Números 23:21 - Biblia Mixe de Quetzaltepec

²¹ Ni pën kya'ëna'any, ko yë Israel win'ë'ëmp antakp. Ko yë Israel ëxëëk jyuuky'äty, mëti'ipë yë Jacob kyajpn'ajtën, yë Wyintsënëty, mëti'ipë Tyios'ajtëpën, yë'ë tim yajpatp ma yë'ëjëtyën, ets yë'ë tyijtëp ënä'ämpë yajkutujkpë.

Números 23:21 ပူးပေါင်းရင်းမြစ်များ

Salmos 23:4

Oyës muum naxëty akootstuuy, ka'apës ntsë'ëkëja'any, jä'ä ko mijts Wintsën mijts myajpatp ma ëjtsën, ja mkepy mtajk yë'ëjës xytyuk'ateenytyujkp xytyuk'axajtujkp, paaty akujk jotkujk ntuk'ijxpetyës.

Mateo 1:23

U'unkpaataanp tu'uk ja to'oxy'ëna'k, ets Emanuel ja y'U'unk txëëwatëty. Mëti'ipë tyijpy: Tios ëëts mëët n'ijtëm.

Jeremias 50:20

Ëjts, Wintsën, jëtu'unës n'ëna'any: Jä'ä xëëw jä'ä jëmëjt yë Israel ja'ayëty ets ja Judá ja'ayëty ëwaatsëtum wyë'ëma'antë ma nyëë pyokyëtyën, jä'ä ko npokymyä'kxäämpyës mëti'ipës juuky të nyajwë'ëmtën.

Isaías 38:17

Ix, tyam jotkujkës nyajpaaty, ets ka'ap n'ëkmoon n'ëktujknës. Mijts të xykyëwent'aty yë njuukyajtënës këtiipë kyuka'anaxëty jap jutjoty, jä'ä ko mijts tëë xymyä'kxta'ay yë npokyës.

Salmos 46:11

Yë Wintsën mëti'ipë maaytyääyëpën winë yaa tyam yajpaaty mëët ëëts'ajtëmë. Yë'ë ntsoktakn'ajtëm mëti'ipë yë Jacob y'ëwtajtën.

Isaías 33:22

Ja nyitejpxy ka'ap nëjkx myäyë wi'ix tmajts'itëtyën; ja nyinikäm ka'ap nëjkx wyo'onwä'kxy. May nëjkx ja wit meeny yajpëjkëtë ja mëtsip, yë'ëpaat ja tekymya'at ets ja kë'ëma'atpë nëjkx tpaaty ja wit meeny. Jä'ä ko yë Wintsën mëtëy nyipaye'ey, mëti'ipë yajtuumpyën ja ënä'ämën mëti'ipë nkutujkpë'ajtëmën, yë'ë xyajtso'oka'anëmë.

Isaías 8:10

Oy jënu'un tii xyjyatuknipëjktaakëtëty, ka'ap nëjkx wyintu'upëky; oy jënu'un tii xyatuna'antëty, ka'ap nëjkx tyunyë jyätyë, jä'ä ko ëëtsëty Tiosës mëët nyajpaatë.

Isaías 1:18

Jëtu'un yë Wintsën y'ënä'äny: mintë, tsojk ja amay jotmay nyaj'o'oyëmë. Oyxyëp ënäty ja mpokyëty jëtu'un tä jëënpajkën mëti'ipë toopy jäämpën, ëjts poopës nyaj'awinpita'any tä tip kyä'äyën; oy ënäty jëtu'un kyëxë'knë uky witën, ëjts jëtu'unës nëjkx nyaj'awinpity poop witën, tä pixyny witën.

Romanos 6:14

Jëtu'unts ja poky ka'ap m'ëk ënä'ämënëtëty, jä'ä ko ka'ap yë'ë ja ënä'ämën xy'ëktukjuuky'ajnëtë, Tios ja y'oyajtën mtukjuuky'ajnëtëp.

