Números 13:29 - Biblia Mixe de Quetzaltepec

²⁹ Maa ja it naaxwiinyëtë txëëwatyën Négueb, yë'ë jam tsënaaytyëp yë Amalec ja'ayëty. E ma ja it naaxwiinyëtën mëti'ipë kopkjotmën, yë'ë jam tsënaaytyëp yë Hit ja'ayëty, Jebús ja'ayëty, Amor ja'ayëty, e ma mëjmejyën ets Jordán mëjnëëjën, yë'ë jam tsënaaytyëp yë Canaán ja'ayëty.

Números 13:29 ပူးပေါင်းရင်းမြစ်များ

Números 14:43

Jëjp'ixy jam yë Amalec ja'ayëty mtim'ëwxitëtë ets Canaán ja'ayëty ets tsyiptuna'antë mëët miitsëty. Jëtu'un myaj'ooka'an myajtëkoya'anëtë. Miitsëty mnija'awëtyëp ko tëë yë Tios xymyëtëkoytyë, paaty tyam ka'ap yajpaaty ma miitsëtyën.

Jueces 6:3

Xëmë winjëmëjt ko ënäty yë Israel ja'ayëty muum yë pyëjktä'äky tyaj'itë ënätyë ijty myintë yë Madián ja'ayëty ets Amalec ja'ayëty jëtu'un ja pëjktä'äky yë'ë tyajnëkxta'atë.

Salmos 83:7

näjyëtu'un yë Guebal ja'ayëty, Amón ja'ayëty, Amalec ja'ayëty, ets filistejë ja'ayëty mëti'ipë tsënaaytyëpën jam Tirë,

1 Samuel 30:1

Kom tëkëëk xëëw yë David jam jyajtë Siclag, ënät tuk'ijxpäjtë ko ja Amalec ja'ayëty tëëtëm ja Négueb kajpn tniwa'kta'atë ets ja Siclag tëë tnitëkëtë ets të tno'oktë.

1 Samuel 14:48

Ënät tyajmujky nimay yë tsiptuunpëtëjk, ets tsyiptuuny mëët yë Amalec ja'ayëty, ka'ap tyajmëtäky. Jëtu'un'äämpy ojts tyajtso'oky yë Israel kajpn ma ënäty ëxëëk tyunëtën yë toonpë mä'tspë.

Números 24:20

Ënät yë Balaam näjyëtu'un tninajts'ijxëy yë Amalec yë y'itjot ets tkajpxpëtsëëmy ya'atë aaw ayuk: Yë Amalec yë nyaax kyajpn mëj'äämpy oypyënëty jyëkyepyë, e ko xëëw jëmëjt tpaatëty tëkokyë nëjkx y'atëkooytyä'äy.

Números 14:45

Ënät ja Amalec ja'ayëty ets ja Canaán ja'ayëty nyipëtsëëmëtë, mëti'ipë ënäty jam tsënaaytyëpën ma jampë ja itjotmën. Ets pyapooyëtë tyimpaja'ajtëtë jam ma Hormá y'itjotën, jëtu'un'äämpy ka'ap yajmëtakëtë.

Números 14:25

Yë Canaán ja'ayëty ets Amalec ja'ayëty jam yë tsyëënëtë joyjyotm. Jëpom mwinpitëty ets xypyanëjkxtëty ja tu'u mëti'ipë jam të'ëts'itjotm najxpën ets jyä'ty ma Tsaptsmejyën.

Éxodo 3:17

Näyjyëtu'unës të xy'ënëëmë, ko mmo'oja'anëtë ëwaatsëtuuy'ajtën yaa Egiptë ma ëxëëk mjatën mkëpätën, ets myajnëjkxa'anëtë jam ma nyaax kyajpnëtyën yë Canaán ja'ayëty, Hit ja'ayëty, Amor ja'ayëty, Ferez ja'ayëty, Heve ja'ayëty ets Jebús ja'ayëty; jam ka'ap yë jë'kxy pëky y'ëmaaytyä'äky, jam jëtu'un yë jë'kxy këtii y'ëmaayëty, tä tu'uk yë komnëë pyëyi'ikyën.

