Números 28:3 - Biblia Mixe de Quetzaltepec

³ Ënëëmëtë näjyëtu'un ko ya'atë ayajk ako'onën mëpaat tyaktë nino'oky mëti'ipës xytyukmëjjawëtëpën xëmë winjëpom, nitu'kxëëw kyaninaxëty, mäjtskëty yë kupixyny ayääkë mëti'ipë tu'ukëty yë jyëmëjtën ets oypyë mëkpë.

Números 28:3 ပူးပေါင်းရင်းမြစ်များ

Levitico 6:9

Tukmëtow ja Aarón ets y'u'unk y'ëna'k tii mëpaat tuntën ko ja jëyujk tno'oka'antëty, ja jëyujk mëti'ipë të wyintsë'kën'atyën tu'ktsu'um mëpaat jam tsyuunaxy ma ja jëënpajkën ets jam nyitoyëty.

Apocalipsis 13:8

Ja naaxwiinyëtë ja'ayëty wyintsë'ëkëjantëp ja mëj jëyujk, mëti'ipë ja xyëëw ka'ap jap myintën kuja'ay ma ja nokyën mëti'ipë myë'ijtypyën ja Kupixyny U'unk ja jyuukyajtën, mëti'ipë ja ja'ay yajkruuts päjtën.

Juan 1:29

Komjëpom ja Juan t'ijxy ko ja Jesús myëwinkonyë ets y'ënäny: Ixtë, ya'atë jëtu'un ijxtëm ja kupixyny u'unkën, Tios wyintsë'kën mëti'ipë ja naaxwiinyëtë ja'ay yajpokywyätsëpën.

Daniel 12:11

Tuk mil ja mäjtsk mëko'px ja majkta'px majk nëjkx nyäxy ja xëëw ma ënäty të yaj'akajpxtukyën këtiipë ja wintsë'kën y'ëkyajyajknëty ja jëpom jëpompë yajyäkyën ets ma ënäty të y'ëxëëkën ja Wintsën ja tsyajptëjk.

Daniel 11:31

Yë tsyiptuunpëtëjkëty nëjkxëp tyaj'ëxëëkëtë ja tsajptëjk mëti'ipë ta'tspëkpyë, nëjkxëp t'akajpxtuktë këtiipë pën tyakëty ja wyintsë'kën jëpom jëpompë yajyäkyën ets nëjkx jam tpëjkta'aktë ja nëkooyëpë y'ëxëëk'ajnën ets mya'at'ajnën ma ja wintsë'këntyaknën.

Daniel 8:13

Ënätës të nmëtoy ko tu'uk tsajpjotmëtë kukäjpxy tyajtëy ja myëku'uk: ¿Jëna'a jyëjpkëxa'any ya'atë mëti'ipë yaj'ijxpën ma wintsë'këntyaknën ma yajyäkyën winjëpom yë wintsë'kën? ¿Jëna'apaat pyo'oxa'any yë nëë poky ma Wintsën yë tsyajptëjkën ets mëpëjkpëtëjkëty, ets je'eyë yaj'atään yajtuktäänëty?

Hebreos 9:6

Ko jëtu'un yajnipëjktakëy, ja teetyëjkëty winjëpom tyëkëtë ma ja mëjëwyiimpë ja tëkotën, mëti'ipë wa'atstëkot xyëëwajtypyën ets ja Tios ja wyintsë'kën tmo'otë.

Levitico 3:5

Yë'ë nëjkx yë teetytyëjkëty tyajnitoytyë ya'atë ma wintsë'këntyaknën, tu'ukyë mëët ja tsajpkaa mëti'ipë jam nitoyaanpën ma ja ja'axy jam tyoyën, jëtu'un ja Tios yajtukwintsë'ëkëty ya'atë ayajk ako'onën oypyë tsujpë xyuuky jyokyën.

Números 28:4

Tu'uk jopyëp yajyakëty ets tu'uk jënäkyxyëëw.

Números 28:10

Ya'atë ayajk ako'onën nino'okpyë yë'ë jää yajyakëp po'kxënxëëwëtë, mëët ja nyi'tsatym nëë. Ëpëky mëti'ipë xëmë winjëpom yajyajkpën.

Números 28:15

Ëpëky ja wintsë'kën mëti'ipë myajktëpën nino'oky, nëjkxëp tu'uk ja tsajppax xyaktë, mëti'ipë ja Wintsën mtukwintsë'ëkëtëpën ets ja mpokyëty jä'ä tkunaxëty mëët ja tsatym nyëë.

Números 28:23

Tëkokyë ya'atë të yajnikäjpxyën, nëjkxëp jëtu'un xyaktë, ëpëky ja mëti'ipë Tios xëmë winjëpom yajtukwintsë'këpën.