Isaías 41:10

Këtii mtsë'ëkëty, ëjts yajpatpës ma mijtsën, ëjts mijts xyTyios'ajtp. Ëjts mijts nmëjaawmoopy ets nputëjkëp, mëëtës ja nkë'ë nmajts'ity ets xëmë mmëta'akëty.

Salmos 118:15

Ma wa'ats ja'aytyëjk ja jyëën tyëjkëtyën ëëwtëp xoontaktëp jap, jä'ä ko të myëta'aktë:: Yë Wintsën yë myëk'ajtën yë'ë të myëtä'äky.

Salmos 97:1

Xoonta'aktë naaxwiinyëtë apëtsëmy, xoonta'aktë miitsëty naax kajpn tu'këëyi'ikpyë muum yajpaatën mejyjoty, Yë Wintsën, yë'ë yajkutujkp.

Deuteronomio 33:5

ets jam'ajt ja yajkutujkpën Jesurún, ko ye'eymyujktaaytyë ja mëti'ipë nyikopk'ajtëpën ja kyajpn, ko ye'eymyujktaaytyë ja Israel ja'ayëty.

Ezequiel 48:35

Ja kajpn ja nyapots na'ëwtity jä'ä y'ayeny'atëty tëtujk mil xajpk ets ja naax kajpn jä'ä txëëwajnëty: Yaa yë Wintsën yajpaaty.

Salmos 103:12

Tëë yë npoky'ajtëm xytyukmëjëkämkäkëmë, jëtu'un tä yë xëëw tmëjëkämke'ekyën ma pyëtsimyën ets ma kyëtä'äkyën.

Salmos 46:7

Yë Wintsën mëti'ipë maaytyääyëpën winë, yaa tyam yajpaaty mëët ëëts'ajtëmë. Yë'ë ntsoktakn'ajtëm mëti'ipë Jacob y'ëwtajtën.

Salmos 32:5

Ënät të nmëmaaywyätsy ets ka'apës nitu'uk ja mpoky të nkuyu'utsy; tëës ja npoky nmaaywyajtsta'ay e mijts, Wintsën, tëës xypyokymye'kxy.

Salmos 32:2

Xoontä'äky yë ja'ay yajpaaty mëti'ipë ka'ap nëkoo ëxëëkjaty myäy tyäjyën ets mëti'ipë ka'ap tjëkyepyën wi'ix yë Wintsën pyoky'ixëtëty.

2 Crónicas 13:12

Yë'ë tëy ja'amyätstë yajxon, ko ëëtsëty yë'ëjës xytyu'uwinye'eytyëp yë Wintsën ets teetytyëjkëty, yë'ëjëty jëjp'ixy tyim'itë ets tyajxu'uxa'antë ja pujxnxuxn mëti'ipë nyikäjpxypën ja tsip ets miitsëty myajnipëtë'ëktëty. E paaty yam myaj'ënëëmëtë Israel ja'ayëty, ko këtii nëkoo mtsiptuntëty mëët yë Wintsën, mëti'ipë Tiosajtën ja m'aptëjkëty, jä'ä ko ka'ap mëta'aktëty.

Jueces 6:13

Ets ja Gedeón y'ëtsooy: Ëknamä'kx Wintsën, pën mijts myajpatp mëët ëëtsëty ¿wi'ix koos o'ktëy njatë nkëpätë? ¿Maajëtën ja mëj'ajtën të nyëjkxta'ay mëti'ipës ja n'ap n'ok nyikajpxtën ko mijts ojts jap winë xytyuny Egiptë? Yë Wintsën tëëjës xy'ëxmajtsnëtë ets tëëjës xykyë'ëyajknëtë ma Madián ja'ayëtyën.

Éxodo 34:9

ets y'ënäny: Wintsën. Wintsën. Pën janty tëy koos xy'oyjyawë, mijts xëmë xyjyämyëët'atëpës, janty tëy jëtu'un ja ijty ko ya'atë ja'ayëty ka'ap kyäjpxyjyä'äkyukëtë, e tyam n'ënëëmë mä'kxtëkës ëëts yë ntuuntëko'oy nkajpxtëko'oyënëty ets ëxajëtëkës jëtu'un tä yë mnaax mkajpnën.

