Números 11:23 - Biblia Mixe de Quetzaltepec

²³ Ënät ja Tios y'ëtsoowë: ¿Tii janty yi'inëm xy'ixy ëjts yë nmëk'ajtënë? M'ixëp ko jëtu'un tyunëtëty jyatëtëty, mëti'ipës të nikäjpxyën.

Números 11:23 ပူးပေါင်းရင်းမြစ်များ

Isaías 59:1

Yë Wintsën yë myëk'ajtën ka'ap jëtu'un kyixy nyäxy tä oy tiijën ets ka'ap yajnitso'okëty, ka'ap nyatëty ets pën y'ëna'anëty ko ka'ap myëtoy.

Isaías 50:2

¿Tii ko ka'ap pën npatyës koos ojts njaminy? ¿Tii ko ka'ap pën y'ëtsooy koos ojts njamëkäjpxy? ¿Jëtu'un m'ënantë ko ka'apës xymyäy pën nyajtso'okëtyës? ¿Jëtu'un m'ënantë ko ka'apës xymyäy pën nyaj'ëwaatsëpëtsëmëtyës? Ëjts tu'k aaw je'eyë nkäjpxyës tääts ja mëjmejy tsyi'itsy, ja mëjnëë y'awinpity të'ëts'itjot ets ja nëë jëyujk tyëëtsë o'kta'atë ëkë pyutsnëtë ko ka'ap ja nëë.

Ezequiel 12:25

Jä'ä ko ëjts Wintsën, kajpxaanpës yam ets ja mëti'ipës nikajpxäämpyën atëwaanp tsojk. Kajpn je'eyëpë kyäjpxykyumëtoownaxyën, nëjkxëp kë'ëm xy'ixtë; koos ënäty nkäjpxy koonëm nëjkx y'atëy. Ëjts Wintsën, ëjts ënaanp.

Números 23:19

Yë Tios kajëna'a yë kya'ooky kyatëkoy, yë'ë ka'ap wyin'ëëny ets ka'ap yë y'aaw y'ayuk tukxi'iky. Ko tii tnikäjpxy pyatuumpy, ets ko tii twinwanë yäjkpy.

Génesis 18:14

¿Jä'ä jëtää winë mëti'ipë Wintsën tsip jya'awëpë? jajëmëjt jatëkok yaa min nku'ix nkukajpxëtë. E yë Sara jajëmëjt nëjkx tpaaty t'ixy yë u'unk maay.

Lucas 1:37

Tios, ka'ap tii tyajtsiptä'äky.

Mateo 19:26

Tääts ja Jesús wyintë'kxëtë ets y'ënëmaayëtë: Yë ja'ay wä'än jëtää ka'ap myäyëtëty, yë Tios tii kamaayëp.

Ezequiel 24:14

Ëjts Wintsën, ëjts ënaanp ets jëtu'un tyuna'any jyata'anyë. Ëjts jëtu'un kë'ëm nyajtunan nyajjatanëp ets ka'ap mpa'ëyowa'any ets ka'apës jatëkok nwinma'anytyëkatsa'any. Yë'ë ntuktëytyunäämpy ko ëxëëk të m'ëtë'ëtsy të m'ëna'any. Ëjts Wintsën, ëjts ënaanp.

Mateo 24:35

Këxaanp naxaanp yë tsajp ets naaxwiinyëtë, e yë n'aaw n'ayukës nijëna'a kyakëxa'any kyanaxa'any.

Miqueas 2:7

¿Ti wä'än jëtää y'ëkpoky'ajnë yë Jacob yë nyaax kyajpnë? ¿Ëkë wä'än jëtää yë Wintsën tëë myä'kxtujkën kyixyë? ¿Ëkë jëtu'un yë Tios winë tunyë? ¿Ka'apën tuk'oy'äty yë ja'ay ko oy winë tunyë?

Salmos 78:41

E ka'ap wyinjekyëty ijty ja Tios tyajjotkëxtë, ets jëtu'un tyajmon tyajtuktë ja Wa'atspë jampë yajpaatyën Israel.

2 Reyes 7:2

Ja yajkutujkpë ja tyuunpë, je'eyë ojts y'ëtsoy: Oyxyëp jeexyë jëtu'un yë nëë tuu jam jyatim nyämyëtso'onëpë tsajpjotm, mëti'ipë ja Wintsën yajniku'ëwatsypyën, tääpë xynyikäjpxyën ka'ap ninu'un tyunëtëty jyatëtëty. E ja Elisejë ënät y'ëtsooy: Kë'ëm jëpom xy'ixëty, mja'ixëp mëët yë mwiin je'eyëp ko ka'ap nitii xyjyë'kxëty.

Números 11:22

¿Maa xypyëka'any nëkooyë jëyujk tsajpkaa mëti'ipë ookëpën ets ya'atë ja'ay tsyu'utstëty? Oyxyëp jeexyë xyjyamooypyë tëkokyë yë nëë jëyujk jënu'un mejyjoty yajpaatën ka'ap myëta'akëty.

Jeremias 14:9

¿Wi'ix ko jëtu'un myaj'ixy tä tu'uk ja'ayën mëti'ipë kumo'on kutujkëpën ëkë tä tu'uk tsiptuunpë ja'ayën mëti'ipë ka'ap myäyën pyutëkëty? E mijts Wintsën, itkujky mjayajpaaty ma ëëtsëtyën, ni'ëmukë ëëts nijawëtë ko ëëtsëty xykyajp'atë; këtii ëëts xy'ëxmatstë.

Daniel 6:20

Ko tmëwinkoony ja kaa ijtakn, ënät jë'ë ya'ax tmëkäjpxy ja Daniel: Daniel, Tios mëtuunpë, ¿tëë ja mTios myajtso'okyë kaa aawjoty, mëti'ipë m'ëwtajtypyën ets mëtuumpyën ëmuumtu'ukjotë?

Éxodo 6:1

Ënät ja Tios y'ëtsoowë: Tyam xy'ixtëty wi'ixës yam yë mëj'ënä'ämpë ntuna'anyën, yë'ë atsip nëjkx m'ëxmajtsënëtë ma nyaax kyajpnën, yë'ëpaat nëjkx kë'ëm y'ënanë: Nëjkxtë.

2 Reyes 4:43

E ja tyuunpë tyaa y'ëtsooy: ¿Wi'ixës ënät ya'atë nimëko'pxpë ja'ay nyajkaaytya'ajëty? Tääts ja Elisejë y'ëtsooy: Mo'otë ja'ay kyääky y'uukyëty, jä'ä ko tëë yë Wintsën y'ënä'äny ko kaaytya'ajantëp yë ja'ay ets jaaknatëkëjaanp yë jë'kxy pëky.

Jeremias 32:17

Mijts Wintsën, mëët ja mëk'ajtën ets ja kutujkën të xyajkojy ja tsajp ets naaxwiinyëtë, ka'ap nitii tsip xyjyawë.

Jeremias 32:27

Ëjts jëtu'un Wintsënajtp, mëti'ipë Tyios'ajtëpën tëkokyë juukpyë. Nitii kyatsiptä'äky mëët ëjts.