Números 18:8 - Biblia Mixe de Quetzaltepec

⁸ Ënät ja Tios t'ënëmaay ja Aarón: Mijts të ntuknipëky ets xykyëwentëpëjkta'ajëty yë ayajk ako'onën mëti'ipës yajmoopyën. Tëkokyë yë ayajk ako'onën mëti'ipë yë Israel ja'ayëty yajktëpën, kënu'kxy yë nyajxnë. E paaty, mijts ets m'u'unk n'ëna'k yam nmooytyëp, jä'ä ko mpatëtëp jëtu'un. Ya'atë ënä'ämën yë'ë xëmë itëp.

Números 18:8 ပူးပေါင်းရင်းမြစ်များ

2 Reyes 12:16

E jä'ä ënät ja meenypë mëti'ipë ja ja'ay nätyukukëpäjtëpën ko pyokytyuny, ëkë ko ja tëko'oyën tmëëtëty, ka'ap ja yajmënëjkxy ma ja tsajptëjkën, jä'ä ko jä'ä ja teety jyä'ä'ajtëp.

2 Crónicas 31:4

Ezequías ojts tuknipëky ja Jerusalén ja'ayëty ets tmo'otëty ja teetyëjk ets ja Leví ja'ayëty ja ayajk ako'onën ets tyuntëty tu'kjëjp ma ja Wintsën ja tsyajpjëën tsyajptëjkën.

2 Crónicas 31:5

E ko ojts ja ayuk jëtu'unpë ye'eywyä'kxy, ja ja'ayëty kë'ëm jot kë'ëmwinma'any ijty winë tjanty yaktë, mëti'ipë yajë'kx yajpëjkpën ets mëti'ipë yaj'ukpën, ja kamwinmëpë pyëtsimyën. Ëpëky näjyëtu'un tyajktëpë tu'kpëkyjyäty ja maypyë.

Éxodo 28:43

Yë'ë ya'atë wit pyëjkta'aktëp yë Aarón mëët yë y'u'unk y'ëna'këty ko jap tyëkëtëty ma wit tëjkën ma näpyaatë y'ityën ets näjyëtu'un ko twinkuwa'akëtëty yë wintsë'këntyakn, ëkë ko ënäty jap yë tyuunk tyajtu'uye'eytyë mëët ko tyeety'atë, këtiipë nëjkx tii tëkatsy tuntë ets y'ëk'o'knëtëty. Ya'atë ënä'ämën tëyajtën yë'ë xëmë itëp ma yë'ëjëtyën ets ma ja y'u'unk y'okëtyën.

Éxodo 29:21

E ja ne'pny mëti'ipë jam wë'ëmpën wintsë'këntyakn nëkëjxm ets ja on mëti'ipë yajtukkënu'kxpën mëti'ipë natëjkëpën, mpëjkë'ëkëp ets xytyuknixijkxëty yë Aarón ets näjyëtu'un jam wyitkëjxm, ma ja y'u'unk y'ëna'kën nëjkxëp xykyënu'kxta'atë mëët tu'kë'ëyë ja wyitëty tyujkxëty.

Éxodo 29:28

Tääpë yë'ë nëjkx tjä'ä'atë yë Aarón ets y'u'unk y'ëna'k, ya'atë ënä'ämën xëmë jëtu'un y'ijtëwëty ma Israel ja'ayëtyën. Ya'atë wintsë'kën yë'ë yajtukniyajkëtëp yë Israel ja'ayëty, ets Tios yajtukwintsë'ëkëp; ma jëtu'un ja nämyë'oyë y'ityën.

Éxodo 29:29

Yë wyit yë Aarón yë'ë nëjkx tmëwë'ëmtë yë y'u'unk y'ok, ko ënäty näjyëtu'un yajkënu'kxtë ets tyeety'atëty ets jëtu'un tpa'atwa'akëtë ja ënä'ämën kutujkën.

Éxodo 40:13

Ko tsyiiwta'atëty tääts ja Aarón ja wyit tpëjkta'akëty mëti'ipë të yajtuknixuyën ets ja on xytyukkujaaxëty ets xykyënu'kxëty, jëtu'un'äämpy tpa'atwa'akëty ja teety'ajtën ma ëjts xymyëtunëtyën.

Éxodo 40:15

Ets xytyukkuja'axta'ajëty ja on mëti'ipë yajtukkënu'kxpën winë, jëtu'un ijxtëm ja Aarón të xytyukkujaaxyën ets jëtu'un'äämpy tpa'atwa'akëtëty ja teety'ajtën etsës xymyëtuntëty.

Isaías 10:27

Jä'ä xëëw nëjkx ja mtsëmy mkë'ëy myajtuknipëjktu'uty, ets nëjkx yajnëkejy ja kepy mëti'ipë mtsëëm'ijtypyën, jëtu'un tä tsajpkaa kepy tsëëm'ityën mëti'ipë tyukyuupyën.