Éxodo 13:21

Ko xyiinyäjty, yoots ojts mëët yë Tios tyu'uwinwowëtë, e ko kyootsajty tu'uk yë jëën kyutë'kxëtë. Paaty tjëkyejpy ets nyë'ëye'ey tyu'uye'eytyëty xëëny koots.

2 Corintios 6:16

Ka'ap tjëkyepy tu'ukyë yajpaatëty yë Tios yë jyëën tyëjk mëët yë awinax. Jä'ä ko jëtu'un ja Juukpyë Tios xyajwa'anëmë tsyënaaytyaknën. Jëtu'un ijxtëm ja Tios y'ënä'änyën: Tsëënëjaanpës ets juuky'ataanpës ma yë'ëjëtyën, yë'ëjës xyWyintsën'attëp, ets yë'ëjës nja'ay'attëp.

2 Corintios 5:19

Jëtu'un yajja'akyukë ko ja Tios të tyajnämyë'oypyikyë ja naaxwiinyëtë ja'ay, ka'ap ja tuuntëko'oy kajpxtëko'oyën të tmëjpëjktä'äky, ëëts të xytyuknipëktë etsës ntuk'ëwaanëtëty ja ja'ay ya'atë aaw ayuk.

2 Corintios 2:14

Nkukajpxëpës ja Tios ko xëmë xyajmëtakëmë mëët ja Kristë ja xyëëw, ets yajnijawë ja y'aaw y'ayuk ko ëëtsajtëm nkajpxwa'kxëmë, mëti'ipë ye'eywya'kxpën ijxtëm ja pa'akxu'kpë nëëjën.

Romanos 8:1

Paaty tyam ka'ap pën poky y'ëk'ijnë, mëti'ipë ja Kristë Jesús mëët tu'ukyë yajpaatyën,

Isaías 12:6

Xi'iktë xontë miitsëty naax kajpnëty mëti'ipë tsënaaytyëpën jam Sión, jä'ä ko yë Wintsën, wa'atspë, mëti'ipë yajpatpën ma Israel kajpnën tam yajpaaty ma miitsëtyën mëët tu'kë'ëyë ja myëj'ajtën.

Éxodo 3:12

Tä ojts yë Tios y'ëtsoyë: Ëjts mijts njämyëët'atäämpy ets ya'atë jëtu'un mtuk'ixëp ko yam nkexyp, ko ënäty mijts ja nnaaxës nkajpnës të xyjyuuty jap Egiptë, yaajës min xy'ëwtatë ma ya'atë kopkën.

Números 14:18

ko ka'ap tsojkyë mjoot'anpëky, ko mëj këjää mtsoky mjawë ets mnime'kxyp ja nëë poky ets ja käjpxy kumëtoownajxën. Näyjyëtu'un të m'ëna'any, ko ja pokytyuunpë kë'ëm tkumëtoy ja y'ëxëëk'ajtën ma y'u'unk y'ëna'kën.

Números 14:19

E komë yajnija'ap, ko mijts mëj këjää mtsoky mjawë, paaty pokymyä'kx ya'atë naax kajpn. Mijts këjää yë mä'kxtujkën të xymyëët'aty mëët yë'ëjëty ixnu'un të myintë, të tyimtsoontë jap Egiptë ets të jya'të yaa.

Deuteronomio 9:24

Ix tää yajnijawë ko jëtu'un xytyimyajtu'uye'eytyë, tyimtso'ontäky ma ojts ëka'any n'ixy'ajtë'ëktën je'eyë nëkoo Wintsën xykyäjpxykyumëtoownajxtë.

Deuteronomio 31:23

E ja Josué, yë myaank yë Nun, tyaa ojts y'ënë'ëmxëty yë Wintsën: Mijts jotmëkmës mtimyyajpaatëty, këtii ninu'un mtimtsyë'ëkëty. Jä'ä ko tëëjës ntuknipëjktaakë ko mijts nëjkx xywyoowja'ty yë Israel ja'ayëty jam ma ja it naaxwiinyëtën mëti'ipës yë'ë të ntukwinwanëtën, e ëjts nyakäämpyës yë näypyutëkë ma mijtsën.

