Números 14:40 - Biblia Mixe de Quetzaltepec

⁴⁰ Komjopyëp janty tsojk ojts pyëtë'kojtë ojts jam nyëjkxtë kopkkëjxm ets nyäy'ënanëtë: Tëë yam niye'eypyäjtëmë. Tsojk nja'amënë ma ja itjotmën mëti'ipë ja Tios të xytyukwinwa'anëmën. Janty tëy ko tëë njanty pyoky tyu'unëmë.

Números 14:40 ပူးပေါင်းရင်းမြစ်များ

Deuteronomio 1:41

Ënät m'ëtsoowtë: Tëës mëj këjää ja Wintsën nmëtëkoytyë. E tyam jëjp'ixy ëëts nyajpaatë, oy nëjkxtëtyës tsiptuunpë, jëtu'un tä ja nWintsën'ajtëm Tios të tni'ënä'ämën. Ënät xypyëjkë'ktë ja mëti'ipë yajmëtsiptuunpën ets ojts mnëjkxtë, jä'ä jëtää ënäty mjootwinmaytyë ko ka'ap nëkooyë tsyipëty ets mkopktëkëtëty.

Lucas 13:25

Ko ja kutëjk pyëtë'ëkëty ets ja tëjk'aaw tyaj'ëtukëty, pën jap ënäty miits të mwë'ëmtë tëja'p, mjaakukajpxëtëp ma ja tëjk'aawën ets mja'ëna'antëty: Wintsën, yaj'ëwa'ats yë tëjk'aaw, tëkëjantëpës. Ënät ja kutëjk m'ëtsowëtëty: ka'apës nijawë mpën miitsëty.

Eclesiastés 9:3

Yë'ë jëtu'un ya'atë ka'ap oy n'ijxmëty mëti'ipë naaxwiiny naaxkëjxy tuunëpën jajtëpën. Näyjyëtu'un ënät jatu'kpëky ja ayuk, yë naaxwiinyëtë ja'ay jä'ä xëmë myëmääpy myëtäjpy tuuntëko'oy kajpxtëko'oyën; ja tsuuwinma'any kupoj winma'any jä'ä nätyuk'ënä'ämëp mapaat jyuuky'ätyën; ets ko y'ooky tyëkoy nitëyë yajmënëjkxnë jutjoty.

Números 15:30

E pën tu'uk yë ja'ay tsoky tyimpokytyuunpë, ëjts jëtu'un xyajjotma'tp, wä'än yë'ëjëty yë Israel ja'ay ëkë wä'än yë'ëjëty yë jaaypyaat jaaypyo'kxy. Tääpë ja'ay nëjkxëp tyimyajjo'otsy ma nyaax kyajpnën.

Números 22:34

Ets ja Balaam t'ëtsooy ja Wintsën ja kyukäjpxy: Pokyës të ntuny, ëjts nkanija'apës ënäty ko mijts ja ntu'ujës të xy'ëtujkë. Pën mijts ka'ap xy'oyjyawë koos nëjkxy, jyëkyejpyës nwinpitëty.

Deuteronomio 1:43

Ojts miits jëtu'un nja'ënëëmëtë, ka'apës ojts xytyuntë këwentë, ojts xykyäjpxy kumëtoownaxtë yë Wintsën ets ka'ap xykyuuytyuuntë ja y'ënä'ämën mëti'ipë ënäty ja Wintsën të tjanikäjpxyën, ni'ikyë ojts jam mnëjkxtë tunkëjxm janty këtii pën myëjëty.