Números 15:3 - Biblia Mixe de Quetzaltepec

³ Koos xymyo'oja'antëty tu'uk yë tsajpkaa ëkë tsajppax etsës xytyukwintsë'ëkëja'antëty nino'oky ets oy xyuukëty jyokëty nwintuuyës. Mëët ko ënäty ja wyaantakën tyaj'ëtuka'antë, ëkë ko jëtu'un ja tsyojkën tpëjkta'aktë.

Números 15:3 ပူးပေါင်းရင်းမြစ်များ

Génesis 8:21

Ko jyä'äjty ja xu'kën janty'oy jam Tios wyintum, ënät y'ënäny yë Wintsën: Nijëna'ajës yë naaxwiinyëtë jëtu'un nka'ëkpojknëty mëët ko ënäty yë naaxwiinyëtë ja'ay pyokymyëët'atë. Jä'ä ko yë naaxwiinyëtë ja'ay mutsknëm jëtu'un tmëtso'ontaakëtë tuuntëko'oy kajpxtëko'oyën. Yë jëyujkëty nän ka'apës nëjkx n'ëkyajkutëkooynyë, ijxtëm tyam të jyäty të kyëpetyën.

Esdras 7:17

Yë'ës mtukjuyëp ja tsajpkaa ets ja tsajpkaa ëna'k, ets tsajppax ets ja kupixyny, mëët ja nyi'ujts pajk tä yë tsajpmokën ets nëëjën, mëti'ipë mtukwintsë'ëkëtëpën ja Wintsën, jam ma wintsë'këntyaknën mëti'ipë jap tsajptëkoty yajpatpën jam Jerusalén.

Éxodo 29:18

Tääts ënät ya'atë kupixyny y'ooky xynyino'okëty ma wintsë'këntyaknën, mëti'ipë yë Wintsën mtukmëjjawëpën, yë'ë ya'atë wintsë'kën nino'oky nixämpyë oypyë xyuuky jyokyën.

Éxodo 29:25

Tä ënät ok tu'ukyë xynyino'okëty jam ma wintsë'këntyaknën, mëët ja jëyujk'ooky mëti'ipë yajno'kpën, mëti'ipë ja Tios jä'ä të yajtuknipëjktaakën, jëtu'un tä tu'uk yë wintsë'kënën mëti'ipë oy xu'kp jojkpën. Ya'atë jä'ä yajyäky tä tu'uk yë ayajk ako'onën mëti'ipë nino'oky yë Tios yajtukwintsë'këpën.

Éxodo 29:41

Näyjyëtu'un xytyunëty ko ja wiinkpë ja kupixyny xyaj'ookëty jënäkyxyëëw, mëët yë tsajpmokway ets mëët yë tsatym nyëë ets xynyino'ok xynyixamëty; jëtu'un ja wintsë'kën xyakëty ja oypyë xyuukyën jyokyën.

Levitico 10:13

Jam xyjyë'kxtëty ma tu'uk yë it naaxwiinyëtën wa'atspë. Tyaapë ayajk ako'onën mëti'ipë yë Tios yajtukwinno'kpën, mijts yë mpatëp mëët yë m'u'unk m'ëna'k. Yë'ëjës yë Tios të xytyuk'ëne'emy xytyuntëty.

Levitico 27:2

Jëtu'un xy'ënëëmëty yë Israel ja'ayëty, ko pën nyäkyukëpäta'anëtëty ma Tiosën ets jëtu'un ja wyaantakën tyaj'ëtuka'anëty.

Levitico 7:16

E pën ja jëyujk jä'äts yajtukëpäjtp ma ënäty winë ja Tios të yajtukwinwanën, ëkë atsoky pën tyäky, jä'ä xëëw xytsyu'utstëty ja nyitsu'uty, e ja mëti'ipë natëjkëpën jyëkyejpy komjëpom tjaaktsu'utstëty.

Números 28:27

Yë'ë nëjkx yë Wintsën xytyukwintsë'ëkëtë nino'oky ets jam jya'tëty ma yë'ëjën tä tu'uk yë xu'kën jojkën oypyë, mäjtsk yë tsajpkaayä'äy ayääkë, tu'uk yë kupixyny yä'äy mëti'ipë tëë yä'kpetyën ets ëpëky wëxtujk yë kupixyny ayääkë mëti'ipë yë jyëmëjtëtyën tu'uk.