Números 28:24

Jëtu'un nëjkx xytyuntë ko tii xëëw tpaatëty ma ëka'any tsyo'ontä'äkyën ja mëtu'kxëëwpë, ma ënäty wëxtujk xëëw jëtu'un ja xëëw y'ita'anyën. Ya'atë ayajk ako'onën yë'ë nëjkx jam jyä'ty Wintsën wintum, tä tu'uk yë xu'kën jojkën janty oypyë. Ya'atë ayajk ako'onën nëjkxëp näjyëtu'un mëët yajyäky ja nyi'tsatym nyëë, ëpëky ja wintsë'kën xëmëpë winjëpom yajyäkyën.

Números 28:31

Ya'atë wintsë'kën mëti'ipë nino'okyën mëët ja nyi'ayajk nyi'ako'onën, mëti'ipë aaypyajk ujts pajkën ets ja nyi'tsatym nyëë. Yë'ë nëjkx xyaktë, ëpëky ja mëti'ipë winjëpom yajyajktëpën. Ja jëyujk tsajpkaa, yë'ë mëpaat xyaktë mëti'ipë oy mëkën.

Números 29:6

ëpëky ja jëyujk mëti'ipë yajnino'kpën winpo'ojëty ets ëpëky mëti'ipë yajnino'kpën winjëpom. Ets jä'ä mëti'ipë ëpëky yajtukmëyajkëpën ja aaypyajk ujtspajk ets ja tsatym nyëë mëti'ipë ayajkën'ajtp ako'onën'ajtpën, jëtu'un tä yë Tios të tni'ënä'ämën. Tëkokyë ya'atë ayajk ako'onën nëjkxëp yajnino'oky ets jam jya'tëty Wintsën wintum, tä tu'uk yë xu'kën jojkënën oypyë tsujpë.

Números 29:11

Nëjkxëp näjyëtu'un xyaktë tu'uk yë tsajppax, mëti'ipë ja mpokyëty mtukunaxtëpën. Ëpëky ja mëti'ipë yajyakëpën mëët ja pokykyëjxmëpë ma ja pokymyä'kxën xëëwën. Ëpëky ja wintsë'kën mëti'ipë yajnino'kpën winjëpom, mëët ja nyi'ayajk nyi'ako'onën mëti'ipë aaypyajk ujts pajkën ets ja nyi'tsatym nyëë.

Números 29:16

Nëjkxëp näjyëtu'un tu'uk xyaktë yë tsajppax, mëti'ipë ja mpokyëty mtukunaxtëpën. Ëpëky ja jëyujk mëti'ipë xëmë winjëpom yajnino'kpën mëët ja nyi'ayajk nyi'ako'onën ets ja nyi'tsatym nyëë.

1 Crónicas 16:40

ets yë'ë tyaktëty xëmë ja wintsë'kën ma ja Wintsën ja wyintsë'këntyaknën jam ma ja kaaxë yajpaatyën, jopy tsuu, jëtu'un tä jap myinyën kuja'ay ma ja Wintsën ja nyokyën mëti'ipë tyuk'ënä'ämën ja Israel kajpn ets tpatuntëty.

2 Crónicas 8:13

jëtu'un tä ënäty myinyën ni'ënä'ämë ma ja tëyajtënën mëti'ipë ja Moisés jyääyën: ma pokxn xëëwën: ko ja po'o pyi'k'aty ko tëkëëk'ok xyëëwtuntë winjëmëjtpë, ko ja tsajpkääky tnixëëwtuntën mëti'ipë ka'ap tsyooymyëëtëtyën, ma ja sëmaan tnixëëwtuntën ets ma ja tëjkxo'omy tnixëëwtuntën.

Esdras 3:5

ëpëky näjyëtu'un tyajktëpë ja wintsë'kën winjëpom, ma tmëjjawëtën ja po'o u'unk, ëpëky näjyëtu'un mëti'ipë ja kënu'kxy xëëw tyukwintsë'këtyëpën, ma ja Wintsën jä'ä yajtukmëjjawën ets ëpëky mëti'ipë kë'ëmwinma'any yajktëpën.

Amós 4:4

Nëjkxtë jam Betel ets jam Guilgal; tuuntëkoy kajpxtëkoytyë; yajnipätë mpokyëty ets käjpxy kumëtoownaxtë. Jopyëp mënëjkxtë mwintsë'kënëty ets wintëkëëk xëëw xyaktëty ja tu'ukpë xypyupëktën ma ja majk pëkpyën.

Daniel 8:11

ojts tsipwinkajpxë ja mëti'ipë nyiwintsën'ajtypyën ja tsiptuunpëtëjk; ojts may tyaj'atëkoy ja wintsë'kën jëpom jëpompë yajyäkyën ets ojts tyaj'ëxëëkë ja tsajptëjk.