtsojkën'ajtyp ets ja'ay winë tëyajtën tunëty. Paaty yam nmo'oy tëkokyë ya'atë winë aaw winëjot. Tyam n'ijxypyës ko yë mnaax mkajpn tyampë yaa yajpaatyën tu'ukmukyë mëët ja jot winma'any oy tsujpë, tëë mtukë'ëtëkëty tëkokyë ya'atë ayajk ako'onën.

Salmos 66:10

Tios, mëti'ipës nTios'ajtëpën, tëës mijts xywyinma'any'ixtë wi'ixës nja'ay'atën, paaty mijts të xyajwa'atstës tä yë poop pujxn ja'ay tyajwa'atsyën.

Salmos 139:23

Mijts Tios, ijxkës ets xynyijawëty yë njot nwinma'anyës. Ëkwinma'any'ijxkës ets xynyijawëty wi'ixës nmay ntajyën.

Proverbios 15:11

Yë Tios nyija'ap jëna'a jyää'aty o'kën tëko'oyën; ets jëna'a o'kpë nyaaxtëkë. Paatykyëjxm näjyëtu'un wa'ats nnijawë yë naaxwiinyëtë ja'ay jyot wyinma'any.

Proverbios 17:2

Tu'uk yë mëtuunpë wijypyë tsojk wintsën nyaxëty ma tu'uk ja u'unkën mëti'ipë ka'ap nyitëkëtyën y'u'unk'atëty; ets nëjkxëp tpëky ja kyuma'ayën jëtu'un tä jeexyë y'u'unkëtyën.

Ezequiel 22:18

Yë Israel kajpn jëtu'un yë nyäxy maas ëjtsën tä wyinkinyën yë pujxn ko wyin'ëëtsy, tä yë juunpujxn, yu'unk pujxn, yëk pujxn ets poop pujxn.

Daniel 11:35

Nëjkxëp näjyëtu'un yaj'ixjëtit yajpaajëtitë ja ja'ayëty mëti'ipë ënäty ja naax kajpn të tyaj'ijxpëktën ets nëjkx yajwinma'any'ixtë ets yaj'ixtëty pën oy ja wyinma'anyëty; ets ja jyuuky'ajtënëty, koonëm kyukëxëty ja xëëw juukyajtën.

Deuteronomio 8:2

Mja'amyätstëp wi'ix ojts ja mWintsën jam myajjëtitëtën të'ëts'itum wëxtyikxy jyëmëjt. Këtiipë mëj këjxm mnäjyawëtëty ets t'ixa'any tnijawëja'any pën wi'ix miits myajpaatë ets wi'ix mmaytyë mtajtë, pën nëjkxëp xypyatuntë ja y'ënä'ämën tyiyajtën, ëkë pën ka'ap.

Deuteronomio 8:16

Ets jam të'ëts'itum yë'ë ojts mtukayëtë yë maná, ja ka'ayën ukën mëti'ipë ja m'aptëjkëty ka'ap t'ijxyajtën. Këtiipë mëj këjxm mnäjyawëtëty ets t'ixa'any tnijawëja'any pën wi'ix miits myajpaatë ets wi'ix mmaytyë mtajtë, jä'ä jëtu'un tyuun ets kë'ëm nëjkx xytyuk'oy'atë.

Job 23:10

Yë'ë wa'ats tnijawë nye'eyënës nnajxënës; koos xy'ëk'ixa'anëty, wa'atsës xypyaatëty tä pu'ts pujxnën.

Job 28:1

Tää yë it naaxwiinyëtë yajpaaty ma pyëtsimyën yë poop pujxn ets ma pyëtsimyën yë pu'ts pujxn.

Proverbios 16:2

Yë ja'ay jëtu'un nyäjyawëty aak'oy winë tuny, Tios yë'ë y'ijxtääpy wi'ixjaty ja'ay tii tunyën.

Proverbios 21:2

Yë naaxwiinyëtë ja'ay aak'oy t'ixy tëkokyë mëti'ipë tyuunpy kyäjpxypën; e Tios yë'ë patëp t'ixëty pën oy ja ja'ay ja jot winma'any tmëëtëty.