Números 6:20 - Biblia Mixe de Quetzaltepec

²⁰ Ënät ja teety jëtu'un tyajnaxëty ja wintsë'kën jam Tios wintum. Yë jëyujk mëti'ipë yajyajkpën ko ja Wintsën yajmo'oy yajkexy ja wyintsë'kën ets pyuuy mëti'ipë yajmoopyën ma ja ja'ay nyäkyuyäkyën, mëk'ëmaay nyäxy ets yë'ë teety jyä'ä'ajtyp. Ko ënäty jëtu'un të kyixy të nyäxy ja xëëw jëmëjt mapaat ja wyaantakën tyaj'ëtukyën ja nazareo, jyëkyäjpnëp t'uukëty yë tsatym nyëë.

Números 6:20 ပူးပေါင်းရင်းမြစ်များ

Eclesiastés 9:7

Paaty ni'ik oy, ko xytyukxoonta'akëty yë mkääky m'uuky mëti'ipë mpatyp m'ijxpyën; tukxoontä'äky yë tsatym nyëë mëti'ipë tëëpë nyimaanaxyën ko xy'uukëty, jä'ä ko yë Tios y'oy'ijxyp yë oypyë mtu'unën.

Números 5:25

Ja teety yë'ë nëjkx t'ëxajë ja ayajk ako'onën, mëti'ipë ënäty ja to'oxytyëjk myëët'ajtypyën ma ja kyë'ëjën ets tmo'ojëty ja Tios, jam tpëjkta'akëty ma ja wintsë'këntyaknën.

Juan 19:30

Ko ja Jesús tkupëjky ja tsatsym nyëë xun ënät y'ënäny: Tyam tëë ënät tyuunta'ay jyajta'ayë tu'kë'ëyë winë. Ets ojts kyutëëynyäxy ja kyëpajk ets ja jya'awën tyukpëtsëëmë.

Marcos 14:25

Tëy miits n'ënëëmëtë, ka'apës n'ëk'uukanë ya'atë tsatym nyëë, ënätnëmës n'uukëty jatëkok ko ënäty jam nyajpaatyës ma Tios ja kyutujktaknën.

Mateo 26:29

Tëy miits n'ënëëmëtë ko ka'apës ya'atë tsatym nyëë n'ëk'uukanë, jäänëm ko ënäty n'ukëmë ja jemypyë ja tsatsym nyëë ma ja nteetyës ja kyutujktaknën.

Zacarías 10:7

Yë Efraín jëtu'un tä tsiptuunpën nyaxa'any. Jotkujk yë jyot wyinma'any tjawëja'any tä jeexyë tsatym nyëë t'uukyën ets ko ënäty ja y'u'unk y'ëna'k y'ixyë tääts näjyëtu'un jotkujk yajpaata'antë. Jotkujk yë jyot wyinma'any tjawëja'antë jä'ä ko yë Wintsën tsyokyë jyawëty.

Zacarías 9:17

Janty oy janty tsuj nëjkx yaj'ixy yë naax kajpn. Tam'ataanp may yë tsajpmok ets tsatym nyëë; yë n'u'unk'ajt n'ëna'k'ajtëm ye'etyëjkpë to'oxytyëjkpë, oy tsuj nëjkx yääktë pyätë.

Zacarías 9:15

Yë Wintsën mëti'ipë maaytyääyëpën winë yë'ë kyuwa'anäämpy mëti'ipë jyä'ä'ajtypyën ets yë'ëjëty jëtu'unyë t'atääna'an tuktääna'antë yë tsaa mëti'ipë jayajtuka'tstëpën ets myëtsip ëxëëk tuna'antë; y'uukanëtëp yë myëtsip yë jyot nye'pnyëty tä yë tsatsymnyëëjën, jëtu'un tä muum tsimjoty yaj'atämën yë ne'pny; jëtu'un tä jam yajkëxtemyën yë ne'pny ma wintsë'këntyakn yë wyajën.