Éxodo 3:8

Paatyës yaa naaxwiiny të nkëtä'äky etsës nyajtso'oka'antë ma Egiptë ja'ayëtyën, nyajpëtsëmantëpës yam ma tääpë kajpnën etsës nyajnëjkxa'antë ma ja oypyë ja it naaxwiinyëtë, ma myëjwiin y'ëwaatsëtyën ets ma ja jë'kxy pëky ka'ap ninu'un y'ëmaaytyä'äkyën; jam jëtu'un ma tsyëënëtën yë Canaán ja'ayëty, Hit ja'ayëty, Amor ja'ayëty, Ferez ja'ayëty, Heve ja'ayëty ets Jebús ja'ayëty.

Génesis 14:7

Ko ojts wyimpijnë ja Quedorlaomer mëët ja mayjyä'äy jënu'un ënäty të jyämyëët'atyën, ënät jyajtë jam En-mispat, mëti'ipë näjyëtu'un yajtijpën Cadés ets tyajma'taaytyë, tyajkutëkooytyääytyë jënu'un winë tpatën ma ja Amalec ja'ayëty ja nyaax kyajpnëtyën. Näyjyëtu'un ojts jam y'ëtë'ëtstë ma ja Amor ja'ayëtyën, mëti'ipë jam tsënaaytyëpën ma tu'uk ja it naaxwiinyëtë mëti'ipë yajtijyën Hazezón-tamar.

Números 13:17

Ënät ojts yë Moisés tkexy ya'atë ja'ayëty jam ma ja it naaxwiinyëtë txëëwatyën Canaán ets t'ixtëty tuntëty, ënät t'ënëmaay: Jäätsow mnëjkxtëty ma txëëwatyën Négueb ets mpäjtë'ëktëty ma ja kopkjotmën.

Números 13:30

Ënät ja Caleb ojts wya'akë'ëky ets tyaj'ëmoontaay tëkokyë ja naax kajpn, mëti'ipë ënäty jam yajpatëpën ma ja Moisésën ets y'ënäny: Tsojk tääpë yë naax kajpn nitsiptu'unëmë ets njä'ä'ajtmëty. Ëëts'ajtëm xymyä'ämyëp yë'ë ets nmëmëtakmëty.

Josue 5:1

Tëkokyë yë yajkutujkpëtëjk mëti'ipë ënäty jam yajpatëpën xëëwkëtä'äkytsyow ma ja Jordán mëjnëëjën, ets ja yajkutujkpëtëjk Canaán ja'ayëty, jampë tsyëënëtën winkon ma ja naax mejy'itkujkpyën; ojts nijawëtë ko ënäty ja Tios ja Jordán mëjnëë të tyajtë'ëtsy ma ja Israel ja'ayëty nyajxtën, paaty ojts tsyë'ëkëtë ets ka'ap tnipëtë'ktë ja Israel ja'ayëty.

Josue 9:1

Yë yajkutujkpëtëjk mëti'ipë jam ënä'ämtëpën ma Hit ja'ayëtyën, Amor ja'ayëtyën, Canaán ja'ayëtyën, Ferez ja'ayëtyën, Heve ja'ayëtyën ets Jebús ja'ayëty ojts tnijawëtë wi'ix ënäty të jyäty të kyëpetyën jam Aí. Ya'atë yajkutujkpëtëjk jam ënäty tsyëënëtë anajnytsyow'äämpy ma ja Jordán mëjnëëjën ets tëkokyë ma ja kopkjotmën, ma ja joyjyotmën ets jampaat ma ja Mejyën Naax'akujkpyë pya'ajën ets tyimja'ty jam ma ja Líbano y'itjotmën.

Josue 10:5

Ënät ojts jyänty tyu'ukmuktë yë nimëkoxkpë yajkutujkpë mëti'ipë Amor ja'ayëtyën, jä'ä ja yajkutujkpëtëjk mëti'ipë jam yajpatëpën Jerusalén, Hebrón, Jarmut, Laquis ets Eglón, tu'ukyë ojts tsyoontë aakmëët yë tsiptuunpëtëjkëty ets tninëjkxtë ja Gabaón kajpn.

