Números 15:31 - Biblia Mixe de Quetzaltepec

³¹ Jä'ä ko n'aaw n'ayukës ets n'ënä'ämënës ënäty të tkumëtoownaxy. Paaty yë'ë nëjkxëp yë yajjo'otsy yë xyëëw ma nyaax kyajpnën ets ja nyëë pyoky kë'ëm tjä'ä'atëty.

Números 15:31 ပူးပေါင်းရင်းမြစ်များ

Proverbios 13:13

Mëti'ipë ja'ay tëë jyayaj'ëne'emyën, ets ka'ap tpatuny, ok tmëkjawë ko ënäty ka'ap të tuny mëti'ipë të jyayajtuk'ëne'emyën. Mëti'ipë ja'ay wyinkutsë'këpën yë näy'ënä'ämë y'ëxajëp yë kyuma'ayën.

2 Samuel 12:9

¿E mijts wi'ix ko ënät ja n'ayukës të xykyumëtoownaxy ets të xytyuny ja ka'apë tyuunëtyën? Mijts të xyaj'ooky yë Urías, ja Hit ja'ay, je'eyë të xytyukniwoy ja Amón ja'ayëty ets yë'ë tyaj'ooktëty ets të xypyëjkë ja tyo'oxytyëjk.

Ezequiel 18:20

Yi'iyë mëti'ipë pokytyuunpën ookaanp. Ka'ap tjëkyepy yë u'unk ëna'k tkëpätëty tyeety yë pyoky; näy ka'ap tjëkyepy teety tkëpätëty yë u'unk ëna'k yë pyoky. Yë ja'ay mëti'ipë mëtëy winë tyuunpyën y'ëxajëjäämpy ja näykyumayë mëët ko ënäty mëtëy winë të tuny; e mëti'ipë ëxëëk winë të tunyën kwanë ko nëjkx tkumëtoy.

1 Tesalonicenses 4:8

Paaty n'ënëëmëtë, pën ya'atë ijxpëjkën kyamëjpëjktäkpy, ka'ap nyaaxwiinyëtë ja'ayëty tkamëjpëjktä'äky; Tios ënäty kyamëjpëjktäkpy, mëti'ipë miits mmooyëtëpën ja Kënu'kxymyëkajtën.

Salmos 119:126

Wintsën, tëë yë xëëw po'o tpaaty ets tii xytyunëty, ma ja ja'ayëtyën mëti'ipë ka'ap tpatuntën ja m'ënä'äm mtëyajtën.

Levitico 5:1

Ko pën yajmëkajpxëty mëti'ipë ënäty tii y'ijxyp nyija'apën mëët ko ënäty tii të t'ixy ëkë të tmëtoy ets yë'ë ka'ap tkupëjkpëty. Poky jëtu'un ënäty tyuunpy ets pokymyëët yë'ë wyë'ëmnëty, mëët ko jëtu'un y'ëti'itsy.

2 Pedro 2:21

Nikë oy ko jeexyë ka'ap të timnyijawëtë ja në'ë tu'u oypyë, jä'ä ko tëë tjanijawëtë ets ok të t'ëxmatstë ja Tios ja y'ënä'ämën mëti'ipë të jyayajmo'otën.

1 Pedro 2:24

Kristë ojts ja npoky'ajtëm tmënëjkx ma ja nyi'kx kyopkën jam kruutskëjxm ets jëtu'un nyäjxy ijxtëm jeexyë ja poky të nku'o'këmën ets ënät njuuky'ajtmëty mëtëy. Yë Kristë ojts tsyëtyuty wyintëkoy ets miits mtsoktë.

Isaías 53:6

Ëëtsajtëm jëtu'unyë ojts axit ako'owë njajta'ayëmë tä kupixynyën, xim yam ja në'ë tu'u ojts npëjkëmë; e yë Wintsën yë'ë ojts tkexy ja tyuunpë ets jam tkëxpëjktaay ma yë'ëjën ja npoky'ajtëmë.

Isaías 30:12

Paaty ja Tios Wa'atspë mëti'ipë jam ma Israel kajpnën, y'ënä'äny: Miitsëty wiink xyjyawëtë ko tii mjyajtuk'ëwaanëtë, yi'iyë tsip käjpxy mtuk'ijxpäjtëp ets ja ëxëëk tuunk ëxëëk käjpxy, jam mnäkyëxwa'anëtë,

Salmos 38:4

Kë'ëmës winë ëxëëk n'ëktuny ets kë'ëmës ka'ap n'ëkmëmëta'akanë;

Levitico 26:43

Winwa'ats nëjkx wyi'imy ets nëjkxëp pyo'kxy ma ënäty ka'ap jam m'ëktsënaaynyëtën. Jëtu'un'äämpy ja mpokyëty ënäty xykyumëtowtë, mëët ko ka'ap të xytyuntë këwentë ja n'aaw n'ayukës ets mëët ko të xykyapatuntë ja n'ënä'ämënës ntëyajtënës.

Levitico 26:15

Ets ka'ap xy'ëkmëjpëjktaknëtë ja n'ënä'ämënës ntëyajtënës ets ka'ap xy'ëkpatuunëtëty ja n'aaw n'ayukës, xyjyä'äytyëkooynyëtëty jëtu'unyë ja käjpxytyu'unën, mëti'ipës të njatunyën mëët miitsëty.

Salmos 107:11

mëët ko tkäjpxykyumëtoownajxtë ja Wintsën ja y'ënä'ämën tyiyajtën ets ko ka'ap tuuntë këwentë mëti'ipë ojts tjatuknipëjktaakën ja Ni'ik Këjxmëpë.

Éxodo 30:33

Pën muum kë'ëmwinma'any yajkojpy yë on jëtu'unpë tä tyaapë y'ixëtyën, ëkë muum oypyënëty tukuja'axnëtëty; pën ënäty jëtu'un ëtëtspën, kopkpëky ko nëjkx yajjo'otsy ma ja myëkunaax myëkukajpnën.

Números 9:13

E pën ka'ap tmëjjawë yë ëmaayxyëëw ets ka'ap maa të nyijkxy ets jyanija'ap ko mëpaat tnixëëwtuny ja ëmaayxyëëw, kopkpëky ko nëjkx yajjo'otsy ma myëkunaax myëkukajpnën ets näjyëtu'un pën ka'ap të tyäky ja ayajk ako'onën ma ja Tiosën mëti'ipë paat'ajtëpën ma tnixëëwëtyën, nëjkxëp näjyëtu'un tkumëtoy.

Deuteronomio 17:12

Mëti'ipë ja ja'ay ka'ap kyäjpxymyëtoyën, wiinkjaty winë tuny ets ka'ap tmëjpëjktä'äky ja teety ja y'aaw y'ayuk, mëti'ipë jam myëtuumpyën ja Wintsën ets ka'ap tmëjpëjktä'äky ja yajkutujkpë ja y'aaw y'ayuk, jëtu'unpë ja'ay nëjkxëp y'ooky. Jëtu'un ka'ap yaj'ijxta'akëty ma ja Israel ja nyaax kyajpnën ja mëti'ipë ja ëxëëkpë tyuunpy kyäjpxypën.

1 Samuel 3:14

Paatyës yajxon ntimkyajpxwë'ëmy mëëtpë yë Eli y'u'unk tyo'oxytyëjk, ko yë nyëë pyokyëty ka'ap nijëna'a nimä'kxëtyës, oyxyëp tjayajktëpë kanaak yë wintsë'kën.