Números 29:8

Mëti'ipë yajnino'okëpën ets ja Wintsën jä'ä yajtukwinjokëty: tu'uk yë tsajpkaa u'unk, tu'uk yë kupixyny yä'äy mëti'ipë tëë yä'kpetyën ets wëxtujk yë kupixyny mëti'ipë tu'ukjaty yë jyëmëjtëtyën ets yë'ë mëti'ipë oyëty mëkëtyën.

Números 6:15

Nëjkxëp näjyëtu'un tyäky tu'katsy u'unk yë tsajpkääky ka'apë tsyooymyëëtëtyën, mëti'ipë oytyunyën mëët yë tsajpmok ets on. Näyjyëtu'un nëjkx tyäky yë tsajpkääktyë'ëts, mëti'ipë wäänjaty yë on të yajtuknixijkxyën, mëët ja ayajk ako'onën mëti'ipë aaypyajk ujts pajkën ets ja tsatym nyëë.

Mateo 3:17

Tääts yajmëtooy tu'uk ja ayuk tsajpjotm: Ya'atës n'U'unk'ajtyp, mëti'ipës ni'ik ntsojkpyën, ntukjotkujk'ajtypyës yë'ë.

2 Corintios 2:15

Jä'ä ko jëtu'un ja Tios xyajnajxëmë ma ja Kristën ijxtëm ja pa'akxu'kpë nëëjën ma ja mëti'ipë mëpëjktëpën ets mëti'ipë ka'ap myëpëktën.

2 Corintios 2:16

Pën ja Kristë ja y'aaw y'ayuk kyamëjpëjktakëtëp, jëtu'un tjawëtë ya'atë pa'akxu'kpë ijxtëm yë tok xyuukyën; e mëti'ipë ja Kristë ja y'aaw y'ayuk myëjpëjktaktëpën, jëtu'un tjawëtë ijxtëm ja pa'akxu'kpë nëëjën ma jyuuky'ajtënëtyën. ¿Pën mëta'akëp ets tunëty ya'atë Tios ja jyä'ä?

Efesios 5:2

Nätsyokëtë nixim niyam ijxtëm ja Kristë të xytsyojkëmën ets të nyäkyë'ëyäkyë ma të wyintsë'kën'atëtyën ëëts'ajtëmkyëjxm, jëtu'un tä ja wintsë'kënën mëti'ipë oy xu'kp jojkpën Tios wintum.

Deuteronomio 12:11

Ja it naaxwiinyëtën mëti'ipë ënäty ja Wintsën të twin'ixyën ets jam yajpaata'any, nëjkxëp ja wyintsë'kën xymyo'otë mëti'ipës yam të nikäjpxyën. Nëjkxëp xytyukwintsë'ëkëtë ja jëyujk mëti'ipë myaj'ooktëpën ets xynyino'oktëty. Nëjkxëp näjyëtu'un xymyo'otë yë ayajk ako'onën ets tu'kpëkpyë yajëpëkyën ma ja majk pëkpyën ets ayajk ako'onën mëti'ipë të xytyukwinwanëtën ets xymyo'oja'antë.

Deuteronomio 12:17

Ka'ap xykyäyëty ma mnaax mkajpnën ja tu'kpëkpyë yajjëpëkyën ma ja majk pëkpyën, mëti'ipë yë Wintsën mo'ojantëpën, ijxtëm yë tsajpmokën, tsatym nyëë, on, jëyujk tsajpkaa y'u'unk mëtu'ukpë, mëti'ipë ayajk ako'onën'ajtpën ma Wintsën të xytyukwinwanën.

Deuteronomio 12:6

Jam nëjkx yë Wintsën xytyukwintsë'ëkëtë yë jëyujk. Nëjkxëp yë Wintsën jam xymyo'otë yë tu'kpëkpyë yajjëpëkyën ma ja mmajkpëkpyën ets tii ënäty miitsëty mo'ojantëpën. Yë'ë nëjkx xykyë'ëmo'otë ja mjëyujk mtsajpkaajëty, mëti'ipë më''ëka'any të myinyën naaxwiiny.

Filipenses 4:18

Tëës may winë n'ëxajë ets njaaktimmyëët'ajtypës ja natëkë, jä'ä ko nmëët'ajtypyës mëti'ipë ja Epafrodito ojts xytyukmëkäxëtën. Jëtu'un ya'atë putëjkën ijxtëm ja pa'akxu'kpën mëti'ipë yajyojxpën ets yajtukwintsë'këpën ja Tios ets tukjotkëta'akëty.