Josue 10:6

E ko ja Gabaón ja'ayëty jëtu'un t'ijxtë ënätyë ojts tkäjpxynyikäxtë ja Josué jam Guilgal ma ënäty jam yajpaatyën ets t'ënëmaaytyë: Wintsën këtii ëëts jëtu'unyë xynya'ixtë. Min poj'am putëjkëtëkës, tun yë mëyajtën ets niwaantutëkës, tëë yë yajkutujkpëtëjk mëti'ipë Amor ja'ayëtyën tu'ukyë nyäpyëkëtë jampë kopkjotm yajpaatën etsës xynyitëkëja'antë.

1 Samuel 7:14

Ja kajpn mëti'ipë ënäty të yajpëjkëtën ja Israel ja'ayëty ojts jatëkok tjä'äpëktë, jä'ä yajtijtë Ecrón ets Mizpá. Jëtu'un'äämpy jatëkok ja Israel ja'ayëty tpatë ja y'it nyaaxëty mëti'ipë ënäty ja filistejë ja'ayëty të tyukniwojptu'utëtën ets jotkujk ojts yajpaatë mëët ja Amor ja'ayëty.

Deuteronomio 7:1

Yë Wintsën mëti'ipë miits mTiosajtëpën yë'ë mputëkëjanëtëp ets jam mja'tëty ma ja it naaxwiinyëtën mëti'ipë mjä'ä'atantëpën, ënät nëjkx xyajkutëkoytyë ja wëxtujkpë ja naax kajpn jampë yajpaatën mëti'ipë mëj'äämpy ijtëpën ma jotmëkja'ay tsyëënëtën. Yë'ë yajtijtëp ja Hit ja'ayëty, gergeseos ja'ayëty, Amor ja'ayëty, Canaán ja'ayëty, Ferez ja'ayëty, Heve ja'ayëty ets Jebús ja'ayëty.

Deuteronomio 20:17

Nëjkxëp ëpëky xypyëjkta'aktë ets ja Wintsën jä'ä xytyukwintsë'ëkëtëty, tä yë Hit ja'ayëty, Amor ja'ayëty, Canaán ja'ayëty, Ferez ja'ayëty, Heve ja'ayëty ets Jebús ja'ayëty, jëtu'un ijxtëm ja Wintsën të ni'ënä'ämën, nëjkxëp xyajkutëkooytya'atë.

Josue 3:10

Ya'atë jëtu'un yajtuk'ixëp ko yë Tios juukpyë tyaa yajpaaty mëët miitsëty, ma ënäty mnaxtën, jëtu'un tyajkutëkoyä'äny yë Canaán ja'ayëty, Hit ja'ayëty, Heve ja'ayëty, Ferez ja'ayëty, gergeseos ja'ayëty, Amor ja'ayëty ets Jebús ja'ayëty.

Jueces 3:5

Ja Israel ja'ayëty jëtu'un ojts jam ja jyuuky'ajtënëty tyajtso'onta'aktë tsyënaaymyuktë mëët ja Canaán ja'ayëty, Hit ja'ayëty, Amor ja'ayëty, Ferez ja'ayëty, Heve ja'ayëty ets Jebús ja'ayëty.

1 Samuel 27:8

Xëmë ijty winjëpom tsyoontë ets nëjkx jam myäätstë Guesur, Guézer ets jam Amalec, jam tääpë ja'ay tsyëënëtë ma tsyo'ontä'äkyën Telaim nyaaxjotmën ets nyijkxy Shur ets jëtu'un tyimja'ty Egiptë.

Nehemías 9:8

M'ijx ko mijts ënäty mtimtyuk'ijxpäjtëp, paaty tyuuny ja käjpxytyu'unën mëët yë'ë: Ko xy'ënëmaay ko yë'ë nëjkx ja y'u'unk y'ok xymyo'oy ja nyaaxëty ma tsyëënëtën ja Canaán ja'ayëty, Hit ja'ayëty, Amor ja'ayëty, Ferez ja'ayëty, Jebús ja'ayëty ets gergeseos ja'ayëty; e tëëjës ja m'aaw m'ayuk xjyäntykyuuytyuny jä'ä ko mijts mpatuunpy ja mëti'ipë mnikäjpxypën.