Números 15:30 - Biblia Mixe de Quetzaltepec

³⁰ E pën tu'uk yë ja'ay tsoky tyimpokytyuunpë, ëjts jëtu'un xyajjotma'tp, wä'än yë'ëjëty yë Israel ja'ay ëkë wä'än yë'ëjëty yë jaaypyaat jaaypyo'kxy. Tääpë ja'ay nëjkxëp tyimyajjo'otsy ma nyaax kyajpnën.

Números 15:30 ပူးပေါင်းရင်းမြစ်များ

Hebreos 10:26

Pën nnija'awëm ëëtsajtëm ja mëtëypyë ets npokytyu'un'ëtëtsëm, ka'ap ma tiinë ja wintsë'kën mëti'ipë poky yajwa'atsëpën,

Salmos 19:13

Jëpëk ma ya'atë mtuunpën yë amëj'ajt akëjxmajtën, ets këtii xy'ëwa'atsëty etsës amëj akëjxm nja'ay'atëty. Jëtu'unës ka'ap ëxëëk nyajpaatëty; nmëjëkäm'atëpës ja mëjpoky.

Deuteronomio 1:43

Ojts miits jëtu'un nja'ënëëmëtë, ka'apës ojts xytyuntë këwentë, ojts xykyäjpxy kumëtoownaxtë yë Wintsën ets ka'ap xykyuuytyuuntë ja y'ënä'ämën mëti'ipë ënäty ja Wintsën të tjanikäjpxyën, ni'ikyë ojts jam mnëjkxtë tunkëjxm janty këtii pën myëjëty.

Hebreos 10:29

¿wi'ix jëtää tkapaatëty ja tëytyu'unën mëti'ipë ja Tios U'unk kyamëjpëjktäkpyën, mëti'ipë jëtu'un tyuuntëpën ijxtëm jeexyë t'atään tuktääntën; mëti'ipë pyäjxtëpën ja Jesús ko të y'ooky ets ka'ap t'oyjya'awëtë ja Kënu'kxymyëkajtën, mëti'ipë tsojkëtëpën? Tääpë ne'pny yë'ë myë'ijtyp ja käjpxytyu'unën ets yë'ë mëët të yajkënu'kxtë.

Mateo 12:32

Nyimä'kxäämpy yë Tios ja ja'ay mëti'ipë myëkajpxtëkoopyën ja Naaxwiinyëtë ja'ay y'U'unk; yë'ë tëy pën myëkajpxtëkoopy ja Tios ja kyënu'kxymyëk'ajtën ka'ap yajnimä'kxa'any tyam ma naaxwiiny jyuuky'ätyën ets ni jää ma ënäty y'ookyën.

2 Pedro 2:10

Tios tyiytyunäämpy ja mëti'ipë ja ëxëëk winma'any y'atsojkpyën ets mëti'ipë ka'ap tkupëkyën ja Tios ja kyutujkën. Winma'anytyuk yë'ëjëty ets tyuuntëp tii tyimtunantëpën; ka'ap tsyë'ëkëtë ko t'ojtë ja kutujkëntëjk mëj'äämpyë.

Salmos 89:51

Wintsën, ëxëëkjaty tääpë ja'ay xëmë xytyuntës xy'ënëëmëtës mëti'ipë mmëtsip'ajtëpën. Jëtu'un këxëty këpätëty t'ënëëmëtë m'u'unk mëti'ipë të xywin'ixyën oy ma nyijkxy.

Salmos 79:12

Mijts Wintsën, wëxtujk ok näjyëtu'un ëxëëk xytyunëty yë nmëjëën nmëtëjkëtyës ko mëj të myajjoot'anpëkyë;

Salmos 74:22

Pëtë'ëk mijts, Tios, näkyukajpxët. Ja'amyäts ko yë ja'ayëty mëti'ipë winma'anytyukëtyën ka'ap pyo'kxtë ets wiinkjaty mtijyë.

Salmos 74:18

Mijts Wintsën mja'amyätsëp wi'ix yë mmëtsip myajjoot'anpëkyën ets wi'ix yë ja'ay winma'anytyukpë ëxëëk mnikäjpxy mnimëtyä'äkyën.

Números 9:13

E pën ka'ap tmëjjawë yë ëmaayxyëëw ets ka'ap maa të nyijkxy ets jyanija'ap ko mëpaat tnixëëwtuny ja ëmaayxyëëw, kopkpëky ko nëjkx yajjo'otsy ma myëkunaax myëkukajpnën ets näjyëtu'un pën ka'ap të tyäky ja ayajk ako'onën ma ja Tiosën mëti'ipë paat'ajtëpën ma tnixëëwëtyën, nëjkxëp näjyëtu'un tkumëtoy.

Éxodo 21:14

E pën tëë ënäty ja myëku'uk timtyukjoot'anpëjkpë ets paaty të tyaj'ooky, kopkpëky ko xy'ëxtaaytya'akëty oy ënäty muum të jyatimnyëjkxnë, ëkë të jyanäyu'tsyënë maas yë nwintsë'këntyaknën, ko xypyaatëty näy timjëtu'un nëjkx xyaj'ooky.