Levitico 21:10

Mëti'ipë ja teetytyëjkëty nyiwintsën'ajtypyën, yë'ë jëtu'un ja kutujkën myëët'ajtyp ets ja wit tpëjkta'akëty mëti'ipë të yajtukmëkënu'kxën ets mëti'ipë ojts ja on yajtukujaaxyën. Paaty yë'ë ka'ap mëpaat yë wyääy tnajtsmatsë ets ni wyit tkakëëtsëty, ko tmëkjawëty ko ënäty pën të y'ooky të tyëkoy.

Levitico 23:20

Yë teety yë'ë nëjkx tyäky ya'atë wintsë'kën jam ma Tiosën, mëët ja tsajpkääkyëty, mëët ko tkënu'kxy ja pëjktä'äky ets mäjtsk ja kupixyny. Ya'atë yë'ë nëjkx ja Tios jëyëjp yajtukninëjkxy ets ja teety jä'ä nyiwë'ëmëtëty.

Levitico 6:16

Mëti'ipë ënäty ja ayajk ako'onën natëjkëpën, yë'ë Aarón jyä'ä'atëp mëët ja y'u'unk y'ëna'k ets tsajpkääky yë'ë mëti'ipë ka'ap tsyooymyëëtëtyën, jam tjë'kxtëty tpëktëty ma wya'atsëtyën ma ja tyëja'awën ja wit tëjk ma näpyaatë y'ityën.

Levitico 6:18

Jëtu'un xëmë y'itëty, nyaxëty ja xëëw jëmëjt, tëkokyë yë yä'äy'ëna'ktëjkëty mëti'ipë yë Aarón y'u'unk'ajtyp y'ëna'k'ajtypyën, jyëkyäptëp tjë'kxtëty ja ayajk ako'onën mëti'ipës ëjts yajmoopyën, mëti'ipë ja ayajk ako'onën nyo'ktëpën ma ja wintsë'këntyaknën mëti'ipë tyukwintsë'këtëp yë Wintsën. Oy tyimtiijëty mëti'ipë ya'atë ayajk ako'onën patëpën, wa'ats wyë'ëmëty.

Levitico 6:20

Ya'atë yë Aarón ets y'u'unk y'ok yaktëp ma Wintsënën ko ënäty yajtuknipëktë ja teety'ajtk, mäjtsk tsim yë tsajpkääkwyäy, kujkwä'kxy tyakëty jopyëp ets kujkwä'kxy tjaakyakëty jënäkxyëëw. Jëtu'un winjëpom tunëty, ka'ap mëpaat nitu'kxëëw nyinaxy.

Levitico 6:26

Ja teety mëti'ipë ja wintsë'kën yäjkpyën, jyëkyäpëp tsu'utsëty ja nyitsu'uty, jap tsu'utsëty ma tu'uk yë it naaxwiinyëtë wa'atspë, jap ma ja nyitëja'awën ja wit tëjk ma näpyaatë y'ityën.

Levitico 7:14

Oy tyimmëti'ipë ayajk ako'onënëty, kopkpëky ko wäänë yajpupëkëty mëti'ipë yë Tios yajmo'ojëpën ets yë'ë nyäkyuyakë'atëty mëti'ipë ënäty wäänë yajyajkpën; yë'ë jyä'ä'atëp ja teety mëti'ipë ënäty ja ne'pny jam xyijkxjëtijtypyën ma ja wintsë'kën yajyäkyën, ko ja nay'ëëw'oy näykyajpx'oyë y'ity.

Levitico 7:28

Ënät ja Tios ojts tmëkäjpxy ja Moisés ets t'ënëmaay:

Levitico 7:6

Tëkokyë yë teetytyëjkëty jyëkyäpëp tsu'utstëty tääpë tsu'utsy, jam mëpaat tsu'utstë ma tu'uk ja itjotmën wa'atspë, jä'ä ko tääpë wa'ats yë'ë.

Levitico 8:30

Ënät ja Moisés ojts tpëjkë'ëky ja on wäänë, mëti'ipë mëët winë yajkënu'kxyën ets näjyëtu'un ja ne'pny mëti'ipë ënäty jamën ma ja wintsë'këntyaknën, tä ojts tuknixijkxy ja Aarón ets ja y'u'unk y'ëna'k, näjyëtu'un ma ja wyitëtyën, mëti'ipë myëteety'ajtëpën, jëtu'un ojts ja Aarón yajkënu'kxtë mëët ja y'u'unk y'ëna'k ets ja wyit tyujkxyëty.