Deuteronomio 32:5

Miitsëty ëxëëkja'aytyëjkëty, mëti'ipë ka'ap oypyë ja jot winma'any xymyëët'atën, mëti'ipë je'eyë yajjoot'anpëjktëpën yë Tios, ets ka'apë pyaatëtë yaj'u'unkniwa'antëty.

Levitico 9:24

Jëtu'un kyëtäky, tä tu'uk yë mëj jëënyä'änkën ets ojts tukëtä'äky ja jëyujk'ooky ets tyajtooykyëtaktaay tu'kë'ëyë jënu'un ënäty jamën ma ja wintsë'këntyaknën. Ko jëtu'un yaj'ijxy ënät yë Israel ja'ayëty tyëjkëtyë yaxjpë jojkpë mëët ja xoontakën ets tëkokyë nyäjyijtaktaayëtë naaxkëjxy ets ojts ja Tios t'ëwtatë, mëët tu'uk ja näwyintsë'ëkë.

Números 9:22

Pën ja yoots ijtp jam tëjknëkëjxm ma ja Tios ja wyittëjkën kanaak xëëw, tu'kpo'o, ëkë tu'kjëmëjt, ja Israel ja'ayëty jëtu'un tna'itë ets ka'ap maa nyëjkxtë. E ko ja yoots jam pyëti'iky, ënätyë ijty tsyo'onta'atë.

Números 16:3

Ënät ojts nyäwyoowmukëtë ets tninëjkxtë ja Moisés ets ja Aarón, tääts tyëjkëtyë kajpxpë. Jä'ä ja Moisés ets ja Aarón yajxon jyänty'ojtëp ets t'ënëmaaytyë. Wi'ix ko miitsëty nimäjtsk janty'oy janty kënu'kxy mtimnyäyajnaxëtë. Pën tëkokyë yë Israel ja'ayëty tëë yë Tios kyënu'kxta'ajëtë ets Wintsën yë'ë yajpatp ma ëëtsajtëmën ni'ëmukë. ¿E paaty ëëtsëty yë'ëjës oy nkawinja'awëtyëp tiikyëjxm ko miitsëty nimäjtsk janty mëj ënä'ämpë mtimnyäyajnaxëtë ets mtimy'ënä'ämantëp ma Wintsën yë nyaax kyajpnën?

1 Samuel 25:28

etsës xypyokymyä'kxëty. Ëjts wa'atsës nijawë ko yë Wintsën jeky jam myaj'ita'anyë ma mkutujktaknën, jä'ä ko yë'ë mnitsiptuunpy ja oyajtën mëti'ipë ja Wintsën jyä'ä'ajtypyën ets mijts nijëna'a nëjkx ëxëëk mkajaty mkakëpety.

Salmos 99:2

Yë Wintsën mëj'äämpy jam y'ity ma ja Sión kopkën; yë Wintsën yë'ë nyitënaaytyääpy tëkokyë yë naax kajpn.

Salmos 135:21

Mmëjjaw kënu'kxyjyawë yë Wintsën jam ma Sión kopkën, mëti'ipë jam Jerusalén juukyajtpën. Tukxoontä'äky mëjjawë Tios yë xyëëw nyaxëty.

Isaías 33:21

Oy tsuj jam yë Wintsën nyänyikëxë'ëkyë. Oy jam jyänty yaj'ixy yë nëëjot wokjot, mëjjëty ets komëty, ma ka'ap nijënu'un tjëkyepyën wi'ix ja mëtsip tyëkëtyën.

Joel 2:27

miitsëty Israel ja'ayëty, kopkpëky ko nëjkx xy'ijxpaatës ko ëjts Tios'ajtp ets ka'ap maa wiinkpë. Nijëna'a yë naax nkajpnës nëjkx kya'ëktsëtyuun kya'ëkjaaypyäjnë.