Proverbios 14:31

Ja'ay mëti'ipë wyojpy kyä'tsypyën yë ëyoopëja'ay, Tios myëtëkoopy mëti'ipë të yajkojyën; e mëti'ipë pya'ëyoopyën yë ëyoopëja'ay, yajmëjnajxëp yë Tios.

Salmos 69:9

Mëët yë'ë koos niku'ëwa'an'aty yë mtsajptëjk, wiinkës nnäjyawëty ko pën ëxëëkjaty tnikäjpxy tnimëtyä'äky, janty ëjtsës ntimjya'ap xytyimpatp ko pën ëxaty y'ënä'äny.

Levitico 20:10

Ko pën tyajwintsë'këntëkoyëty yë pëjkën ukën ma ja myëku'uk ja tyo'oxytyëjkën, amäjtsk nëjkx y'ooktë, jëtu'un ja ye'etyëjk ets jëtu'un ja to'oxytyëjk.

Levitico 20:6

Pën myëkäjpxypën yë poj ënääw, ëkë nyinëjkxypyën yë najtsja'apë ets ja jyot wyinma'any tyajma'aty ko yë'ë tninëjkxy. Ëjts nän ntëytyunëpës tääpë ja'ay ets nëjkxëpës nyaj'ooky ma ja nyaax kyajpnën.

Levitico 20:3

Ëjts ntëytyunäämpyës ets nyaj'ookäämpyës tääpë ja'ay, mëët ko ënäty të t'ëxëëktuny ja n'ijtaknës ets ko ënäty ja nxëëwës ja wa'atspë të tjaamteeny të tnaaxteeny. Ko ja y'u'unk të tkë'ëyajkpë ma ja wiink tiosën mëti'ipë xyëëwajtypyën Moloc.

Génesis 17:14

Pën ka'ap ja ye'etyëjkajtën yajnitsujktu'uty, kopkpëky ko yajwijtspëtsëmëty ma miitsëtyën. Jä'ä ko ka'ap ënäty ja nkäjpxytyu'unënës të twinkutsë'ëkë.

1 Juan 5:16

Ko pën ja myëku'uk t'ixëty ko tam pyokytyuny ets jä'ä ja poky mëti'ipë ka'ap yaj'ookyën, tuknija'amyätsëtë ja Tios ets ja Tios yajjuuky'atëtëty, ënät jëtu'un pën jä'ä ja poky mëti'ipë ka'ap yaj'ookyën. Jä'ä ko tää poky mëti'ipë yaj'o'kpën, ko pën tääpë jëtu'unpë poky tuny, ka'ap tjëkyepy ja Tios yajtuknija'amyätsëty.

Números 15:29

Ya'atë ënä'ämën tunëp ma Israel ja'ayëty ets ma ja jaaypyaat jaaypyo'kxyën mëti'ipë tsënaaytyëpën ma miitsëtyën, pën ka'ap tsyokyëty të pyokytyuny.

Deuteronomio 32:27

e ëjts ka'apës tu'ukyë njoot'anpëky, ënätës jatëkok nmayä'äny ntaja'any ka'ap yowë jëtu'un tyim'oy'atëty koos yë nmëtsip ntimyajxoonta'akëty. Ka'apës ntsoky ets mëj këjxm nyäjyawëtëty, ëkë y'ëna'antëty: Ix ënät ëxëëk jyajnëtë kyëpäjnëtë yë Israel ja'ayëty, ëëtsajtëm jëtu'un o'ktëy të ntu'unëmë, ka'ap yë'ëjëty yë Wintsën.

1 Samuel 2:25

Pën yë ja'ay myëtëkoopy yë myëku'uk, yë Wintsën jyëkyejpy nyipaye'eyëtëty, e pën tu'uk yë ja'ay myëtëkoopy yë Tios. ¿Pën jää nëjkx y'ëknipaye'eyë? Yë'ëjëty ka'ap tmëtoowkujkëtyë oy jëtu'un ja tyeety jya'ënëmaayëtë, jä'ä ko yë Wintsën tëë ënäty tuknipëjktaakë ko yaj'ooka'anëtë.

Job 38:15

ma ëxëëkja'aytyëjk ka'ap yajkutë'kxyën ets kyixy nyäxy ma je'eyë y'ëtsu'uxya'axtën.

Ezequiel 20:27

E mijts ye'etyëjk, ënëëmë yë Israel ja'ayëty: Jëtu'un yë Wintsën y'ënä'äny: Näyjyëtu'un yë mteety m'apëty tëëjës xyajjoot'anpëktë; tëë tyajtëkoytyë näwyintsë'ëkë ma ëjtsën.

Éxodo 30:33

Pën muum kë'ëmwinma'any yajkojpy yë on jëtu'unpë tä tyaapë y'ixëtyën, ëkë muum oypyënëty tukuja'axnëtëty; pën ënäty jëtu'un ëtëtspën, kopkpëky ko nëjkx yajjo'otsy ma ja myëkunaax myëkukajpnën.

1 Samuel 3:14

Paatyës yajxon ntimkyajpxwë'ëmy mëëtpë yë Eli y'u'unk tyo'oxytyëjk, ko yë nyëë pyokyëty ka'ap nijëna'a nimä'kxëtyës, oyxyëp tjayajktëpë kanaak yë wintsë'kën.