Isaías 35:10

Ja ja'ayëty mëti'ipë ënäty ja Wintsën të yajtso'okëtën ëëp yaxp jam jya'ta'antë Sión, ets xoontä'äky yajpaata'antë winë xëëw winë jëmëjt. Pyaatantëp ja jotkujk'ajtën ets ja xoontakën ets ja jë'ëyën yaxën nëjkxëp y'atëkoy.

Isaías 25:6

Jam ma Sión kopkën, yë Wintsën mëti'ipë maaytyääyëpën winë, tnipëjktaakëja'any tu'uk ja ka'ayën ukën, aakyë'ë pyëjkta'akäämpy oyëtypë jë'kxy pëky, oyëtypë kääky uuky, xu'kxëtypë ets pa'akëtypë.

Números 18:18

Jëkyejpy mijts xymyëwë'ëmëty yë tsu'utsy, yë kyäty ets pyuuy a'oy'äämpyë mëti'ipë ëpëky yajtukniyajkëpën.

Levitico 23:11

Ets komjëpom ma ja po'kxënxëëw ënäty të nyäxyën, jä'ä xëëw tyakëty ma Wintsënën, jëtu'un tä tu'uk yë ayajk ako'onën, täänëm nëjkx yajkupëky.

Levitico 10:15

Ja kyejky mëti'ipë ëpëky yajyajkpën, ja kyäty mëti'ipë ja Tios yajmoopyën, jam yajmënëjkxëty ma ja Tiosën ets yajtukwintsë'ëkëty ets yajtukwintsë'ëkëty tu'ukyë mëët ja nyi'on mëti'ipën yajtukwintsë'ëkëjaanpën, tyaapë yajnikäjpxyën yë'ë mjä'ä'atëp ets näjyëtu'un ja m'u'unk m'ëna'këty.

Levitico 9:21

E ja kyäty ets ja jyëxkpa'a a'oytsyowpë, yë'ë ojts jam tu'kja'axë'ëky tmënëjkxy ma ja Tiosën ets ojts tmëwinpijtkojnë, jä'ä ko jëtu'un ënäty ja Tios të tni'ënä'ämë mëët ja Moisés.

Levitico 7:34

Jä'ä ko ja wintsë'kën mëti'ipë yajktëpën ja Israel ja'ayëty ets tuntë ja nay'ëëw'oy näykyajpx'oyë, ëjts yi'iyës ntsojkëp yë kyätsy, tä tu'uk yë ayajk ako'onën ets pyuuy yë'ë ja ja'ay natyukuyakëtëp. E yë Aarón mëët yë y'u'unk y'ok tëëjës yë jyä'ä nmo'otë mëti'ipë patëtëpën ma ja ayajk ako'onën tyaktën yë Israel ja'ayëty.

Levitico 7:31

Yë teety yë'ë nyo'okëp yë on jam ma wintsë'këntyaknën ets ja kyäty yë'ë jyä'ä'atëp yë Aarón ets y'u'unk y'ok.

Levitico 7:30

Kë'ëm mëpaat tmënëjkxy yë ayajk ako'onën mëti'ipë të tno'okyën jam ma Tiosën, tä ja jëyujk'onën mëti'ipë kyätykyijxy të tyajjënajkën ets jëtu'un yajmo'ojëty ja Tios tä tyu'unën'atyën.

Levitico 7:32

Ja jëyujk puuy ja a'oypyë mëti'ipë ënäty të wyintsë'kën'atyën, ko ja nay'ëëw'oy näykyajpx'oyë y'ity, yë'ë mëpaat yë teety yajmo'oy tä tu'uk yë näykyuyakën.

Números 6:21

Ya'atë ënä'ämën yë ja'ay pyatunëp, mëti'ipë ënäty të nyäwyaantä'äkyën ets yë'ë tmëtuna'any yë Tios. Ets ya'atë wintsë'kën yakëp, tä tu'uk ayajk ako'onën. Ëpëky mëti'ipë ënäty kë'ëmwinma'any yäjkpyën. Kopkpëky jëtu'un ko tyakëty, jëtu'un tä ënäty ja wyaantakën të tpëjktä'äkyën ijxtëm yë ënä'ämën myinyën.