Números 18:9

Tëkokyë yë wintsë'kën, mëti'ipë yë Israel ja'ayëty yajktëpën nino'oky, tä yë aaypyajk ujts pajkën, mijts mjä'ä'ajta'atëp ets näjyëtu'un yë wintsë'kën, mëti'ipë yë ja'ayëty nyëë pyoky tyukunajxtëpën ko tii tuuntëkoytyë, tëkokyë ya'atë ayajk ako'onën mëti'ipë tëë yajkënu'kxyën, aak miits nëjkx xyjyä'ä'atë mëët yë m'u'unk m'ëna'k.

Números 5:9

Tëkokyë yë ayajk ako'onën mëti'ipë yë Israel ja'ayëty tyuknipëjkë'këtëpën yë Tios, ets tukninëjkxtëty yë'ë ja teety mëti'ipë jyä'ä'atëpën.

1 Corintios 9:13

Mnija'awëtëp miits ja ja'ayëty wi'ix jyuuky'atën mëti'ipë tuuntëpën jap mëjtsajptëkoty, yë'ë tyukjuuky'ajtëp mëti'ipë ja ja'ay yojxtëpën ets mëti'ipë tuuntëpën ma ja wintsë'këntyaknën; tsyu'tstëp ja jëyujk tsu'utsy mëti'ipë wintsë'kën'ajtpën.

Deuteronomio 12:11

Ja it naaxwiinyëtën mëti'ipë ënäty ja Wintsën të twin'ixyën ets jam yajpaata'any, nëjkxëp ja wyintsë'kën xymyo'otë mëti'ipës yam të nikäjpxyën. Nëjkxëp xytyukwintsë'ëkëtë ja jëyujk mëti'ipë myaj'ooktëpën ets xynyino'oktëty. Nëjkxëp näjyëtu'un xymyo'otë yë ayajk ako'onën ets tu'kpëkpyë yajëpëkyën ma ja majk pëkpyën ets ayajk ako'onën mëti'ipë të xytyukwinwanëtën ets xymyo'oja'antë.

Deuteronomio 12:6

Jam nëjkx yë Wintsën xytyukwintsë'ëkëtë yë jëyujk. Nëjkxëp yë Wintsën jam xymyo'otë yë tu'kpëkpyë yajjëpëkyën ma ja mmajkpëkpyën ets tii ënäty miitsëty mo'ojantëpën. Yë'ë nëjkx xykyë'ëmo'otë ja mjëyujk mtsajpkaajëty, mëti'ipë më''ëka'any të myinyën naaxwiiny.

Deuteronomio 18:1

Yë Leví ja'ayëty mëti'ipë teety'ajtëpën, yë'ë yaj'antijtëp tëkokyë yë Leví ja'ayëty, ka'ap nëjkx yë nyaax kyam tmëët'atë, tä yë wiinkëtypë Israel ja'ayëtyën. Yë'ë nëjkx nyätyuk'ixëtë mëti'ipë ënäty ja ja'ay myëmiintëpën ets ja Wintsën jä'ä tukwintsë'ëkëtë.

Deuteronomio 26:13

Ënät nëjkx m'ëna'any jam mWintsën wintum: Tëës npëjktä'äky ëpëky maas yë njëën ntëjkën ja aaytyëëm ujtstëëm, mëti'ipës të nyajpajk'atyën ets tëë nmo'oyës yë Leví ja'ayëty, jaaypyaat jaaypyo'kxyëty, ku'ooky'u'unk, ku'ookytyo'oxëty, mëti'ipë yajpatëpën ma ëëtsëtyën. Ntunyës jëtu'un mëti'ipës mijts të xytyuk'ëne'emyën ets tëëjës jëtu'un njanty tyuny ets ka'apës ja m'aaw m'ayuk nëkoo je'eyë të nkumëtoownaxy.

Hebreos 1:9

Ko mijts të xytsyoky ja oypyë ets të xy'ëxëëk'ixy ja ëxëëkpë; paatykyëjxm ja Tios mijts të mwin'ixyë, mëti'ipë mTios'ajtypyën, ets të mmo'oyë wäänëni'ik ja xoontakën këtiinëm ja mmëku'uktëjk.

1 Juan 2:20

Tëë miits ja Tios mmo'ojëtë ja Kënu'kxymyëkajtën, paaty ja tëypyë jaantypë xynyijawëtë.

1 Juan 2:27

Mmëët'ajtëp ja Kënu'kxymyëkajtën, mëti'ipë ja Wintsën Jesukristë mëët të mkënu'kxëtën, ets ka'ap xyajmëyatë ets pën myaj'ijxpëkëtëty, jä'ä ko ja Kënu'kxymyëkajtën mëti'ipë të mmo'ojëtën yë'ë mtuk'ijxpëjkëtëp winë, ets aakjä'ä yaj'ijxpëjkpy mëti'ipë mëtëyën, yë'ë ka'ap wyin'ëëny. Tu'ukyë mëët ja Kristë yajpaatë, jëtu'un tä ja Kënu'kxymyëk'ajtën të mtukni''ixëtën.